СДСМ и оваа влада на СДСМ предводена од Зоран Заев економски ја втурна во колапс Република Македонија, истакна портпаролот на ВМРО-ДПМНЕ, Димче Арсовски.

„Задолжувања, даноци, камати, криминални тендери, покачување на основни потреби за живот, сето ова го наметна владата на СДСМ и на Зоран Заев кон граѓаните. Страда државата, страдаат и граѓаните и сето тоа поради неспособноста и поради криминалот на СДСМ и на Зоран Заев. 4.13 денари е најновото покачување по литар гориво, а од доаѓањето на власт на СДСМ и Заев, до сега покачувањето за литар гориво е цели 14 денари. Цели 14 денари по литар се давачки кои се арач на државата што го зема Заев и потоа тие пари преку криминални тендери завршуваат во џебовите на СДСМ и на функционерите околу Заев, но и самиот Зоран Заев“, потенцира Арсовски.

Според Арсовски, на просечно семејство изминативе 4 години му се зголемиле давачките во просек месечно за гориво за еден автомобил за над 600 денари.

Додаде дека над 50 милиони евра годишно власта на СДСМ ќе земе од граѓаните преку покачувањето на горивата, а тие 50 милиони евра како што рече ќе завршат во џебовите на СДСМ преку криминални тендери.

„Додека оваа врласт ги ограбува граѓаните, СДСМ и Заев ја задолжија државата и граѓаните над 7 милијарди евра, од кои 2.4 милијарди евра нов долг, само во време на СДСМ и Заев изминативе 4 години“, рече Арсовски.

Ова, како што рече Арсовски, е најголемото историско покачување на јавен долг на една Влада и, според него, најголемото историско задолжување од страна на една, како што ја нарече, криминална влада, додека, пак, капиталните инвестиции, коишто треба да се во најголем број,  се огромна нула.