Македонија
(Видео) Арсовски: Ковачевски нема интегритет, со радости аплаудирал на Скопје 2014

Ако досега јавноста можеше да се увери во неспособноста на Димитар Ковачевски, сега виде дека се работи и за крајно лицемерен лик. Имено по насока на неговите политички ментори од СДСМ Ковачевски зборуваше за проектот Скопје 2014 година нарекувајќи го криминален проект, но архивските снимки покажаа дека тој лично се восхитувал на овој проект, учествувал во настаните за отворање на објекти од Скопје 2014-та, и со задоволство аплаудирал, истакна портпаролот на ВМРО-ДПМНЕ, Димче Арсовски на денешната прес-конференција.
„Само да потврдиме, иако Ковачевски е видно најрадосен и можеби најсреќен за проектот Скопје 2014, како што можеше да се забележи на видеото, а воедно и редовен одобрувач на настаните и политиките на ВМРО-ДПМНЕ, уште еднаш потврдуваме Димитар Ковачевски не е член на ВМРО-ДПМНЕ. Се гледа дека Димитар Ковачевски е видно среќен на отворањето на Македонскиот народен театар во 2013 година, како дел од проектот „Скопје 2014″. И практично ова што го видовте на ова видео тоа е таа дволичност на Ковачевски, кој сега како премиер го критикува проектот „Скопје 2014″, вели Арсовски.
„На кој Ковачевски да му веруваме? На оној од 2013-та кој е видно радосен и е во првите редови и кој аплаудира на проектот Скопје 2014, или на овој денес кој чита напишан текст од неговите политички ментори“, праша Арсовски.
Ковачевски, како што рече, бил во првите редови со аплаузи, со радости, со почести, со сите нишани на тоа што денес го нарекува „криминален проект“, „осудено лице“ и „криминал на ВМРО-ДПМНЕ“.
„Практично Ковачевски со овие две различни ситуации изјави, покажува дека е само киднапирано лице во СДСМ кое нема право на сопствено мислење, туку има единствено право на мислење како неговите ментори од СДСМ кои го поставија за претседател. Човек без сопствено мислење како Ковачевски, гледаме и самите дека не може да води држава. Тоа го видовме изминативе неколку месеци. Очигледно е, Ковачевски нема свој интегритет, воден е за рака од своите политички ментори во СДСМ и беспоговорно чита што тие ќе му напишат. Затоа велиме дека тој човек нема што ново да понуди. Тоа го видовме изминативе неколку месеци. Сега уште полошо, од најлошото на Зоран Заев, а знаеме сите колку беше лошо во времето на Заев“, потенцира портпаролот на ВМРО-ДПМНЕ.
Му порача на Ковачевски, како што рече, да се охрабри и да го провери својот легитимитет помеѓу граѓаните и да излезе на избори.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Во потрага по храна, мечка се качи на тераса од семејна куќа во Тетовско

Мечка се качила на тераса од семејна куќа во тетовското село Отуње.
Членовите на семејството биле во внатрешноста на куќата, па со мобилен телефон ја снимиле мечката качена на маса каде имало оставено храна, пишува „Тетово инфо“.
Според објавеното и во другите блиски села како Сетоле и Једоарце летово биле забележани слични примери на камери за видеонадзор.
„Мечките во потрага по храна, се движат низ селото, уништуваат сандаци со пчели и слично“.
Македонија
ОЈО со детали за големата акција: 13 лица под истрага за даночно затајување, перење пари и даночна измама, тргувале со горива

Денешната акција спроведена на повеќе локации низ државата е резултат на двегодишна предистражна постапка што ја водеше Основното јавно обвинителство за гонење на организиран криминал и корупција во тесна соработка со Управата за финансиска полиција, соопшти обвинителството.
Постапувајќи по кривичната пријава, надлежен обвинител од ОЈО ГОКК донел Наредба за спроведување на истражна постапка против 13 лица, меѓу кои се и четворица косовски државјани и една државјанка на Република Хрватска.
Осомничените се товарaт дека од 2014 до 2023 година организирале и учествувале во криминална група со цел стекнување противправна имотна корист преку даночно затајување, даночна измама и перење пари со што осомничените го оштетиле Буџетот на државата во големи размери. Групата креирала мрежа од правни субјекти преку кои се вршела продажба и фиктивна трговија со нафтени деривати, се изготвувале фактури со невистинита содржина, со цел да се избегне плаќањето на даночни обврски и да се оствари незаконски поврат на ДДВ. Преку правни лица што не поседуваат дозволи за трговија со нафтени деривати се вршела набавка, транспорт и продажба на Еуросупер, Еуродизел и Екстралесно гориво, со намера да избегнат целосно или делумно плаќање на законски предвидените даночни обврски. Продажбата во поголем број случаи се одвивала без издавање на фискални сметки и фактури, а средствата прибрани во готово не биле евидентирани во сметководствената документација. Осомничените странски државјани, кои формално биле назначени за одговорни лица во повеќе осомничени правни субјекти, немале регулиран престој во земјава, што организаторите на групата го користеле како начин за прикривање на нивната поврзаност со криминалното дејствување.
Воедно, организаторите на групата, од продадените нафтени деривати во готово пуштиле во оптек, примиле пари и извршиле пренос на паричните средства со намера да го прикријат нивното движење, со што се стекнале со противправна имотна корист во големи размери, а за која знаеле дека е прибавена со кривичното дело Даночно затајување, при што сториле и кривично дело Перење пари и други приноси од казниво дело.
Јавниот обвинител ценејќи дека се исполнети условите до судијата на претходна постапка при Основниот кривичен суд Скопје достави предлог за определување на мерка притвор за сите осомничени. До сега се обезбедени седум лица за кои е прифатен предлогот на обвинителството и судот со Решение им определи мерка притвор во траење од 30 дена, за останатите – петмината странски државјани и еден македонски државјанин мерката притвор ќе биде определена во отсуство.
Македонија
Муцунски-Јан Копман: разменети мислења за спроведувањето на реформската агенда, во фокусот и иницијативата „Роаминг како дома со ЕУ“

Министерот за надворешни работи и надворешна трговија, Тимчо Муцунски, денес и утре престојува во работна посета на Брисел, Кралството Белгија. Во рамки на посетата, денеска оствари средба со генералниот директор на Директоратот на Европската комисија за проширување и источно соседство, Герт Јан Копман.
На средбата беа разменети мислења за спроведувањето на реформската агенда, посветеноста на Владата да испорачува видливи резултати од реформските процеси, како и за Планот за раст како дел од пошироката европска поддршка за регионот. Муцунски нагласи дека Владата во изминатата година демонстрираше сериозна посветеност во исполнувањето на обврските од реформската агенда, постигнувајќи значителен напредок, особено во областите на дигитализацијата, владеењето на правото и борбата против корупцијата, при што истакна дека овие приоритети остануваат во фокусот на Владата и во наредниот период.
Се разговараше и за регионалната соработка, при што беше нагласена активната улога и придонесот на Република Северна Македонија во рамките на регионалните иницијативи, како и кон стабилноста и безбедноста на целиот регион.
Соговорниците се осврнаа и на актуелните геополитички и безбедносни предизвици во Европа. Во таа насока беше потенцирана важноста од продолжување на поддршката за Украина и потребата од заеднички, координиран пристап во справувањето со последиците од руската агресија.
Во фокусот на разговорот беше и иницијативата „Роаминг како дома со ЕУ“, насочена кон постепено укинување на трошоците за роаминг помеѓу земјите од Западен Балкан и Европската Унија. Одлуката за оваа иницијатива се очекува да биде донесена на почетокот на следната година.
Муцунски уште еднаш ја потврди цврстата посветеност на Република Северна Македонија кон процесот на европска интеграција како еден од стратешките приоритети во надворешната политика. Тој ја истакна и целосната усогласеност на државата со Заедничката надворешна и безбедносна политика на ЕУ, како и значењето на стратешкото партнерство со Европската Унија во областа на безбедноста и одбраната.