Македонија
(Видео) Арсовски: Крадењето струја, ако си близок до Заев, стана секојдневие

Вчера ја имавме најсмешната Монти Пајтон ситуација, каде што власта предводена во овој случај од Оливер Спасовски, како министер за внатрешни работи, пред лицето на јавноста и пред камери од медиуми заштити криминал, изјави портпаролот на ВМРО-ДПМНЕ Димче Арсовски.
Вчера, рече тој, полицијата и Оливер Спасовски ги сокрија дивите копачи на криптовалути во јавното претпријатије ГТЦ, каде што изминативе четири години под палка на СДСМ краделе струја и користеле простор и струја од ГТЦ, да се обогатат со стотици илјади, а можеби и милиони евра преку копање на криптовалути.
„Аминувањето на ова крадење струја од страна на коалицските партнери на Зоран Заев информациите говорат дека е на семејството Бајрам, коешто е во коалиција со СДСМ. Очигледно е дека е поддржано од директорот на ГТЦ и од претседателот на одборот на директори на ГТЦ. Интересно е што претседател на одборот на директори е г-ѓа Трајанка Тасевска, чиј сопруг е директор на БЈБ при МВР, тоа е Сашо Тасевски. Истата г-ѓа е претседател и на форумот на жени во СДСМ во Кисела Вода. Е сега, интересно е што вчера полицијата, замислете, не можеше да ги пронајде машините за копање криптовалути по претходна пријава нормално со точно дадени информации, односно полицијата вчера ги заштити дивите копачи коишто краделе струја од ГТЦ“, истакна Арсовски.
Дали Оливер Спасовски и Сашо Тасевски, по нарачка на неговата сопруга, и директорот на ГТЦ од СДСМ, Ѓоко, ја повлекле полицијата и излегоа со информации дека најпрвин не пронашле машини, праша Арсовски на денешната прес-конференција.
„Зошто се дислоцирани машините ако е сè легално како што велеа во МВР? Каде се однесени тие машини и дали сега се наместени во други институции каде што на истите места можеби крадат повторно струја? Зошто не се уапсени сопствениците, како што изминативе месеци во медиумите можевме да прочитаме дека се апсени и други диви копачи на криптовалути? Сомневањата и информациите се дека тие машини се во сопственост на коалицискиот партнер на СДСМ, господинот Елвис Бајра“, рече тој.
„Очигледно татко му на Зоран Заев не бил единствен што краде струја во држават , очигледно и семејството Бајрам крадело струја од ГТЦ на грб на чесните дуќанџии, кои замислете изминативе година и пол погодени од корона кризата влегоа во сериозни минуси. Очигледно голем дел од минусот за тие сметки и е токму и поради копањето на овие криптовалути, коешто одело на нивни грб“, напомена Арсовски.
Додаде дека сите треба да сносат одговорност.
Според него, крадењето и криминалот со СДСМ станаа секојдневие во Република Македонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сиљановска-Давкова: ООН постои да гради мир не само меѓу нациите, туку и со природата

Претседателката Гордана Сиљановска-Давкова се обрати на третата Конференција на Обединетите Нации за океанот (UNOC3) за поддршка на спроведувањето на целта 14 за одржлив развој ,,Зачувување и одржливо користење на океаните, морињата и морските ресурси за одржлив развој”, што се одржува во Ница, Франција.
Во своето обраќање, таа го нагласи виталното значење на океанот како срце на глобалниот климатски систем којшто апсорбира четвртина од емисиите на CO2 и обезбедува половина од кислородот потребен на Земјата. Сиљановска-Давкова укажа дека со нашите неодржливи модели на производство и потрошувачка го нарушуваме океанскиот систем.
Таа посочи дека за да се справиме со кризата, потребен е ефикасен мултилатерализам со силни Обединети нации коишто постојат за да градат мир не само меѓу нациите, туку и со природата.
Според претседателката, ниту една земја, ниту еден континент не може самостојно да воспостави и одржи мир со природата. Таа рече дека симболична коинциденција е што склучувањето на ,,Договорот за зачувување и одржливо користење на морската биолошка разновидност” се случува во татковината на Мишел Сера, авторот на ,,Природниот договор” во којшто луѓето ги третираат Земјата и природата како ним рамноправни партнери.
Истакнувајќи ја македонската заложба за дијалог и силно меѓународно управување со океаните, таа потенцираше дека ја поздравуваме Декларацијата „Нашиот океан, нашата иднина: обединети за итна акција“ и изразуваме поддршка за имплементацијата на Целта за одржлив развој 14 и Акциониот план од Ница.
Како земја, дел од Медитеранот, еден од климатски најранливите региони во светот, даваме приоритет на интегрираното управување со водите. Таа оцени дека овој процес ќе биде многу поефикасен ако се деблокира нашето пристапување кон ЕУ.
Македонија
Обвинителството не докажа дека таткото на Вања го сторил делото, освен нечија перцепција дека бил чуден, нема доказ дека е вмешан, вели адвокатот Туфегџиќ

По денешното судење за убиствата на 14-годишната Вања Ѓорчевска и пензионерот Панче Жежовски, Владимир Туфегџиќ, адвокатот на таткото на убиената Вања, рече дека е изненаден од завршните зборови на Обвинителството. Кажа дека очекувал силна енергија и силни аргументи од обвинителите.
„Напротив, добивме само една сувопарна компилација на прочитани докази, неповрзани едни со други. По однос на таткото можам да кажам дека Јавното обвинителство не докажа дека го сторил кривичното дело кое му се става на товар. Слушнавте и сами дека единствениот темел на обвинението на Обвинителството за таткото е тоа што во даден момент, според нечија перцепција, тој се однесувал чудно, односно бил чуден. Не слушнавме и не е понуден ниту еден доказ за какава било негова инволвираност. Од тие причини сметам дека се остварија моите предвидувања дека Обвинителството нема да го повлече обвинението и верувам во една правила одлука на судот по однос на таткото“, рече адвокатот Туфегџиќ.
И денес Туфегџиќ кажа дека основа на одбраната на таткото е фактот дека не постои ниту една комуникација, ниту што било што би го компромитирало и го повтори неговиот став дека убиствата не се од користољубие туку за да се внесе немир кај населението.
„Не постои ниту една комуникација ниту што било што би го компромитирало таткото или би го довело во врска со овие луѓе за кои во текот на постапката се изведени доволно докази од кои секој обичен набљудувач може да изведе еден логичен заклучок дека во овој случај темелот, основот на обвинението- користољубие е одамна паднат и овде се работи за нешто сосема друго, според мене лично, дело извршено за да се внесе страв и немир кај населението. Особено во основните училишта. А кои биле мотивите, тоа не е до крај расчистено поради една површна истрага и многу пропусти во истражната постапка“, вели адвокатот Туфегџиќ.
Како многупати досега, Туфегџиќ и денес по судењето кажа дека е непотребно во 21 век да се примени тортура оти постојат истражни методи и методологија која овозможува да се дојде до вистината. Очекува во наредниот период да се утврди зошто истражните органи употребиле тортура.
Во завршните зборови денес Обвинителството заклучи дека Вања и Панче се убиени на свиреп и монструозен начин, а татко на Вања дал информација дека таа сама ќе оди на училиште.
За киднапирањата и убиствата на Вања и на Панче се обвинети Љупчо Палевски – Палчо, Влатко Кешишев, Боре Видевски, Велибор Манев, а таткото на Вања, Александар Ѓорчевски се товари за помагање во киднапирање.
Македонија
СДСМ: Апсењето на Нацев е задоцнето, со жртвено јагне ВМРО-ДПМНЕ сака да ги спаси актуелните функционери

Три месеци владата на ВМРО-ДПМНЕ негираше секаква вмешаност на Нацев, како сопственик на агенцијата која го обезбедувала кабарето „Пулс“ во Кочани. Го бранеа, го амнестираа, додека родителите на жртвите во трагедијата бараа одговори и правда, велат од СДСМ.
„Дури Мицкоски најави и оставка ако потврди дека некоја агенција за обезбедување била блиска до ВМРО-ДПМНЕ. И кога видоа дека не можат да ја избегнат вистината и дека мора да се спасат, ВМРО-ДПМНЕ сега го користат Нацев како жртвено јагне, надевајќи се дека јавноста ќе заборави кој навистина е одговорен. Апсењето на Нацев прво е задоцнето, второ не е никаков доказ за правда, туку добро позната матрица на ВМРО-ДПМНЕ за да се спасат актуелните функционери од одговорност за трагедијата во Кочани.
Ексначалникот на СВР Штип, Дејан Салтировски и неговиот тогашен помошник, кои вечерта на трагедијата биле пред дискотеката „Пулс“ и не преземале ништо – се регрутирани во изборниот штаб на ВМРО-ДПМНЕ. Кого замајуваат во ВМРО-ДПМНЕ дека имало правда? Затоа се и изјавите на Мицкоски, полни со гнев и обвинувања кон родителите на жртвите во трагедијата, кои само бараат правда за своите деца и помош за повредените.
Глумењето правда, најавите за т.н. мега проекти, нападите кон СДСМ – нема да го смират гневот на граѓаните, на родителите кои изгубија деца.
Правдата ќе биде задоволена тогаш кога ќе има истраги и за оние кои денес се под закрила на Мицкоски, а не само селективни апсења и жртвени јагниња за лажна ПР-слика дека нешто се работи“, “, се вели во соопштението на СДСМ.