Македонија
(Видео) Арсовски: Македонија стана најпогодно тло за наркобизнисот

Република Македонија стана мека и медина за сите што се занимаваат со одгледување или продажба на дрога, односно канабис, рече денеска портпаролот на ВМРО-ДПМНЕ, Димче Арсовски.
„Веста што излезе низ медиумите дека во Република Македонија се увезени 8.5 тони марихуана, и тоа внимавајте од Лесото, една од најнеразвиените земји од Африка, во вредност од десетици милиони евра е показател за неколку работи. За тоа во што се претвори Република Македонија изминатите четири години под водство на Зоран Заев и СДСМ. Очигледно е дека Република Македонија под водство на Зоран Заев стана најпримамлива како држава за бизнисот со дрогата и канабисот“, додаде Арсовски.
„Очигледно е дека од 50-тина лиценци кои се дадени за одгледување марихуана во Република Македонија не функционираат сите фирми и полесно е да се увезува од странски земји, како на пример Лесото од Африка, земји кои се на најниско можно ниво во Африка и не се развиени, отколку самите фирми тука да произведуваат канабис. Сите оние лиценци хиперпродукција кои беа издавани од Владата и потпишувани лично од Зоран Заев, беа давани само поради тоа што беа платени кај пајташите на Зоран Заев за подоцна кога би се донел законот за трговија со канабис, којшто е сега предложен, да можат да ги препродадат истите лиценци, но, за нивна жал, а за среќа на граѓаните нема да дозволиме тој закон да се изгласа и да се донесе во Собранието“, истакна портпаролот на ВМРО-ДПМНЕ.
Според Арсовски, Зоран Заев претходно најавуваше инвестиции од типот на Гугл, Фејсбук и големи светски компании коишто едвај ги изговараше, а на крајот, како што вели, Република Македонија станала тло и Зоран Заев ѝ донел бизнис каде што се увезуваат 8,5 тони дрога.
„Во периодов актуелен е законот поднесен во Собранието од страна на Владата којшто треба да го брани Венко Филипче како најблизок на фамилијата Заеви во заштита на нивниот криминал за продажба и трговија со марихуана и тоа е со една и единствена цел, тоа што го прави Лесото од Африка да го прави на легален начин и семејството Заеви, бидејќи се најбројните сопственици на лиценци за одгледување канабис“, вели Арсовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Костадиноски: Продолжуваме да работиме со уште позасилено темпо за модерно Јегуновце со инвестиции во паркови, во спортот и во младите

Димитар Костадиноски, кандидат за градоначалник за општина Јегуновце од редовите на ВМРО-ДПМНЕ, на денешниот митинг одржан во рамките на изборната кампања, под слоганот „Вистинскиот избор! Твојот човек! Твоето место! За твојата иднина!“, ги истакна сите реализирани проекти за неговиот четиригодишен мандат во општина Јегуновце.
Костадиноски истакна дека во општина Јегуновце е регулирано речното корито на реката Вардар, отворени се две нови градинки, асфалтирани улици, и нови тротоари.
„Во изминатиот период го регулиравме речното корито на река Вардар, обезбедивме вода за пиење, изградивме фекални канализации во неколку населени места, отворивме две детски градинки, асфалтиравме локални улици, изградивме тротоари, им дадовме нов живот на училиштата, на парковите, но најмногу од се ја вративме надежта“, истакна Костадиноски.
Во новата програма Костадиноски потенцираше дел од важните проекти и тоа изградба на нови фекални канализации, нови улици, тротоари и земјоделски патишта за земјоделците, како и изградба на современи паркови.
„Во новата програма планираме да изградиме нови фекални канализации во останатите населени места, нови локални улици, тротоари и земјоделски патишта за нашите највредни земјоделци. Изградба на современи паркови опремени во сите стандарди, ќе продолжиме со инвестиции во образованието, културата и спортот, набавка на нови возила за собирање на комунален смет, противпожарно возило кое е потребно за сите жители на општина Јегуновце“, рече Костадиноски.
Македонија
Стојаноска: Вистинскиот избор на овие локални избори е бројот 9

Дафина Стојаноска, член на Извршниот комитет на ВМРО-ДПМНЕ на митинг во Јегуновце во рамки на кампањата за локалните избори која е под слоганот „Вистинскиот избор! Твојот човек! Твоето место! За твојата иднина!“ се осврна на работата на Димитар Костадиновски, кандидат за општина Јегуновце.
„Диме е неуморен, не се плаши од критика, од проблеми, напротив запознаен е со се и знае што може, а што не може и кажува зошто не може. Во Јегуновце нема неасфалтирана улица, нема дете што чека за упис во градинка“, рече Стојаноска.
Според Стојаноска Јегуновце може да стане привлечно место за сите посетители, за вкусна храна, центар за спортски настани.
„Диме добро знае што значи поддршка од централната власт. Тоа го виде во овие 15 месеци откако Влада е на ВМРО-ДПМНЕ, а поддршката за него и ќе продолжи во следниот период“, кажа Стојаноска.
Стојаноска упати пораки и до актуелниот и идниот градоначалник Костадиновски и до личностите кои се на советничката листа на ВМРО-ДПМНЕ за Советот во општина Јегуновце.
„Продолжи со исто темпо и продолжи ја својата приказна. Општината е доказ дека може да се успее, иста е и пораката и до советниците. Ние во ВМРО-ДПМНЕ успеавме поради истрајноста, упорноста, вербата и јасна визија за иднината. Советници следете ја јасната визија на градоначалникот сегашен и иден и јасната визија на претседателот Христијан Мицкоски“, заклучи Стојаноска.
Стојаноска повика и укажа дека вистинскиот избор на овие локални избори е бројот 9.
Македонија
Богдановски: Теарце добива нов резервоар за вода, мултифункционални игралишта и подобрување на патната инфраструктура

Томислав Богдановски носител на советничката листа на ВМРО-ДПМНЕ, за Советот на Општина Теарце, на денешниот митинг во општина Теарце, кој е во рамки на кампањата за локалните избори, и истата се води под слоганот ,,Вистинскиот избор! Твојот човек! Твоето место! За твојата иднина“, истакна дека Општина Теарце заслужува подобри услови за живот. Тој додаде и дека ќе се вложува во патишта, осветлување, училишта, спорт, култура и туризам и како што вели тој, никој нема да биде заборавен.
„Стојам пред вас како млад човек, носител на советничката листа на ВМРО-ДПМНЕ за Општина Теарце. Стојам со чисто срце, со јасна визија и со безрезервна волја да ја вложам целата своја енергија за подобрување на животот на секој жител во оваа општина“ рече Богдановски.
Тој истакна дека Непроштено има реална потреба од ново училиште за учениците кои учат на македонски јазик, како и од подобрување на општата инфраструктура, спортските и рекреативните површини, осветлувањето.
„Мојата најголема сила не доаѓа од функцијата, туку од вас, граѓаните. Јас ќе бидам тој што ќе го даде својот придонес за Непроштено да живее достоинствено, онака како што заслужува. Непроштено заслужува реновирано спортско игралиште, рекреативно катче за најмалите, модерна инфраструктура“, истакна Богдановски.
Богдановски додаде дека Лешок заслужува пристоен животен стандард преку обезбедување чиста вода за пиење, подобрена инфраструктура и улично осветлување, уреден влез во селото и безбедни патишта
„Лешок не заслужува да биде само убаво име на хартија, туку и место кое ќе биде центар на туризмот во Полошкиот регион“, кажа Богдановски и додаде:
„Ние сме 7 села со седум срца кои чукаат заедно. Јас нема да ве гледам како гласачи, туку како соработници. Ќе бидам тука не само пред избори, туку секогаш кога ќе треба . Го познавам секое село, секој сокак, секој проблем и заедно ќе ги решаваме. Со поддршка од централната власт и Владата предводена од премиерот Христијан Мицкоски, знам дека ќе успееме“.