Македонија
(Видео) Арсовски: СЈО нема повеќе кредибилитет

,,СЈО нема повеќе кредибилитет. Нема кредибилитет ниту Катица Јанева, ниту некој од обвинителите кои постапувале по нејзините насоки и молчеле за целиот криминалот кој што се случува, ниту пак истражителите и останатите вработени. Сите се дел од криминална мрежа”, изјави Димче Арсовски, портпарол на ВМРО-ДПМНЕ.
Според него, пред само два дена имавме можност во медиумите да прочитаме дека има отворен сомнеж за платен рекет од 260.000 евра од страна на Адријан Амзоски на хуманитарната фондација на Боки 13, а најверојатно за возврат Катица Јанева најпрвин преземала надлежност врз обвинение од основното јавно обвинителство, а потоа истото тоа обвинение, односно обвинителен акт го повлекла во една кривична постапка која се водела против истиот Адријан Амзоски.
,,Жалосно ни е ова што ни се случува, каде што Катица Јанева, Зоран Заев, Бојан 13 и сите околу нив биле недопирливи и вршеле тортури и рекет кон граѓаните. Класични и обични криминалци.Да одиме по ред, фактите и хронологијата велат вака:
Во март 2017 година е поднесен обвинителен акт од ОЈО против Адријан Амзоски и фирмата „ФИНЕ“ ДОО Скопје поврзана со изградбата на објектот „Космос“ каде што Адријан бил инвеститор. Се работи за нелегалностите во изградбата на објектот „Космос“ и обвинителниот акт бил во судот.Само една недела по доаѓањето на власт на СДСМ на 7-ми јуни, Бојан Јовановски односно Боки 13 го отвора „Меѓународен сојуз“ и на самото отворање се редат сите инволвирани во случајот „Рекет“ во моментот во кој што можеме да ги видиме и чуеме. Значи планот бил разработен, рекетарите подготвени, само требало основање, односно основачко собрание на пералницата на пари од рекет и целиот план да почне да функционира.
Еден месец после ова или три месеци после обвинителниот акт против Адријан Амзоски и фирмата „ФИНЕ“, се поднесува обвинение од страна на СЈО и Катица Јанева за случајот „ТНТ“ односно за случајот „Космос“.После низа пропусти во постапките кои се тераа од страна на СЈО, за кои што уште тогаш укажувавме и ние и експертите дека се случуваат и СЈО не си ја работи својата работа онака како што треба во името на правдата, Катица Јанева веќе во октомври месец бара стварна надлежност на предметот против Адријан Амзоски и добива решение, исто така под низа нејаснотии кои ќе треба да ги објасни, под изговор дека истиот тој предмет, односно обвинителниот акт против Адријан Амзоски и „ФИНЕ“ ДОО е надлежност на СЈО заради поврзаноста со случајот „ТНТ“.
Само една недела подоцна, Катица Јанева откако добива надлежност без никакво образложение, без ниту едно рочиште, без ниту еден доказ, без ниту еден сослушан сведок го повлекува обвинителниот акт врз Адријан Амзоски, токму тој практично е на слобода. Преседан на правото.Но, зошто сето ова го направила Катица Јанева? Одговорот го знае целата јавност. Откако сето ова се завршило во корист на Адријан Амзоски и на фирмата „ФИНЕ“ ДОО и откако Адријан Амзоски бил безбеден, фирмата „ДРИМ БИЛДИНГ“ од Струга, каде што овластено лице бил истиот тој Адријан, а брат му и татко му биле дел од сопствеништвото на фирмата, префрла 260.000 евра или 16.103.986 денари на „Меѓународен сојуз“ на Боки 13 за проект кој што никогаш не е реализиран”, вели Арсовски.
Според него, она што е интересно и зачудувачки е што фирмата „ДРИМ БИЛДИНГ“ во целата 2017 година остварила нето добивка од само 7.000 евра или 420.000 денари, а уплатила веќе во 2018 година кај Боки 13 260.000 евра. Целиот обрт на фирмата во 2017 не достигнува сума од 260.000 евра, туку нешто помалку од 230.000 евра или околу 14 милиони денари.
,,Дали некој од институциите кои што се нормално партизирани од страна на СДСМ и под палка на Заев, се позанимавал да провери од каде е потеклото на овие пари кои легнале во „Меѓународен сојуз“ кај Бојан 13, бидејќи гледаме дека фирмата има добивка од само 7.000 евра, и практично прашуваме и сите се интересираме од каде нашле уште 253.000 евра да префрли кај Бојан 13? На кој начин се уплатени истите пари?
Дали Адријан Амзоски платил 260.000 евра на Бојан 13 за Катица Јанева да му повлече обвинителен акт за кој сигурно ќе одговарал?Кои се причините заради кои Катица Јанева го повлекла овој обвинителен акт, т.е. причините ги видовме, најверојатно се тие 260.000 евра.
Дали Вилма Русковска и ОЈО веќе се занимаваат со овој случај каде што се зацрнети судбини на луѓе поврзани со случајот „ТНТ“ од страна на СЈО? Дали некој се занимава со овој платен рекет од 260.000 евра за повлекување на обвинение?
Сега гледаме дека се било шема од Катица Јанева, Заев и останатите за да се вршат притисоци и да се рекетираат пари.Додека Катица Јанева дивеела и рекетирале, луѓе лежеа по затвори невини.Затоа, како никогаш до сега потребно е оваа криминално – рекетарска група да влезе во затвор. Доста се одолговлекува, доста се закажуваа распити и слично, досега Катица Јанева требаше да биде во притвор. Затоа, како никогаш до сега потребни се предвремени парламентарни избори и потребна е обнова на Македонија која веднаш после падот на СДСМ од власт ќе почне и конечно државата ќе тргне на прав пат.Доволно е од рекет, доволно е од мито, доволно е од сите криминалии и лудории кои што ги прави оваа влада”, додаде Арсовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Македонија е тажна приказна, а Црна Гора е најблислку до членство во ЕУ, рече Марта Кос

Црна Гора останува најверојатниот кандидат од регионот на Западен Балкан кој може да стане нова членка на Европската унија за време на мандатот на сегашната Европска комисија, а по неа е Албанија, додека Северна Македонија е тажна приказна, изјави комесарот за проширување Марта Кос.
Кос во интервју за Радио Слободна Европа (РСЕ) појасни дека би било неуспех доколку ниту една нова земја не стане членка на ЕУ, а таа е сигурна дека тоа може да се направи.
„Можеме да го направиме тоа со Црна Гора. Сите поглавја се отворени, затоа ги затвораме за да можеме да го завршиме процесот на крајот на 2026 година од технички аспект“, рече Кос.
Таа предвиде завршување на преговорите со Албанија за 2027 година, но посочи дека е важно двете земји да продолжат со спроведувањето на реформите покрај завршувањето на техничкиот дел од пристапниот процес, бидејќи од тоа на крајот ќе зависи и одлуката дали една земја може да стане членка на ЕУ.
Таа не ја исклучи можноста Молдавија, па дури и Украина да станат дел од овој процес, па смета дека до 2029 година ЕУ би можела да има повеќе од две нови членки.
Таа имаше предупредувачки зборови за Србија, велејќи дека властите во земјата сега треба да докажат дека навистина се за европскиот пат, а потврди дека во Брисел со симпатии гледаат кон студентите кои протестираат барајќи реформи.
„Она што демонстрантите го бараат од српската влада е истото што Европската комисија го бара од Србија во преговарачкиот процес. Тоа се владеење на правото, борбата против корупцијата, јавните набавки, медиумското законодавство, изборното законодавство“, рече Кос.
Во однос на Косово, Европската комисија сега очекува формирање нова влада на прво место за да знае со кого ќе преговара, а Северна Македонија ја опиша како тажна приказна со оглед на тоа колку долго таа земја го чека преговарачкиот процес. Коментирајќи ја ситуацијата во Босна и Херцеговина, Кос рече дека во услови кога политичарите го напаѓаат уставниот поредок на таа земја, тешко е да се отворат преговори.
Македонија
ОПМ: Треба алатка за споредување на цените на производите за граѓаните да знаат каде може да ги купат поевтино, објавените списоци не се доволни

По објавувањето на списоците со цени на сите производи во маркетите, неопходно е да се направи нова алатка, која на потрошувачите ќе им овозможи да ги споредуваат цените на исти производи во разни маркети за да откријат каде им е најевтино да пазаруваат. Ваков став има претседателката на Организацијата на потрошувачите на Македонија (ОПМ), Маријана Лончар-Велкова. Кај нив засега нема поплаки од граѓани за непрегледно објавените цени на производите во маркетите, но сметаа дека начинот на кој цените на производите сега се објавени е збунувачки.
„Ако некој има намера да купи пет или шест производи, треба во сите тие списоци на производи што ги објавуваат да ги бара баш тие, да оди од маркет во маркет онлајн за да може да ги најде. Кога би имале една компаративна алатка, тоа би одело многу бргу. Сега со вештачката интелигенција би можело и побргу да се развие, да биде онлајн и да биде унифицирано. Сега не е унифицирано. Немаме по групи на производи, па по видови и така натаму, никаде не е исто и луѓето немаат ни време ни можност да споредуваат. Инаку, идејата е добра, ама треба таа идеја уште да се разработи. Кај нас има проблем што идеите ќе се дадат, сè ќе биде добро, меѓутоа не се развиваат, ова не е готово, ова е само почеток. Треба да се направи една алатка за компаративна споредба на производите каде може да се купат поевтино, а трговците да имаат меѓусебна конкуренција“, рече Лончар-Велкова одговарајќи на новинарски прашања за време на експертскиот форум во рамките на проектот „Јакнење на правата на потрошувачите во финансиските услуги“.
Заменик-министерот за економија и труд, Марјан Ристески, засега не може да каже дали објавените цени се прегледни или не и најави дека тоа ќе го сублимираат еден месец по имплементацијата на законската обврска за објава на цените на производите.
„Можеби ќе одиме на една генерална и општа веб-страница, која ќе биде понудена понатаму, или збирна информација, која ќе дава подобри резултати за да може граѓаните транспарентно да ги контролираат цените онаму каде што ќе купуваат“, рече заменик-министерот Ристески.
Трговците добија законска обврска на веб-страниците да ги обавуваат цените на сите производи што ги нудат од 18 април оваа година, а мерката ја предложи лично премиерот Христијан Мицкоски за да се заузда неконтролираниот раст на цените.
Македонија
За 1 мај локален краткотраен дожд

Времето за 1 мај, четврток, ќе биде претежно сончево со услови за краткотраен локален дожд и грмежи, информира УХРМ.
Утре ќе се задржи сончево и релативно топло време со мала до умерена облачност.
В четврток попладне и в петок ќе има услови за локален краткотраен дожд и ретки грмежи.
Ќе дува умерен северен ветер. Во деновите од викендот ќе биде стабилно, сончево и топло со мала до умерена облачност, а од почетокот на следната седмица се очекуваат повремени врнежи од дожд и појава на грмежи.