Македонија
(Фото+видео) Беснеат повеќе активни пожари во Македонија, познато каде е најсложено гасењето

Во текот на денешниот ден досега имаме 17 пожари на отворено и шумски пожари. Од нив, 6 се целосно изгаснати, додека 5 се под контрола, информира директорот на Центарот за управување со кризи, Стојанче Ангелов.
„Во моментов имаме 6 активни пожари. Првиот и најсложен пожар за гасење е на територијата на општина Македонски брод, во атарот на селата Тажево и Брезница, пожар којшто беснее повеќе денови. Дождот којшто денеска заврна во мала количина не го изгасна овој пожар и тој продолжува со горење. На ова место делува тимот од 40 лица од Унгарија, со специјални теренски возила, како и 50 припадници на македонската армија, поддржани со воздухоплови.
Вториот е на територијата на Пробиштип, поточно на Осоговски планини кој беснее во атарот на село Зелени Град, каде во овој момент дождот да помогне во активностите, но јас сметам дека врз овој пожар воспоставивме делумна контрола. На ова место дејствувавме со повеќе хеликоптери, колку што можевме максимум да испратиме.
На територијата на општина Демир Хисар, имаме пожар на Илинска планина. Многу непријатен пожар. Во текот на вчерашниот ден дејствувавме со ер-трактори, но се создаваше густ црн чад којшто го отежнуваше летањето и ја загрозуваше нивната безбедност, поради што моравме да прекинеме со гасење од воздух. Во овој момент таму дејствуваат сили од земја.
Кај село Пласница се гаси од земја.
Пожарот во близина на Охрид денеска повторно се реактивираше. Предизвикува вознемиреност кај населението, се движи во насока на Ресен, но не претставува закана по ниту едно населено место. Иако има повеќе од 100 луѓе кои гаснат од земја, поради ветерот се изгуби контролата.
Последниот е на територијата на Долнени, кај Лажани. Гори ниска вегетација и се гаси од земја“, изјави Ангелов.
Од Дирекцијата за заштита и спасување, пак, информираа дека тимовите на ДЗС заедно со 36 пожарникари со 8 возила од Тимот од Унгарија се ангажирани на повеќе локации во село Брезница, Македонски Брод.
Следен пресек на состојбата на пожарите ќе има после 18 часот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Милевски: Виница 4 години назадува, катастрофално владеење на Петков и ВМРО-ДПМНЕ

Така наречениот отчет на градоначалникот Миле Петков и ДПМНЕ е најдобар доказ за четири години катастрофално и досега невидено лошо владеење на една локална власт во Виница, изјави кандидатот на СДСМ за градоначалник на Виница, Гоце Милевски.
Наместо вистински отчет, додаде тој, видовме обид за замачкување на очите на јавноста и бегање од одговорност за неисполнетите ветувања.
„Затоа таканаречениот отчет беше во скап хотел а не на улиците, во градот и селата во Виница. Затоа што реалноста е разочарувачка. Ниту еден од капиталните проекти од програмата на Петков и ДПМНЕ за Виница не се реализирани“, рече Милевски.
Според Милевски, Петков се фалел со наследени проекти од претходната власт на СДСМ и неколку асфалтирани улици.
„Но фактите говорат: сегашната власт нема реализирано ниту 20 километри улици, наспроти 45 километри изградени во времето на СДСМ. Виница денес изгледа како мала депонија од не собереното ѓубре и смет, собирен центар за кучиња скитници, со небезбедни кратери од вода и хаос од неправилно паркираните возила, со запуштени зелени површини и ниту едно ново засадено дрво. Тоа сликата за Виница после 4 години неспособна локална власт на ВМРО-ДПМНЕ. Да не дозволиме оваа казна да продолжи уште четири години! Локалните избори се шанса за промени во Виница“, рече Милевски.
Македонија
Голема акција на Финансиската полиција: уапсени седум лица за даночни измами и перење пари, го оштетиле буџетот за 430 милиони денари

По двегодишна опсежна предистражна постапка, во текот на денешниот ден Управата за финансиска полиција спроведе акција во која беа извршени претреси на повеќе локации на подрачјето на општина Липково, Куманово и Желино.
Се работи за сложена предистрага, која опфаќа повеќе правни и физички лица, а целта е целосно разоткривање на криминална група, која дејстувала подолг временски период и имала цел вршење на кривичните дела злосторничко здружување, даночно затајување, даночна измама и перење пари и други приноси од казниво дело, со намера организаторите и припадниците на групата да стекнат противправна имотна корист во висина од над четиристотини триесет милиони денари, со што е предизвикана огромна штета на буџетот на Република Македонија.
По налог на јавен обвинител од Основно јавно обвинителство за гонење организиран криминал и корупција, во акцијата со асистенција на САЕ „Тигар“ од слобода се лишени седум лица и тие се изведени пред судија на претходна постапка при Основниот кривичен суд, а едно лице не е достапно на органите на прогонот.
Македонија
Утре сончево време, со температура до 34 степени

Времето утре ќе биде сончево со мала до умерена облачност. Попладне во источните делови ќе има услови за локален краткотраен дожд. Ќе дува слаб до умерен ветер претежно од јужен правец, информира УХМР.
Минималната температура ќе биде во интервал од 9 до 18, а максималната ќе достигне од 27 до 34 степени.
Во Скопје сончево со мала до умерена облачност. Ќе дува слаб до умерен ветер од југозападен правец. Минималната температура ќе се спушти до 14, а максималната ќе достигне до 32 степена.
До петок времето ќе се задржи претежно сончево и топло со постепен пораст на дневните температури. Ќе дува слаб до умерен ветер од јужен правец.
За време на викендот времето ќе биде променливо облачно и нестабилно со локален пороен дожд и грмежи. В сабота ќе дува умерен до засилен југозападен, а в недела ветерот ќе го смени правецот во северен.