Македонија
(Видео) „Бидете горди на вашите најблиски“ – Шекеринска се сретна со семејствата на мировниците
Министерката за одбрана, Радмила Шекеринска, и началникот на Генералштабот на Армијата, генерал-мајор Васко Ѓурчиновски, денеска имаа предновогодишна средба со семејствата на припадниците на АРМ, кои во моментот се дел од мисиите на НАТО, ООН и ЕУ во Авганистан, Либан и во Босна и Херцеговина, а беше воспоставен и видеолинк со македонските мировници во овие мисии.
„Оваа година беше многу важна за Македонија, за Министерството, за Армијата. Имавме огромен број средби, а првпат во нашата историја ни се случи генерален секретар на НАТО двапати да ја посети Македонија. Меѓутоа, ако ги анализирам сите средби што имав чест да ги имам како министер, најголем впечаток ми остави посетата на вашите најблиски во Кабул, а средба во која сите сме можеби најемотивни е денешната, каде што многу конкретно гледаме колку сè ризикуваат и од колку сè се откажуваат вашите најблиски“, рече министерката Шекеринска пред семејствата на мировниците.
Шекеринска истакна дека семејствата на мировниците во Министерството и во Армијата секогаш ќе имаат адреса и луѓе на кои може да се потпрат.
„Центрите за транзиција, кои веќе постојат во Армијата и Министерството за одбрана, ќе направиме да бидат центри за прва поддршка на сите семејства и затоа денеска кога ќе заврши убавиот, ќе продолжи корисниот дел од средбата, каде што ќе разговарате со колегите од Министерството и АРМ како семејствата да бидат повеќе помогнати додека вашите блиски се надвор, во мисија. Ние сме свесни дека еден татко или мајка, сопруг, сопруга, син или ќерка да може спокојно да врши многу тешка работа, прво што треба да му помогнеме е да не се грижи за своите најблиски“, рече Шекеринска.
Генералот Ѓурчиновски им оддаде признание на македонските мировници за професионализмот и резултатите постигнати во мировните мисии. „Продолжете достоинствено и мотивирано да ги претставувате интересите на нашата земја и бидете горди дека ова е историски момент во кој Република Македонија е на прагот на влезот во НАТО“, рече началникот на ГШ на АРМ.

Преку видеолинкот најстариот претставник на македонскиот контингент во Авганистан, полковникот Љупчо Јовановски, порача дека сите припаднци на АРМ во мисијата „Одлучна поддршка“ се здрави и живи и задоволни што ја имаат можноста да ги видат своите најблиски. Полковникот Јовановски, како и мировниците на АРМ во Либан и во БиХ, мајорот Атила Аго и мајорот Маријан Златановски, им ги честитаа Новата година и претстојните празници на семејствата на сите мировници во мисиите во Авганистан, Либан и во Босна и Херцеговина.
По средбата, стручни лица од Министерството и Армијата разговараа со семејствата на мировниците, им дадоа поддршка во делот на функционирањето на семејството во отсуство на еден родител, како и обединувањето на семејството по враќањето на мировникот од мировна мисија, а го презентираа и правилникот за начинот на грижа за семејствата на воениот и цивилен персонал упатен во активности надвор од нашата држава.
Најмладите, децата на мировниците, беа среќни од присуството на Дедо Мраз, кој им подели новогодишни пакетчиња.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски: Без разлика на етничката, верската и политичката припадност, на 2 ноември да се обединиме во Кичево
После вториот круг очекувам 59 градоначалници да има коалицијата предводена од ВМРО-ДПМНЕ, со што ќе ја заокружиме највисоката бројка во историјата на демократската Македонија, по бројот на градоначалници, којашто некогаш се случила. И ако на тоа се додаде и извесната победа на Орце Ѓорѓиевски за град Скопје, којшто води 3:1 после првиот круг во однос на неговиот противкандидат, тогаш заокружуваме бројка од 60 градоначалници коишто ќе дојдат од коалицијата предводена од ВМРО-ДПМНЕ, вклучително и главниот град, рече претседателот на ВМРО-ДПМНЕ, Христијан Мицкоски на вечерашниот мини митинг во Кичево во рамките на изборната кампања под слоган „Вистинскиот избор! Твојот човек! Твоето место! За твојата иднина!“ за вториот круг од локалните избори на 2 ноември во недела.
Мицкоски се осврна и на победата на коалицијата предводена од ВМРО-ДПМНЕ за листите на советници во 58 општини.
Додаде дека не било лесно, туку дека било тешко, но единството и поддршката на граѓаните покажале дека може да се совлада и помногуброен противник.
„Затоа е многу важно на 2 ноември во недела да се обединиме овде во Кичево, без разлика на нашите различности, без разлика дали тие различности се етнички, верски или политички. Многу е важно да бидеме како едно, да се обединиме околу вредностите коишто ги споделуваме, да се обединиме околу цивилизацијата којашто ја застапуваме. Затоа што јас сум убеден дека против кандидатот на Александар не ги споделува нашите вредности, не ја споделува нашата цивилизација. И секој оној којшто ќе го земе пенкалото во рака и ќе застане позади гласачката кутија, со гласачкиот лист пред него, нека го слуша својот разум и своето срце и нека гледа длабоко во својата душа, од таму ќе извира бројот 9. И нека го заокружи бројот 9, нека заокружи за Александар“, повика Мицкоски.
Секој оној кој ќе биде исправен пред предизвикот дали да го поддржи Александар или неговиот против кандидат, додаде Мицкоски, нека се присети на вредностите кои ги застапува Александар и вредностите кои ги застапува неговиот против кандидат.
„Дали вие сакате да живеете во средина во којашто ќе владеат криминалот, блуд, разврат и уцени? Дали сакате Кичево да биде домаќин на блуд, разврат, криминал и уцени? Заборавете на етничката припадност, сетете се на вашите ќерки, на вашите внуки, дека некоја од нив може да биде жртва на овој човек. Затоа, кога ќе го имате пенкалото во рака, верувајте во вредности, не во басни, не во приказни. Заборавете на нешто што некој ви кажува дека се случило пред 4, 5, 6 децении, верувајте на оние коишто ви кажуваат што ќе се случува за четири, пет децении од денес. Заборавете на оние романтични приказни што некој ви ги кажува за некое измислено минато коешто никогаш не се случило. Верувајте на иднината којашто сите ние заедно Македонци, Албанци, Турци, Роми, Срби, Власи, Бошњаци и останати ќе ја градиме. Тоа е иднината на Македонија“, упати Мицкоски обединувачка порака и повик до сите етнички заедници.
Македонија
Николоски: Скопје од денеска директно се поврзува со шпанската престолнина Мадрид
Скопје од денеска директно се поврзува со шпанската престолнина Мадрид, авиолинија која е една од дваесетте авиолинии што ги воведовме во изминатата година, истакна вицепремиерот и министер за транспорт Александар Николоски, кој заедно со амбасадорот на Шпанија во Македонија, Рафаел Сориано Ортиз и Неџат Курт, генерален директор на ТАВ Македонија, го означија првиот лет Скопје-Мадрид.
Николоски потенцираше дека ова е огромен успех за авиосообраќајот, бидејќи со воведувањето на новите линии се забележува и значителен раст на патници и туристи во Македонија.
„Многу ми е драго што денеска почнува директна линија помеѓу Скопје и Мадрид, ги поврзуваме двата главни града, главниот град на Кралството Шпанија и главниот град на Македонија, нешто што е многу значајно, за развојот на туризмот, за развојот на бизнисот и за размената помеѓу двата народи, размената во културата, нешто што навистина многу значи“.
Од минатата година кога беше избрана оваа Влада до денес, додаде тој, отворена е 21 нова дестинација.
„Од Париз, од “Орли” се лета за Скопје, од Истанбул се лета за Охрид, од Дубаи ќе почне да се лета за Скопје оваа зима, од Барселона, од Лион, од Амстердам и од Љубљана се лета за Скопје, тука се чартерите на “Фрибрд Ерлајнс” кои што секој ден слетуваат на скопскиот аеродром, кои за скоро ќе бидат и по два дневно. До Охрид почна да се лета од Базел, Ларнака, Мадрид, Штутгарт, Бари, Стокхолм на главниот аеродром почнуваат овие денови. Понатаму, ја отвараме Женева, Келн, многу значајно за мене Прага, а веќе од пролет Неапол-Италија, Будимпешта-Унгарија, Катовице и Вроцлав до Охрид, и Милано исто така до Охрид.
Вкупно 21 нова дестинација, 21 нова линија, за зголемување на бројот на туристи и повеќе бизнис во Македонија. Сакам да се заблагодарам на директорот на ТАВ на неговиот тим, за одличната соработка која што ја имаме, да се заблагодарам на амбасадорот на Шпанија и да најавам дека ќе има уште дестинации од Шпанија, Барселона и Мадрид нема да се последни” истакна вицепремиерот Николоски
Македонија
Утре наутро претежно ведро и студено, преку денот сончево
Утре наутро ќе биде претежно ведро и студено, преку денот сончево со мала до умерена облачност. Ќе дува слаб ветер од јужен правец.
Минималната температура ќе биде во интервал од -4 до 4, а максималната ќе достигне од 15 до 20 степени.
Во Скопје, сончево со мала до умерена облачност. Ќе дува слаб ветер од југоисточен правец. Минималната температура ќе се спушти до 2, а максималната ќе достигне до 16 степени.
Во наредните денови следува период на стабилно и суво време. Претпладне по одделни котлини ќе има услови за појава на магла или ниска облачност. Поради разведрувањето утринската температура наместа ќе се спушти под нулата, а дневната ќе бележи тенденција на благ пораст.

