Македонија
(Видео) Васев: ВМРО-ДПМНЕ го раскрчми имотот на АД „Славија“

Раскрчмувањето на АД „Славија“ го направи ВМРО-ДПМНЕ, изјави на денешната прес-конференција Стефан Васев од СДСМ.
Тој додаде дека во ВМРО-ДПМНЕ и нивните влади од 2012 до 2017 година лежи целата вина за раскрчмувањето на имотот на АД „Славија“.
„Факт е дека ВМРО-ДПМНЕ целосно ја обезвреднила АД ‘Славија’ и го раскрчмила нејзиниот имот. Тоа што ВМРО-ДПМНЕ упорно со денови сака да ја манипулира јавноста е провиден обид за бегање од одговорноста и нереално префрлање вина на некој друг. Дека целосно се загубија во овој неуспешен обид, говорат и разните бројки што секојдневно ги пласираат. Прво, според нив, ‘Славија’ вредеше 20 милиони евра, па ја спуштија процената на 13, па на 9, а денеска е 4 милиони евра. Во својата произволна математика не споменуваат ниту дека компанијата е оптоварена со долгови“, изјави Васев.
Како што истакна Васев, во периодот од 2012 до 2017 година ВМРО-ДПМНЕ распродала над 70 % од имотот на АД „Славија“. Со тајни продажби, зад затворени врати, по неповолни и ниски цени се распродавани десетици дуќани и најатрактивни локали, некогашни маркети на „Славија“ во Скопје и во целата држава, кои денес се сопственост на приватни компании.
Наместо да шири лаги, ВМРО-ДПМНЕ треба да им објасни на граѓаните зошто за 12 години не го решила проблемот со „Славија“, туку распродала две третини од нејзиниот имот, додава Стефан Васев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Бројот на вработени намален за 17.000 – погубни економски политики на ВМРО-ДПМНЕ

Фрапатни се податоците кои покажуваат дека по доаѓањето на ВМРО-ДПМНЕ на власт во 2024 година во земјава има над 17.000 помалку вработени, обвини СДСМ.
Според партијата, тоа е директен резултат на погубните економски политики, хаосот и несигурноста, како и напуштање на политиките кои ги востастави СДСМ за стабилна и одржлива економија.
„Со оваа неспособна Влада: пазарот на труд се стеснува, продуктивното население е разочарано и заминува, Фондот за пензиско осигурување е под притисок, бидејќи денес 1,63 вработени обезбедуваат една пензија, наместо 1,74 како што беше пред само една година. Владата нема стратегија, нема визија, нема мерки за задржување и отворање на нови работни места“, велат од СДСМ.
Од таму обвинија дека ова се последици од владеењето на Мицкоски и дека се зголемува несигурноста за младите, пензискиот систем се доведува во ризик, а приватниот сектор е оставен сам да се снаоѓа.
Македонија
Регионална иницијатива за превенција од пожари на Западен Балкан

Во услови на зголемени ризици од пожари, започна регионална иницијатива за подигање на свеста за управување со пожари на ниво на предел во земјите од Западен Балкан. Иницијативата, поддржана од Министерството за земјоделство, шумарство и водостопанство, има за цел да го поттикне интегрираното и одржливо управување со екосистемите, наместо традиционалниот пристап што се фокусира исклучиво на гаснење.
Пожарите оставија сериозни последици врз природата, економијата и животот на граѓаните, а над 90% од нив се предизвикани од човечка невнимателност — факт што укажува дека превенцијата е клучна.
Преку интерсекторска соработка, јакнење на локалните капацитети и активности на терен, иницијативата тежнее да создаде предели и заедници отпорни на пожари.
„Природата е наша заедничка одговорност. Со здружени напори можеме да постигнеме нула пожари предизвикани од човечки фактор,“ велат од Министерството.
Македонија
Гром го предизвикал пожарот во велешката фабрика, велат од „Мирана“

Удар од гром е причината за пожарот што синоќа избувна во дел од производствениот погон на „Биокосмос“ во Велес, информираат од компанијата „Мирана“ преку официјално соопштение.
Од ударот се оштетени дел од просториите на „Биокосмос“ и, како што посочуваат од таму, тие привремено ќе бидат надвор од употреба додека не се санира штетата.
Фабриката „Мирана“, која се наоѓа во истиот индустриски комплекс, не била зафатена од пожарот и производствениот процес таму продолжува непречено.
Во пожарот нема повредени лица.
Центарот за управување со кризи претходно денес информира дека пожарот бил целосно локализиран рано утрово, околу 4 часот. Според информациите на ЦУК, огнот зафатил магацински простор со фрижидери и канцеларии со документација, а на неколку места сè уште се забележува слабо чадење.
Иако пожарот е ставен под контрола, службите сè уште се на терен за да спречат повторно разгорување, со оглед дека на одредени локации сè уште се јавуваат чадења.