Македонија
(Видео) ВМРО-ДПМНЕ поднесе кривична пријава против Заев поради поткуп при избори
ВМРО-ДПМНЕ достави кривична пријава во Јавното обвинителство против премиерот Зоран Заев, поради јавен повик на поткуп при избори. Димитар Димовски, член на ИК на ВМРО-ДПМНЕ, изјави дека партијата доставила кривична пријава во Јавното обвинителство којашто веќе ја најавија во саботата на прес-конференција против премиерот Зоран Заев, којшто јавно на митинг во Крива Паланка повикал на поткуп при избори, што е спротивно на член 160 и чл.162 од Кривичен законик, и тоа е казниво дело.
,,Ја поднесовме кривичната пријава од причина што јавниот обвинител не постапи согласно со своите надлежности коишто се предвидени во чл. 39 од Законот за кривична постапка, односно не отвори постапка против Зоран Заев по јавно допрен глас.Во склоп на кривичната пријава го доставивме и видеоматеријалот на кој се слуша како Зоран Заев јавно повикува на поткуп, каде што се слуша дека признава дека еден бизнисмен, односно сопственикот на ‘Минстрој’, веќе му ветил дека ќе ги награди работниците доколку излезат на претстојниот референдум. Целта ни е да докажеме дека никој не е над законот па ниту Зоран Заев”, изјави Димовски.
Според него, граѓаните на Република Македонија се слободни при својот избор, при донесувањето на своите одлуки, и никој ама никој не може да ги натера со сила, со поткуп, со уцени или со закана да излезат да гласаат на претстојниот референдум или, пак, на кои било избори. Туку тоа свое право, коешто е демократско право, загарантирано право, свето право можат да го искористат единствено самите согласно со сопствената одлука.
,,Исто така, бидејќи сме овде, би сакал да му кажеме на јавниот обвинител дека до денеска немаме одговор, еве од 5 јули е поднесена кривична пријава против Зоран Заев – премиерот на Република Македонија, Никола Димитров – министер за надворешни работи на Република Македонија, Талат Џафери – претседател на Собранието на Република Македонија, Артан Груби – претседател на Комисијата за европски прашања и уште 67 пратеници по 4 основи од Кривичниот законик, и тоа велепредавство, загрозување на независноста, здружување заради непријателска дејност и злоупотреба на службена положба. Помина повеќе време, поминати се еве речиси два и пол месеци и немаме никакво известување што се случува со кривичната пријава што ВМРО-ДПМНЕ ја поднесе”, додаде Димовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски: Не е точно дека постои разговор за коалиција со Рамиз Мерко, не преговарам со луѓе на црна листа на САД
Не е точно дека постои разговор за коалиција со Рамиз Мерко, не преговарам со луѓе на црна листа на САД, изјави претседателот на ВМРО-ДПМНЕ, Христијан Мицкоски, денес одговарајќи на новинарско прашање во врска со шпекулациите објавени на одредени портали за наводна коалиција со Рамиз Мерко.
„Тоа се портали кои, претпоставувам, се финансирани од еден ист центар, којшто сега е разочаран бидејќи Рамиз Мерко не ги поддржува ДУИ во вториот круг. Претпоставувам сега за да најдат противтежа, како да направат сензација за да ја потонат таа вест, вадат во јавноста комплетна невистина. Многу пати во минатото ние сме го кажале нашиот став за Рамиз Мерко, така што, ете оставам на тој начин да прават и креираат сензација, иначе апсолутно е неточно“, вели Мицкоски.
Македонија
Јаневска: Експанзијата на академскиот простор донесе квантитет, но не и квалитет, затворени 14 приватни научни институти и еден приватен факултет
Важно е да разговараме за квалитетот на нашето високо образование, но и да преземаме конкретни активности за негово континуирано подобрување, усогласување со европските стандарди и приближување кон реалните потреби на пазарот на труд и општеството во целина, рече министерката за образование, Весна Јаневска, во обраќањето на Првиот годишен форум за квалитет во високото образование, што го организираше Универзитетот „Свети Кирил и Методиј“ во Скопје.
Јаневска посочи дека оваа Влада е свесна за итноста од реформирање на највисокиот степен на образование и затоа презема конкретни мерки и активности насочени кон системски промени.
„Активно работиме на подготовка на нови законски решенија за високо образование и за научно истражувачка дејност. Законите, сами по себе, не можат да однесат универзитет повисоко на Шангајската листа, но, ако академската заедница прво се вклучи во нивното носење а потоа и ги почитува, ќе може да изградиме поквалитетно високо образование“, нагласи министерката Јаневска.
Во обраќањето, Јаневска укажа на конкретните чекори што ги презема Министерството за образование и наука за унапредување на научната продуктивност и интеграција на македонската академска заедница во глобалниот истражувачки простор. Научните бази Web of science и Scopus од оваа година се бесплатно достапни за професорите, научниците и студентите на јавните универзитети. Зголемен е буџетот за наука од 380 на 680 милиони денари, и годинава за прв пат по повеќе години, преку три повици беа доделени 374 милиони денари за научно – истражувачки проекти на јавните високообразовни и научни установи, на МАНУ и бизнис заедницата. Академскиот кадар е високо почитуван, а платите на универзитетските професори од јануари се зголемени за 14%.
„Експанзијата на академскиот простор донесе квантитет, но не и квалитет. Спроведовме сериозни контроли на високообразовните и научните установи, а резултатот е: затворени 14 приватни научни институти и 1 приватен факултет, поради констатирани нерегуларности во работењето и непостапување по дадени забелешки на просветна инспекција и МОН. Ова не е кампања, туку ќе биде континуирана активност“, прецизира министерката Јаневска, додавајќи дека ќе следи реформа на Агенцијата за квалитет на високото образование, како и формирање на првиот државен научно-технолошки парк во Македонија.
„Работиме, но Владата и Министерството не можат сами да изградат образовен систем што ќе биде квалитетен, препознатлив и посакуван. Неопходна е решителност и иновативност што ќе ја покажат универзитетите, а ние ќе им бидеме силен поддржувач и партнер“, рече Јаневска, упатувајќи повик до сите универзитети да ги забрзаат реформите, почнувајќи од модернизирање на студиските програми, поврзување со други универзитети, развивање заеднички програми и двојни дипломи, со цел студентите да добијат глобални перспективи.
Македонија
Почина Коста Јаневски, еден од основачите на радиото „Антена 5“
По кратко боледување, на 65-годишна возраст почина Коста Јаневски, филмски работник и еден од сопствениците и основачите на радиото „Антена 5“.
Учествуваше во основањето, техничкиот развој и во креирањето на програмата, а ја извршуваше функцијата технички директор во „Антена 5“ од 1994 година.
Работеше на техничката и на програмска реализација на сите домашни и меѓународни музички и културни настани пренесувани на програмата на „Антена 5“: Британските музички награди, Европските музички награди Ем-ти-ви (MTV ЕМА), Зимската музичка конференција во Мајами, Викенд „Медија фестивалот“, „Егзит“, „Таксират“, Интернационалниот фестивал на филмската камера „Браќа Манаки“ и „Д фестивал“ во Дојран.
Пред основањето на „Антена 5“, беше дел од програмата Радио Микс на Радио УНО и проектот „Радиотоп-листа на Македонија“.
Дипломира на Електротехничкиот факултет. Својата кариера како филмски работник ја почнува во осумдесеттите години како монтажер на тон и тон снимател. Во 1985 година работеше како слободен филмски работник во Друштвото на филмските работници на Македонија, а од наредната година работи во продуцентската куќа „Вардар филм“. Во текот на својата кариера учествуваше во реализација на филмски проекти од домашна продукција и од странски копродукции, голем број играни, документарни, краткометражни и долгометражни филмови, како „Македонска сага“, „Среќна Нова ‘49“, „Тетовирање“ и многу други.
Беше член на Друштвото на филмските работници на Македонија и член на Здружението на тонските сниматели на Македонија. Погребот ќе биде во вторник во 11.30 на Градските гробишта „Бутел“ во Скопје.

