Македонија
(Видео) Во Владата презентирани приоритетите на Романија како претседавач со Советот на ЕУ

Денешната редовна 116. седница на Владата почна со презентација на приоритетите на Романија за време на претседателството со Советот на Европската Унија. На седницата, на која присуствуваше и амбасадорот на ЕУ во нашата земја, Самуел Жбогар, столбовите, што како приоритети си ги постави Владата на Романија за време на своето претседавање со Советот на ЕУ, ги презентира Виорел Станила, амбасадор на оваа земја во Република Македонија, кој нагласи дека тие столбови произлегуваат од динамичната сила на ЕУ што ѝ ја даваат нејзините вредности.
Премиерот Зоран Заев на почетокот на седницата упати честитки до амбасадорот Станила за романското преземање на Претседавањето со Советот на ЕУ и истакна дека Романија го презема претседавањето со Советот на ЕУ во исклучително значаен период особено имајќи го предвид фактот што за време на претседавањето ќе се одржат европските избори кои ќе ја постават иднината на ЕУ, но и ќе ја трасираат идната патека на политиката за проширување.
„Изразуваме искрена благодарност што во приоритетите на романското претседателство се предвидува и забрзување на интеграцијата на Западен Балкан во ЕУ. Политиката на проширување на ЕУ, и покрај сите предизвици на глобален план, останува најефикасниот инструмент за гарантирање на мирот, стабилноста и просперитетот во Западен Балкан. Затоа, го цениме фактот што Романија ја препознава важноста на политиката на проширување и се обидува да го доближи Западен Балкан уште поблиску до ЕУ“, рече премиерот Заевво своето обраќање.
Тој потенцира дека нашата земја со внимание ги следи подготовките за Самитот на ЕУ во Сибиу (9 мај 2019 година), кој ќе се однесува на иднината на ЕУ и од кој нашите граѓани очекуваат силна порака до земјите од Западен Балкан дека на нашиот регион се гледа како на дел од ЕУ во идната Европа.
Од презентацијата на амбасадорот Станила, приоритетите што денеска беа претставени ги опфаќаат „Европа на патот кон раст, кохезија, конкурентност и поврзаност“, потоа „Безбедна Европа“, „Европа како посилен глобален играч“ и „Европа на заеднички вредности“. Политиките на Европската Унија на интегрирање на Западен Балкан во нејзините структури остануваат приоритет на Владата на Романија во наредните шест месеци во столбот „Европа како посилен глобален играч“.
Амбасадорот Станила во својата презентација нагласи дека политиките на проширување со земјите членки на Западен Балкан остануваат стратешки интерес на ЕУ поради што фокусот на европската поддршка на регионот ќе се задржи на зајакнување на демократските процеси и на помирувањето.
Амбасадорот на ЕУ во нашата земја, Самуел Жбогар, земајќи збор на оваа седница на Владата на РМ, потенцира дека овој владин состав направи Република Македонија да го дочека романското претседавање со Советот на ЕУ со историското достигнување со договорот од Преспа и со решавањето на спорот со Грција и на тој начин ја доближи земјата како никогаш досега до портите на ЕУ. Амбасадорот Жбогар додаде дека успехот на Република Македонија е силна порака за регионот, но и за Европа, дека нема нерешливи прашања со храбри и посветени лидери.
На седницата, на која првата точка беше посветена на приоритетите на Романија за време на претседавањето со Советот на ЕУ, се обратија и заменик-претседателот на Владата на РМ, Бујар Османи, и министерот за надворешни работи, Никола Димитров.
Османи, меѓу другото, се задржа на мотото на романското претседавање – „Кохезијата, заедничка европска вредност“ и истакна дека тоа во целост ги одразува и нашите аспирации кон градење современо демократско општество преку кохезија и почитување на европските вредности како универзални, кои, пред сè, на прво место ги ставаат човекот и неговата добросостојба и додаде дека се фактор за кој се обединети сите во земјата и за кои нема алтернатива.
Министерот за надворешни работи, Никола Димитров, во своето обраќање нагласи дека тајмингот за Република Македонија во претстојниот период најавува успешна година, година во која ќе треба да се жнеат плодовите што доаѓаат како резултат на активностите во минатата година кога како земја со длабока политичка криза донесовме одлука да се соочиме храбро и одлучно да решаваме децениски проблеми, да ги решиме сами и да бидеме модел за другите. Министерот Димитров потсети дека Европскиот совет ни го отвори патот, но дека наша задача сега е да ги завршиме реформите и да создадеме атмосфера за да биде оневозможно во јули оваа година Република Македонија да не биде прифатена како земја што ги почнува преговорите со ЕУ. Понатаму, Владата продолжи со работата според дневниот ред утврден за својата редовна 116. седница.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Утре променливо облачно и посвежо време со врнежи од дожд

Времето утре ќе биде променливо облачно и посвежо со повремени врнежи од дожд. Ќе дува умерен до засилен ветер од југоисточен правец, информира УХМР.
Локално врнежите ќе бидат поројни и пообилни (над 20 l/m²), проследени со појава на грмежи и засилен ветер. Минималната температура ќе биде во интервал од 9 до 18, а максималната ќе достигне од 17 до 24 степени.
Во Скопје, променливо облачно со повремени врнежи од дожд. Во делови од котлината ќе биде нестабилно со пороен дожд и услови за појава на грмежи. Ќе дува умерен до засилен југоисточен ветер. Минималната температура ќе се спушти до 17, а максималната ќе достигне до 24 степени.
Под влијание на циклонска активност до понеделник времето ќе биде променливо облачно и посвежо со повремени врнежи од дожд. Локално врнежите ќе бидат поројни и пообилни (над 20 l/m²), проследени со грмежи и засилен ветер.
Дневната температура ќе опадне за 8 до 10 степени во однос на денешната.
Македонија
Сиљановска – Давкова: Одржливиот мир на Блискиот Исток мора да се постигне единствено преку дијалог и дипломатија

Одржливиот мир на Блискиот Исток мора да се постигне единствено преку дијалог и дипломатија, рече претседателката Гордана Сиљановска-Давкова на генералната дебата на 80. Сесија на Генералното собрание на Обединетите Нации во Њујорк.
„Блискиот Исток има древна и богата традиција на меѓурелигиски и меѓуетнички соживот. Историјата покажа дека различноста кога се почитува, може да биде извор на културно збогатување и долгорочен мир. Но, исто така, историјата учи дека насилството, без оглед на неговото потекло, ги продлабочува поделбите, го продолжува човечкото страдање и ги оддалечува страните од праведно и сеопфатно решение. Убедени сме дека одржливиот мир на Блискиот Исток мора да се постигне единствено преку дијалог и дипломатија, во согласност со меѓународното право“, рече претседателката.
Таа додаде дека непрокосновеноста на човечкиот живот и достоинство мора да се почитуваат, дури и за време на војна, во согласност со меѓународното хуманитарно право.
„Во тој дух, ја реафирмираме нашата поддршка на меѓународните напори насочени кон деескалација, инклузивен дијалог и директни преговори“, рече Сиљановска – Давкова.
Македонија
По 80 години од основањето, крајно време е за жена Генерален секретар на Обединетите нации, изјави Сиљановска – Давкова

По 80 години од основањето, крајно време е за жена Генерален секретар на Обединетите нации, рече претседателката Гордана Сиљановска-Давкова во своето обраќање на генералната дебата на 80. Сесија на Генералното собрание на Обединетите Нации во Њујорк
„Следната година ќе бираме нов Генерален секретар на Обединетите нации. Потребна ни е личност со лидерски вештини, со богато дипломатско искуство, со способност да ги премостува разликите и да гради консензус, но и да биде длабоко хумана и посветена на ранливите. Идниот прв дипломат на светот мора да има многу знаење, трпение и такт. По 80 години од основањето, крајно време е за жена Генерален секретар на Обединетите нации. Во свет доминиран од силни мажи, често со оружје, потребни ни се силни жени со мудрост и емпатија. Верувам дека жените, кои, заедно со децата се најголемите и најбројни жртви на војните, имаат неотуѓиво право и обврска да посегнат по нивна превенција“, рече претседателката.
Таа кажа дека анархичниот меѓународен поредок е закана за сите, а најмногу за малите држави и дека е природно малите и средни држави да бидат најголемите поддржувачи на реформите на Обединети нации.
На крајот на своето обраќање, Сиљановска – Давкова рече дека светот се наоѓа пред голем испит.
„Пред голем испит сме: или ќе го гарантираме меѓународен поредок врз визионерски принципи, или ќе итаме кон катастрофа со несогледливи размери за човештвото. Поранешниот Генерален секретар Даг Хамершелд потсети дека „Обединетите нации не се формирани за да нè однесат во рајот, туку за да нè спасат од пеколот. […] Треба да ги препознаеме Обединетите нации за она што се – навистина несовршен, но неопходен инструмент на нациите во работењето за мирна еволуција кон поправеден и побезбеден светски поредок.“ Да им ја дадеме таа шанса“, рече претседателката.