Македонија
(Видео) Почна лидерската средба меѓу претседателите на политичките партии

Денеска напладне во Собранието почна лидерска средба на претседателите на парламентарните партии, на покана од претседателот на Владата Димитар Ковачевски.
На лидерската средба којашто со свое обраќање ја отвори премиерот Ковачевски ќе се дискутира за европската иднина на Македонија, како и за одлуките кои во наредниот период треба да се донесат во Собранието со широк политички и општествен консензус.
На средбата присуствуваат претседателот на Собранието, Талат Џафери, претседателот на „ВМРО-ДПМНЕ“, Христијан Мицковски, претседателот на Демократската унија за интеграција, Али Ахмети, претседателот на Алијанса за Албанците, Арбен Таравари, претседателот на Алтернатива, Африм Гаши, потпретседателка на Либерално демократска партија, Моника Зајкова, претседателот на Нова социјалдемократска партија, Горан Мисовски, претседателот на Социјалистичка партија на Македонија, Љупчо Димовски, заменик-претседателот на „ВМРО–НП“, Љупчо Балковски, претседателката на Демократска обнова на Македонија, Маја Морачанин, претседателот на Граѓанска опција за Македонија, Стевчо Јакимовски, претседателот на Партијата на пензионерите, Илија Николовски, заменик-претседателот на Партија за движење на Турците во Македонија, Џабир Доко , претседателот на Демократска партија на Турците на Македонија, Бејџан Иљас, претседателот на Демократски сојуз, Павле Трајанов, претседателот на Српска странка во Македонија, Мирослав Јовановиќ, претседателот на Демократска партија на Србите во Македонија, Иван Столковиќ и претседателот на Демократската партија на Албанците, Мендух Тачи.
Целта на лидерската средба е во правец на обезбедување поддршка од страна на парламентарните партии со цел носење брзи и ефикасни одлуки во Собранието. Дел од темите за дискусија се скрининг-процесот со ЕУ, сите клучни аспекти коишто се однесуваат на интегрирањето на државата во ЕУ, како и актуелната состојба со енергетската криза и мерките што ги презема Владата за справување со кризата, информираат од Владата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ЦУК: Пожарот во Самоков веднаш изгаснат, објектите на фабриката не беа во опасност

Пожарот во Самоков е локализиран и веднаш изгаснат. Во ниту еден момент немаше опасност од негово ширење кон објектите на фабриката Самоков, соопшти Центарот за управување со кризи.
Од РЦУК Македонски Брод претходно стигна информација дека е настанат пожар во населбата Самоков, во фабриката „Сувенир“, а опожарен е магацин со хемикалии. Во информацијата беше наведено дека електричната енергија во фабриката е исклучена.
Македонија
„Седи Боби, кец!“, му рече Арсовска на Стефковски за проблемот со водата, па доби одговор

Градоначалничката на Град Скопје, Данела Арсовска, преку објава на својот официјален профил на Фејсбук, му возврати на градоначалникот на општина Гази Баба, Бобан Стефковски, кој претходно ги прозва Градот и ЈП „Водовод и канализација“ – Скопје, за прекините во водоснабдувањето во неколку скопски населби. Тој побара итна интервенција од Градот, предупредувајќи на можни протести ако состојбата не се реши веднаш.
Арсовска му одговори на Стефковски дека и по три години на функција сè уште не прави разлика што е во надлежност на Градот, а што на Општина Гази Баба. Таа појасни дека жителите на Црешево и Смилковци не се корисници на ЈП „Водовод и канализација“, туку на ЈКП „Гази Баба“ – претпријатие под општинска надлежност.
„Ова по три години ќе го знаеше ако паузираше еден ден од сликање по фолклорни манифестации за да сработиш нешто“, напиша Арсовска, посочувајќи дека со средствата добиени од владите на Ковачевски и Мицкоски, Стефковски можел да изгради нова водоводна мрежа за тие населби.
Во продолжение, Арсовска рече дека Град Скопје во изминатите три години не добил ниту еден денар од централната власт, а дека Владата ѝ должи на ЈСП Скопје осум милиони евра.
Градоначалничката ја заврши објавата со саркастичен тон: „Седи Боби, кец!“
Ситуацијата дополнително ја заостри реториката меѓу градоначалниците на Скопје и Гази Баба, отворајќи нова рунда меѓусебни обвинувања. По објавата на Арсовска, повторно се огласи Стефковски кој и’ одговори дека надлежноста за Смилковци и Црешево ја знае многу добро, па ја повика да каже зошто жителите од Автокоманда, Железара, Триангла, Маџари и Ченто немаат вода? За крај по однос на делењето оценки, Стефковски на социјалните мрежи напиша дека граѓаните и’ дале оценка на парламентарните избори на Арсовска. Тогаш таа освои вкупно 3.438 гласови.
Македонија
Гори кај Прилеп, Македонски Брод, Чашка и Велес – пресек на состојбата со пожарите

На територијата на државата се евидентирани вкупно осум пожари на отворен простор, од кои активни се четири, соопшти Центарот за управување со кризи.
Во Општина Прилеп, гори кај селото Бешиште. Се работи за приземен пожар во квалитетна мешана шума. Активен е пожарот и кај Општина Македонски Брод, с. Црешнево, м.в. Церо Поле – пожар во деградирана дабова шума и грмушки. Во Општина Чашка беснее шумски пожар под Солунска Глава, помеѓу местата викани Изворите на Бабуна и Бабина Дупка (моментално нема активен пламен, само чад на карпест дел). Во Општина Велес пожарот избувна во ниска вегетација.
Изгаснати се 4 пожари: Општина Врапчиште, с. Врањовци – ниска вегетација, ѓубриште; Општина Липково, с. Лојане – ниска вегетација и стрниште; Општина Карбинци, с. Радање – блок (површина) посеана со жито и ниска вегетација и ОпштинаАрачиново, с. Орланци – ниска вегетација и отпаден материјал.