Македонија
(Видео) Георгиев го ослободи Судскиот совет од снимање: Камерите, ве молам, ќе мора да нѐ оставите да работиме
Новиот претседател на Судскиот совет, Сашко Георгиев, само што седна на столчето за раководење, реши да ги исклучи камерите од медиумите за да не снимаат што се зборува и дискутира. Георгиев тврди дека одлуката е едногласно донесена на колегиум за време на кратката пауза што ја даде, но експретседателката Весна Дамева реагира дека таа не била повикана и дека е против исклучување.
„За јавноста, пред сè, и за сите нас, ќе споменам само дека од краткиот колегиум што го имавме сега со колегите, а особено по однос на точката на дневен ред, каде што ќе расправаме по претставки и поплаки од страна на граѓаните и правните лица, по однос на работењето на судиите – јавноста ќе остане тука присутна, а камерите, можеме да завршиме, и да ја напуштат седницата. Тоа е едногласна одлука од страна на колегиумот што го имавме. Сè во врска со работењето, условите за работењето, а воедно и за точката на дневен ред, каде што ќе дискутираме за поплаки и претставки од граѓаните во однос на работењето на судиите. Јавноста е присутна, но камерите, ве молам, ќе мора да нè оставите да работиме“, рече Георгиев.
Реагира Дамева.
„Извинете, претседателе, јас не знаев дека има колегиум. Јас не бев повикана на колегиум, морам да реагирам. Меѓутоа, ако тоа е ваша едногласна одлука, во ред“, рече Дамева.
По ова, Георгиев одново ги праша колегите дали да се исклучат камерите, а од член на Советот имаше само реакција да се продолжи со работа, без произнесување.
„Значи, колеги, да не излезе дека ова е од претседателот, јас само пренесувам заклучоци од Судскиот совет. Дали нешто е спорно за вас од ова?“, праша Георгиев.
Камерите беа исклучени.
Претходно, имаше дискусија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Министерот за европски прашања, Муртезани, назначен за главен преговарач со ЕУ
На денешната седница на Владата, министерот за европски прашања, Орхан Муртезани, беше назначен за главен преговарач со Европската Унија за членство на Република Северна Македонија во Европската Унија, а за заменик на главниот преговарач е назначена заменик-министерката за европски прашања, Викторија Трајков.
На оваа седница исто така беше задолжено Министерството за европски прашања да подготви нова одлука за воспоставување структура за преговори за пристапување на Република Северна Македонија во Европската Унија.
Македонија
Тошковски на конференција во рамките на Берлинскиот процес: неопходна е координација за справување со илегалната миграција
Денеска делегација предводена од министерот за внатрешни работи, Панче Тошковски учествува на конференција на министри за внатрешни работи во рамки на Берлинскиот процес, која се одржува во Берлин, Сојузна Република Германија.
Одбележувајќи ја десетгодишнината од постоењето на оваа иницијатива, беше истакнато дека регионот на Западен Балкан живее историски моментум во однос на неговата европска перспектива, а токму Берлинскиот процес може да постигне синергија на индивидуалните напори на шесте земји од Западен Балкан како механизам за подготовка за пристапување кон ЕУ.
Во рамки на сесијата посветена на борбата против нерегуларна миграција како и нелегално криумчарење мигранти, министерот Тошковски истакна дека миграцијата и миграциските движења веќе подолго време се еден од главните предизвици, не само за регионот на Западен Балкан, туку и за Европа и дека е неопходна координација на сите постоечки иницијативи и мерки за справување со илегалната миграција, криумчарењето мигранти и трговијата со луѓе, и тоа не само од страна и во регионот на Западен Балкан, туку и на ниво на Европската унија и нашите меѓународни партнери.
Во обраќањето во рамки на сесијата за борба против организиран криминал, Тошковски подвлече дека без оглед дали станува збор за организиран криминал, трговија со луѓе, илегални миграции, трговија со наркотици, навистина е важна секоја иницијатива за регионално поврзување во борбата против организираниот криминал и брзата размена на информации меѓу службите. Во таа заедничка борба против организираниот криминал, а особено кога станува збор за следењето на парите и финансиските структури на организираните криминални групи, од есенцијална важност е да се интегрираат сите надлежни институции, развивајќи на тој начин систем за рано предупредување како моќна алатка во борбата против организираниот криминал и другите незаконски активности.
Македонија
Филков – Солдатов: изразена подготвеност за продолжување на соработката во областа на бесплатната правна помош, зајакнување на капацитетите на затворскиот систем, економскиот криминал
Министерот за правда Игор Филков оствари средба со раководителот на Програмската канцеларија на Совет на Европа во Скопје, Олег Солдатов и претставници од Програмската канцеларија на Совет на Европа.
На средбата се дискутираше за соработката на Министерството за правда за проектите кои се имплементираат во рамките на канцеларијата на Советот на Европа во Скопје, а се поврзани со работата на Министерството за правда.
Министерот за правда изрази подготвеност да се продолжи со интензивна соработка во областа на бесплатната правна помош, зајакнување на капацитетите на затворскиот систем, слободата на изразување и медиумите, борбата против трговијата со луѓе, економскиот криминал , борбата против говорот на омраза, нетолеранцијата и дискриминацијата.
Министерот истакна дека соработката и поддршката на Советот на Европа е исклучително важна и значајна , сите области ќе бидат опфатени подеднакво и ќе се пристапи со заедничка соработка за успешно реализирање.