Обвинителот Александар Марковски го задржа правото да бара поголема затворска казна од 12 години колку што денес му пропиша Основниот кривичен суд во Скопје на Васил Јованов кој смртно ја прегази 22- годишната Фросина Кулакова. Обвинителот по пресудата кажа дека судот изрекол досега највисока казна за вакво дело.

„Ова беше една мала победа за Обвинителството. Инаку станува збор за трагичен настан и нема простор ниту за славје ниту за разочараност. Во поглед на тоа самопризнание мислам дека придонесе и ефикасната и брза истрага кон која, со свој кадар и напори, придонесе и МВР кои беа на висина на задачата како и истражителите од ОЈО Скопје. Денешниот ден за Обвинителството е поголема победа затоа што беше изречена казна затвор која во историјата на овој Суд, за ова кривично дело и кога станува збор за една жртва, не била досега изречена, сметајќи на висината од 12 години казна затвор. Сепак Обвинителството го задржува правото на жалба и да бара повисока казна затвор“, рече обвинителот Марковски.

Денес Кривичниот суд му изрече 12 години затворска казна за 20-годишниот Васил Јованов, кој смртно ја прегази Фросина Кулакова на пешачки премин на булеварот Партизански одреди во јануари, годинава.

Во образложението, судијката Снежана Марковска кажа дека при одлучувањето судот ги земал во предвид сите олеснувачки и отежнувачки околности. Јованов доби и забрана за управување на возило од Б категорија во времетраење од пет години, а ќе треба и да ги надомести сите трошоци на кривичната постапка.

По неполна година од формирање на Владата предводена од ВМРО-ДПМНЕ, таа почнува да се распаѓа. Тоа е директна потврда на она што граѓаните го чувствуваат секој ден, дека Владата на Христијан Мицкоски е нефункционална, деструктивна и целосно заглавена во сопствени интереси, истакна на прес-конференција Богхданка Кузеска, портпаролка на СДСМ:

За неполна година, вели таа, оваа Влада почнува да се распаѓа, затоа што е составена само за да задоволи лични апетити.

Коалицијата, оценува Кузеска, полека се ситни, затоа што нема ни причина да постои, ништо не ја држи заедно освен функциите.

„Граѓаните немаат никаква добивка од оваа власт. Сведоци сме на катастрофални економски резултати, нула реформи, распад на институции и понижување на државата на меѓународна сцена. Мицкоски е премиер без насока, ја води државата како да е приватна компанија, фокусирана само на тоа кој каде ќе се вдоми и што ќе земе. Владата не ја води со визија и храброст, туку со калкулантски однос за секое важно прашање. Јасно е дека нема лидерство и одлучност во оваа Влада.

Нема ни трага од ветената ефикасност. Народот живее сè потешко, цените растат, платите тапкаат во место, а Владата троши милиони за луксуз и гоштевања. Додека работниците молат за повисока минимална плата, народните пари одат на папаја, манго, бејби-биф, октоподи. Додека граѓаните се борат да преживеат месец за месец, Владата живее на висока нога, како да сме во економски бум“.

На локално ниво, состојбата, додава Кузеска, е уште пострашна.

Според неа, општините предводени од ВМРО-ДПМНЕ се расадници на корупција. Градоначалниците, како што појаснува се фокусирани на местење тендери, не на решавање на проблемите.

„Улици не се поправаат, училишта пропаѓаат, а јавните услуги се во хаос. Граѓаните се оставени сами, системот е глув и слеп за реалните проблеми. Партнерите си заминуваат а граѓаните се во апатија затоа што гледаат дека оваа влада нема капацитет. Никој не треба да биде соучесник и дел пропаѓањето на државата во провалија кон која не води Мицкоски. Сите што остануваат со Мицкоски се дел од истиот проблем. Свесно ја поддржуваат штетната насока и ја носат истата одговорност.
Ова е Влада без систем, без план, без резултати. Единствено што функционира во оваа влада се личните интереси“.

Државата, како што вели Кузеска, не може да се води така. Според неа, граѓаните не можат вечно да трпат заради туѓи договори, туѓи сметки и туѓи амбиции. Ова, додава, е момент за соочување со политичката вистина: Македонија нема време за експерименти, нема простор за играње држава. Потребна ни е функционална, одговорна и сериозна власт.

СДСМ, како што нагласи, ќе продолжи да биде гласот на разумот и одговорноста.

„И оваа власт, како и сите што се градат врз лаги и интереси, ќе падне. Прашње е само колку штета уште ќе направат дотогаш“.

Денеска, во просториите на ЗЕЛС се одржа состанок посветен на разгледување на можностите за децентрализација на социјалните услуги.

На состанокот, покрај претседателот Орце Ѓорѓиевски, присуствуваа и заменик-министерот за социјална политика, демографија и млади, Ѓоко Велковски, градоначалникот на Гази Баба Бобан Стефковски, кој воедно е и претседател на Комисијата за социјални прашања при ЗЕЛС, како и други градоначалници и претставници на локалната самоуправа.

На состанокот се дискутираше за иницијативата Центрите за социјална работа да преминат под надлежност на локалната самоуправа. Овој чекор се гледа како клучен во насока на подобрување на пристапот и квалитетот на социјалните услуги, како и за зајакнување на координацијата меѓу локалните и централните институции.

Со пренесувањето на надлежноста, општините би добиле поголема улога во управувањето со центрите за социјална работа, кои и понатаму би функционирале во соработка со Министерството за труд и социјална политика. Ова би овозможило поконкретен и поефикасен пристап во грижата за граѓаните, особено за ранливите категории.

-Секако дека треба да се одбере модел кој е проверен и базиран врз регионалното искуство. Децентрализацијата на социјалните услуги значи поголема достапност за граѓаните, побрза реакција на институциите и креирање функционален систем кој ќе одговара на реалните потреби на локалното население. Локалната самоуправа е најблиску до граѓаните, затоа таа треба да има клучна улога во грижата за нив- изјави претседателот на ЗЕЛС, Орце Ѓорѓиевски.