Според Стефанија Кузмановска, потпретседателка на СДММ, ВМРО-ДПМНЕ, во свој режимски и познат стил повторно се обидува да ги стави под контрола средношколците.

Без јавна расправа, власта, додава таа, ги турка измените на Законот за средно образование, со кои директно се кршат правата на средношколците да се организираат и претставуваат како единствена сила.

Како што истакнува, во законските измени, во делот на ученичко организирање, избришан е Сојузот на студенти – единственото тело кое ги обединува средношколците на национално ниво и се залага за нивните интереси. Со тоа буквално ја затвораат секоја можност средношколците да се борат за себеси.

Им се одзема гласот. Им се одзема правото да одлучуваат. Кому сметаат здружени и силни, прашува Кузмановска.

„Овие законски измени го нарушуваат основното право да бидеме дел од демократските процеси во нашето општество. А, тоа многу нè потсетува на едно друго време, на еден режим и контрола врз образованието, кога бевме принудени да се организираме преку пленуми за да си ги одбраниме правата. Отстранувањето на Сојузот на средношколци е само дел од пакетот штетни измени на законите за образование, кои оваа власт ги турка по брза постапка. Овие измени се спротивни и на препораките на УНИЦЕФ, кои бараат системски и континуирани решенија за надминување на бариерите и создавање функционална поддршка за децата со попреченост“, нагласува таа.

Прашува зошто вакви суштински важни законски измени се туркаат на „брза лента“, без јавна дебата.

Децидна е дека образованието мора да биде натпартиска и надетничка тема.

Затоа, како што потенцира, Социјалдемократската младина на Македонија, апелира да се прекине со носење инстант решенија, кои се на штета на учениците.

Од формирањето на нелегитимната Влада, здравствениот систем влезе во сериозен колапс, а последиците ги трпат граѓаните, а особено децата кои поради невнимание и неодговорност завршуваат на најтрагичен можен начин, оценуваат од Алијанса за Албанците.

„Додека министерот Арбен Таравари шета низ емисиите кажувајќи празни зборови, на Детската клиника секојдневно умираат деца поради неговата и неодговорноста на неговите директори, а на Клиниката „Козле“ директорката Каролина Симоновска ги тероризира вработените и тој се плаши да ја отпушти. Ако има некое достоинство и не е слеп војник каков што бил, нека си поднесе оставка заедно со неговите неспособни директори“, реагираат од оваа партија.

За ваквата состојба, како што нагласуваат, Таравари бил информиран повеќе од три месеци и немал храброст да преземе ништо.

„И самиот потврди дека од септември добил поплаки и од албански и од македонски вработени за фашистичко и непрофесионално однесување на директорката кон вработените. На прес-конференција и самиот призна дека се сретнал со медицинскиот персонал, ветил дека ќе го истражи случајот, но оттогаш до денес кога вработените повторно напишаа јавен допис, Таравари одбра со молк да ја брани директоркатта и да ги игнорира вработените и пациентите“, се потенцира во информацијата од Алијанса за Албанците.

Денеска во Регионалниот центар за односи со јавноста во Касарната „Гоце Делчев“ во Скопје се одржа редовниот годишен брифинг со одбранбени аташеа на кој се обратија министерот за одбрана Владо Мисајловски, началникот на Генералштабот на Армијата, генерал-мајор Сашко Лафчиски и доајенот на Асоцијацијата на одбранбени аташеи, хрватското одбранбено аташе полковник Стјепан Домјанчиќ.

Мисајловски во своето обраќање потенцираше дека денешниот брифинг како и средбите кои се реализираат со одбранбените аташеи е јасен доказ за нашата посветеност на билатералната и мултилатералната одбранбена политика и соработка.

„И мојата татковина, и државите кои ги претставувате се дел од еден глобален меѓународен поредок кој може да функционира и да ја гарантира безбедноста на своите граѓани само ако соработуваме искрено и посветено и ако имаме една цел пред нас – а, тоа е мирот, стабилноста и демократијата“, рече Мисајловски.

Се осврна и на идниот развој за одбраната и Армијата и одбранбениот буџет од кој 32 проценти се наменети за модернизација и опремување.

„Споредено со 2024 година тоа се над 18 милиони евра повеќе за нова и модерна опрема, за посилна Армија, за посилна колективна одбрана во НАТО – Алијансата. Тоа е уште еден неоспорен доказ дека нашата држава е активен и посветен сојузник“, истакна Мисајловски.

Трите развојни приоритети во одбраната – стабилното буџетирање, засилувањето на процесот на модернизација и целосното почитување на правата и обврските кон вработените, успешно се реализирани, рече Мисајловски и додаде дека на ист начин ќе продолжиме да работиме и следната година.

Генералот Лафчиски упати благодарност до одбранбените аташеи за помошта во градењето и модернизацијата на одбранбените капацитети преку билатералната соработка, но и преку многубројните вежбовни активности. „Следната 2025 година оваа поддршка, оваа соработка и со вас, меѓутоа онаа поддршка која ќе ја добиеме од Министерството и од Владата ќе биде уште повеќе изразена“, потенцираше тој.

Полковникот Стјепан Домјанчиќ упати благодарност до раководството во Министерството и Генералштабот за можноста од прва рака да се слушнат пораките за развојот на одбранбениот сектор и нагласи дека земјава е препознаена и ценета членка во НАТО и дека македонската надворешна политика е целосно усогласена со надворешната и безбедносна политика на Европската Унија.

На брифингот со одбранбените аташеа се дава целосен осврт на меѓусебната соработка во годината што изминува, а се разговара и за чекорите кои ќе се превземат следната, 2025 година.