Македонија
(Видео) Данскиот скијач бил нападнат од мечката кога се доближил до нејзините мечиња – детали за нападот на Шар Планина

Директорот на центарот за управување со кризи, Стојанче Ангелов, ги обелодени деталите за нападот на мечка врз скијач од Данска, што се случи утрово на Шар Планина.
Како што објасни Ангелов, до нападот дошло околу 10.45 часот на местото наречено Јелак, при што мечката нападнала турист кој бил дел од 10-члена скијачка група, која одлучила да се движи надвор од скијачките патеки.
„Застанале покрај неколку елки да одморат, но во нивна близина се нашле две мали мечиња и веднаш скокнала мечка, која исплашена за своите мечиња нападнала еден од туристите гризнувајќи го за ногата по што побегнала“, рече Ангелов.
Повредениот турист бил префрлен во болницата во Тетово, каде што неговата рана била исчистена и санирана. По преврската, тој ја напуштил болницата.
Ангелов укажа дека во послената година има зголемен број пријави на Шар Планина за мечки. ЦУК ќе иницира неколку средби со раководството на Националниот парк Шар Планина, со цел да се изнајде решение со кое ризикот за планинарите од опасноста од средби со мечките ќе биде намалена. Ангелов вели дека се работи за територија на која мечките природно припаѓаат, но целта е ваквите несакани појави кога мечка исплашена за своите најмали напаѓа човек да се сведат на минимум.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сончево и топло со мала до умерена локална облачност, од утре многу топло време

Сончево и топло со мала до умерена локална облачност. Ќе дува слаб до умерен ветер од северoзападен правец.
Минималната температура ќе биде во интервал од 10 до 19, а максималната ќе достигне од 29 до 37 степени.
Во Скопје, сончево со мала до умерена облачност. Ќе дува слаб до умерен ветер од северен правец. Минималната температура ќе се спушти до 17, а максималната ќе достигне до 37 степени.
Под влијание на топла воздушна маса од југ, од утре следува период на сончево и многу топло време со мала до умерена облачност. Особено топло време се очекува во текот на следната работна седмица, кога дневната температура насекаде ќе биде над 30°C, на повеќе места ќе надминува 35°C, а наместа ќе биде и над 40°C.
Македонија
Филипче: ВМРО-ДПМНЕ да каже дали имаат сериозен план за одблокирање на европските интеграции

Претседателот на Социјалдемократскиот сојуз на Македонија, Венко Филипче, во одговор на новинарско прашање, во врска со изјавата на премиерот Мицкоски за поднесување заедничка резолуција со Бугарија во Европскиот парламент за македонскиот јазик, посочи дека вакви сериозни прашања се дискутираат како предлог во Собранието, каде што учествуваат сите политички партии.
„Сметам дека е крајно несериозно такви сериозни предлози да се даваат од обични прес – конференции. Премногу е сериозно и важно прашањето да биде само предмет и обид за некаков дневно политички партиски интерес од страна на ВМРО ДПМНЕ. Сметам дека треба да се направи како предлог во Собранието бидејќи е нешто во што треба да учествуваат сите политички партии. Доколку има таков сериозен предлог ние апсолутно ќе го ќе го поддржиме“, рече Филипче.
Посочи дека ВМРО ДПМНЕ должат пред јавноста да образложат каков план имаат за одблокирање на евроинтеграциите.
„ВМРО-ДПМНЕ треба да каже дали имаат сериозен план, дали имаат сериозен план за дипломатска активност, дали имаат сериозен план за одблокирање на европските интеграции“, рече претседателот на СДСМ, Венко Филипче.
Македонија
(Видео) Полициски хеликоптер исфрли 80 тони вода врз пожар во струмичко

Денеска (18.07.2025), полициски хеликоптер од типот Бел-412 од Одделот за воздухопловни единици дејствуваше на пожар во општина Василево, с. Нивичино, струмичко каде што гори нискостеблеста шума.
При дејствувањето во 60 налета се исфрлени повеќе од 80 тони вода, соопшти МВР.
Пожарот, како што информираат се уште е активен и продолжуваат активностите за негово гасење.