Македонија
(Видео) Димитриеска Кочоска: За да нема зголемување на даноците, владата да го запре расипничкото трошење на државните пари

Зголемување на даноците при тежок пат на опоравување на економијата е надвор од секаква логика, истакна на денешната прес конференција, Гордана Димитриеска Кочоска, член на ИК на ВМРО-ДПМНЕ.
„За сѐ што се случува денес, ние како опозиција предочивме пред кризата, во текот на кризата, а сега дојде признание директно од МАНУ. МАНУ призна дека дојдовме до плафонот на јавниот долг и дека е потребна итна фискална консолидација. Но, почитувани се заговара зголемување на даночните стапки? Прашуваме: Зошто фискалната консолидација не започне од расходната страна на буџетот? Зошто не се посегне прво по СИВАТА економија? Зошто не ги консолидирате прво финасиите НА ЦЕНТРАЛНО И НА ЛОКАЛНО НИВО? Зошто кај некои општини наплатата на даноците е ниска, а некои немаат наплата на данок на имот? Зошто во некои општини се трошат државни пари за скапи коли и ручеци среде криза? Зошто за ова никој не сноси одговорност?“, запраша Димитриеска Кочоска.
„Зошто посегнувате по расположливиот доход на граѓаните кој ТРЕБА ВЕДНАШ, А ТРЕБАШЕ И ВЧЕРА да го запрете расипничкото трошење на државните пари, да ги запрете вработувањата во јавната администрација, да престанете со корупција на највисоко ниво, со тендери во четири очи на блиски луѓе на Зоран Заев, да престанете со огромните суми на трансфери до невладини организации за ваша промоција. ДА ПРЕСТАНЕТЕ со сѐ она што НЕ остава простор за капитални инвестиции, за финансирање на здравство, за образование и за помош во економијата“, потенцира таа.
Според неа, воведување на прогресивен данок при нарушена ликвидност и солвентност на фирмите ќе значи само продолжена тенденција на отпуштања и продлабочување на невработеноста или пак ќе влијае негативно врз потрошувачката.
„Зголемување на даночната стапка на ДДВ-то во услови на континуиран раст на малопродажните цени на производите и услугите, дополнително ќе ја подгрее ИНФЛАЦИЈАТА. Воведување на КРИЗЕН ДАНОК по примерот на 2001 година, требаше да биде воведен во текот на 2020-та година за да не креирате толку голема буџетска дупка и раст на јавниот долг. Во земја во која сивата економија е околу 30-40% од БДП и не е оданочена, треба да се почне од неа“, сугерира Димитриеска Кочоска.
Таа дополни дека владата треба да ја зајакнете даночната администрација и инспекциските служби, а не како што рече да вработува по наредба некомпетентни инспектори, а другите да ги отпушта заради критична мисла.
Најави дека нејзината партија ќе го вложи целиот капацитет да се спротивстави на зголемувањето на даноците.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Делови од Карпош и Сарај денеска без струја

Од ЕВН Македонија АД известуваат дека денеска без електрична енергија ќе останат:
– во периодот од 09.00 до 13.00 часот, корисниците од ул. Пелистерска 4-1/8. (општина Карпош)
– во периодот од 09.00 до 14.00 часот, корисниците од улиците бр. 3 и бр. 5 како и околните објекти во нивна близина во Сарај.(општина Сарај)
Македонија
Без вода дел од Центар

Од ЈП Водовод и Канализација известуваат дека денеска поради дефект на улицата Димитрие Чуповски бр.10 без вода ќе останат корисниците од улицата Никола Вапцаров лоцирани на потегот од Министерство за правда до Плоштад Македонија, општина Центар.
Водоснабдувањето ќе биде прекинато во периодот од 08.00 часот па се до отстранување на дефектот.
Македонија
Променливо облачно со повремени локални врнежи од дожд

Времето денеска ќе биде променливо облачно со повремени локални врнежи од дожд. Ќе дува умерен до засилен ветер од северен правец (локално над 60 km/h). Минималната температура ќе биде во интервал од 5 до 11, а максималната ќе достигне од 9 до 16 степени.
Во Скопје, променливо облачно со повремен локален дожд. Ќе дува умерен, во делови од котлината повремено засилен ветер од северен правец. Минималната температура ќе се спушти до 9, а максималната ќе достигне до 13 степени.
Времето во наредните денови
До среда ќе преовладува променливо облачно време со повремени локални врнежи од дожд. Ќе дува умерен до засилен северен ветер (локално над 60 km/h), а температурата ќе се задржи под просекот за овој период од годината. Од четврток времето ќе биде стабилно и суво со пораст на дневната температура.