Македонија
(Видео) Живее осамена и во беда, тешката животна судбина ја довела на дно

Педесет и петгодишната прилепчанка, Славица Вељаноска, петта година по ред 8 Март – Денот на жената, ќе го помине осамена во беда и без основни услови за живеење. Без никакви финансиски приливи, Славица преживува во својот скромен дом, каде што се чувствува миризбата од прокиснатите ѕидови и студот што продира низ прозорите и прагот од распаднатата врата.
Пред неколку месеци на Славица ѝ е дијагностицирана депресија придружена со несоница за што е потребно да пие лекарства што не е во можност да ги набави. Вељаноска за „А1он“ и „Макфакс“ ја раскажа нејзината потресна приказна од детството за која смета дека е причина за депресијата што ја прати веќе подолг период. Сликите и немилите случувања од нејзината младост вели дека не се забораваат. Нејзините родители, кои сега се починати, имале голем проблем со алкохолот. Пред 12 години по жестока расправија, таткото на Славица со сатар го убил својот брат близнак, Славчо Талески.
– Со спиењето имам проблем, па доколку не се напијам „хелекс“, не можам да заспијам, се нервирам и плачам. Депресијата ме тера на плачење, на неубави мисли од детството, како сум поминала во животот, зошто да бидам во ваква состојба, јас бев бистра и сакав да учам, но немав совесни родители. Мајка ми почина млада, на 45 години, татко ми многу ја тепаше, нас нѐ бркаше надвор на снег по улици, уште од мали сме мачени – вели Вељаноска.
Славица во својот скромен дом живее без струја, вода, шпорет и други неопходни апарати за домаќинство. Тоалетот е во катастрофална состојба, нема бојлер ниту, пак, функционална ВЦ-школка. Освен луѓето што работат во фурната,која е во близина на нејзиниот дом, на Славица никој досега не ѝ понудил никаква помош. Стара и изнемоштена, секој ден се симнува во центарот на Прилеп, каде што проси од граѓаните за кои вели дека се запознаени со нејзиниот начин на живеење, но не се во можност да помогнат. Својот случај 55-годишната прилепчанка неколку пати го пријавувала кај градоначалникот во Општината, но оттаму не добила никаква помош, а ни образложение зошто локалната власт и социјалните служби не сакаат да ѝ излезат во пресрет.
– Повеќе пати отидов кај Илија Јованоски, претпоставените ми кажаа дека ќе ме викнат, цела зима помина, сѐ уште ме немаат повикано. Им оставив број на телефон, адреса и уште ништо. Ми велат, не сте дојдени на ред – раскажува Вељаноска.
Градоначалникот на Прилеп, Илија Јованоски, за „А1он“ и „Макфакс“ вели дека за Славица Вељаноска дознал од социјалните мрежи и дека таа никогаш не била во Општината. Спротивно на она што го вели Вељаноска, градоначалникот Јованоски тврди дека испратил екипа од социјалната служба да ја посетат и да ѝ помогнат на оваа социјално загрозена жена.
– Кај мене нема дојдено сигурно, немаме разговарано за нејзиниот случај. Кога од социјалните мрежи дознав за Славица, веднаш го повикав директорот на Центарот за социјална работа по што таа беше посетена од социјални работници. Дознавме дека до пред извесен период живеела во старски дом, од каде што си отишла поради за нас нејасни причини – вели Јованоски.
Вељаноска не прима социјална помош, до пред неколку години редовно примала пензија од починатиот сопруг од Германија во вредност од 170 евра, но пред одреден период била измамена од страна на помлад брачен пар. Тие ја советувале да земе кредит и со тие пари да се грижат за неа. Славица го подигнала кредитот и парите им ги дала ним, кои подоцна ја избркале од дома, а сите пари ги задржале. Измамата е пријавена во полиција, вели Вељаноска, но најверојатно случајот е заглавен некаде во безизлезните судски лавиринти. Таа искрено се надева дека парите ќе ѝ бидат вратени, но засега нема никаква пресуда во нејзина корист.
Виктор Јованов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Кривични пријави против двајца угостители од Берово и од Пехчево за бесправно градење

Полицијата поднесе кривични пријави против правно лице – угостителски објект од Пехчево и против С. П. (43) од Пехчево и против правно лице – угостителски објект од Берово и В. К. (32) од Берово поради постоење основи на сомнение за сторени кривични дела бесправно градење.
Пријавениот С.П., сопственик и управител на правното лице од Пехчево, на катастарска парцела во Пехчево во државна соспственост, без одобрение за градење издадено од надлежен орган, изградил тврд објект во кој што е сместен угостителскиот објект и вршел угостителска дејност.
Пријавениот В.К., сопственик и управител на правното лице од Берово, на катастарска парцела, сопственост на Т.К. и М.К., на земјоделско земјиште, надвор од урбанистички план за град Берово, бесправно изградил тврд објект во кој што е сместен угостителскиот објект во кој вршел угостителска дејност.
Македонија
Проектите што се реализираат не се на ВМРО-ДПМНЕ или на СДС, туку на македонските граѓани, реагира ВМРО-ДПМНЕ

СДС мора да почне да се однесува како сериозна партија, а не како мало дете на кое му ја земале играчката, велат од ВМРО-ДПМНЕ, на обвинувањата од СДСМ дека проектот за изградба на патот Охрид – Св. Наум е нивен.
„СДС мора да прифати дека проектите кои се реализираат, не се во нивна или наша сопственост, туку за граѓаните и за државата.
Исто така, многу е важно да се напомене дека проектите кои се почнуваат мораат и да се завршат. Е сега, разликата меѓу ВМРО-ДПМНЕ и СДС е во тоа што ние кога работиме и остваруваме, се е во временски рок, јавно и транспарентно, а додека пак СДС, ако отпочне некаков проект, тој проект потоа е корумпиран, со тендери договорени во 4 очи, поскапи цени двојно од набавните, класифицирани договори или пак, проекти кои остануваат така да блеат во празно, и никој за ништо да не одговара.
Проекти кои СДС ги има до крај завршено се, проектот за златната виза на Филипче, пари од ископ на јаглен на фирми на Филипче и Заев, проектите за уништување на Македонија, како што беа името, знамето, идентитетот и Уставот, потпишувањето на Преспанскиот и договорот со Бугарија, проектот Француски предлог и многу други проекти слични на овие.
За разлика од нив, ВМРО-ДПМНЕ вистински работи на реализација на проектите, без разлика која Влада ги започнала и ги решава на брз и ефективен начин во интерес на граѓаните“, велат од ВМРО-ДПМНЕ.
Македонија
СДСМ: Мицкоски повторно промовира наш проект, овој пат обновата на патот Охрид – Св. Наум

Проектот за реконструкција на патниот правец во охридскиот регион е започнат од СДСМ уште во август 2023 година, како дел од сеопфатниот план на Владата предводеа од СДСМ за раст и развој на регионот, унапредување на туризмот и подобрување на патната инфраструктура кон граничните премини со соседните земји, велат од СДСМ.
„Средствата за овој проект, во вредност од 11,7 милиони евра, беа обезбедени од буџетот на ЈП за државни патишта и истиот беше планиран, одобрен и започнат од претходната влада на СДСМ со реализација од околу 50%. До летната сезона во 2024 година комплетно се заврши реконструкцијата на патот од Св. Наум до пред селото Пештани и заради туристичката сезона имаше мал прекин на работите. Претходно, во 2019 година беше започната и завршена реконструкција на патот од бензиската Билјанини извори до с. Коњско“, велат од СДСМ.
Дополнително, додаваат од таму, и цела Туристичка како главна магистрална трансверзала во градот во должина од 5,6 км по 60 години беше реконструирана исто така од страна на СДСМ.
„Токму во време на СДСМ беа рехабилитирани и обновени и патните правци кон граничните премини Блаце, Деве Баир, Ќафасан и Меџитлија. Ја поздравуваме довршувањето на проектот, но до кога власта ќе се кити со проекти на СДСМ. Кога ќе промовира Мицкоски некој проект од неговата Влада? Или тоа не може да се случи затоа што таков проект нема“, велат од СДСМ.