Македонија
(Видео) Жителите на Аеродром не веруваат во градоначалникот Марин
Нова сеча во општина Аеродром ги вознемири жителите, кои велат дека повеќе не веруваат во градоначалникот Марин. Поради изградба на нови објекти, во општината се уништува зеленилото, што е спротивно на ветувањата на новиот градоначалник Златко Марин, кој тврдеше дека Аеродром ќе има нова парк-шума, чист воздух и ќе стави крај на градежната мафија.
„Направивме вистинска граѓанска програма, во неа нудиме конкретни решенија за борба против загадувањето, мерки за контролирање на градежниот и сообраќајниот метеж, ќе направиме ревизија на постојните ДУП-ови, ќе спроведеме гасификација до јавните објекти и топлификација до индивидуалните домувања, ќе овозможиме субвенции за еколошки огрев и ќе посадиме вистинска парк-шума“, ветуваше Марин пред изборите.
Наспроти сето ова, се случува сосема спротивното. Градежниот хаос продолжува, а граѓаните излегуваат на протести и бараат итно стопирање на градбите. Жителите тврдат дека Марин не е заинтересиран за ништо. Ветеното ревидирање на ДУП-овите остана само предизборно ветување. Граѓаните на општината се категорични дека Марин ги довршува проектите на својот претходник Коневски, а уништувањето на зеленилото и новите градби е еколошка катастрофа што тој ја поддржува.
„Ова е ужас, првин не може да се гради, па ќе се гради. Стариот градоначалник направи некои документи, овој ги доврши. Не го интересира ништо. Кога и да се јавиме на ‘Фејсбук’ да го прашаме што и како се случува, тој вели дека не го интересира и дека е приватен имот. Ова е ужас. Немам очекувања, сето ова е голема лага. Апсолутно не верувам во новиот градоначалник. Овој простор плачеше за паркче, за детско игралиште. Нека има и објект, ама овој е ужасно голем, се зборува дека ќе има 270 стана. Овој дел требаше да се уреди на сосема друг начин, но што е тоа е“, вели жител на општина Аеродром.
„Би требало да ги стопира градбите, но јас не верувам во никого. Најголемата штета е што е пренатрупано со градби, нема воздух. Најпотребно е зеленило“, додава жителка на општината.
„Мислам дека треба да се стопираат сите градби, дека градоначалникот ќе ги стопира. Човекот е нов, не го познаваме доволно, но гласот го дадовме за него. Лично јас. Првпат на овие избори го дадов гласот за оваа партија. Јас мислам дека тоа што ни го ветил не би требало да го излаже. Наредниот пат нема молење“, вели друг граѓанин. (00039)
„Многу е густо населено. Не знам што мислат општинарите и зошто градат толку густо. Не верувам дека Марин ќе стави крај на оваа градежна експанзија“, вели граѓанин на оваа општина.
Првиот човек на Аеродром, Златко Марин, додека беше во опозиција, го обвинуваше ексградоначалникот Коневски дека ја игнорира волјата на граѓаните, а сега тоа и нему му го порачуваат жителите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Левица ветува изградба на споменик за бранителите од Вејце
Политичката партија Левица вели дека ако дојде на власта ќе изгради во Вејце споменик во помен на загинатите бранители, кои несебично се жртвуваа во војната во 2001 година.
„Масакрот од 2001 година во село Вејце останува дел од колективната меморија на Македонците како најголем пораз на државните институции од група на терористи, кои ден денес немаат праведна судска разврска, туку напротив истите тие кои ги направија овие злосторства беа амнестирани и наградени со удобни фотелји.
Делегација на Левица на 28 Април ќе положи свежо цвеќе за сеќавање на жртвата на осуммина припадници на специјалната единица “Волци” кои беа убиени, масакрирани и живи запалени на истиот тој ден пред 23 години.
Проектот го изготви м-р Андреа Јанков, координатор на секторот за Урбанизам и локална самоуправа на Левица“, велат од партијата.
Македонија
Маричиќ: Евроинтеграцијата е премногу важна цел за да се потклекне пред предизвиците
Првиот заменик претседател на Владата за европски прашања Бојан Маричиќ ја пречека Вицепремиерката за европски прашања на Република Молдавија Кристина Герасимов. По остварената средба во Секретаријатот за европски прашања, Вицепремиерите одржаа заедничка прес конференција во Владата на Република Северна Македонија.
На прес конференцијата Вицепремиерот Маричиќ ја пренесе заедничката определба на двете држави што побргу да го завршат процесот за преговори за членство во ЕУ. Во продолжение интегралната изјава на Вицепремиерот Маричиќ.
„Откако на Самитот на ЕУ во Шпанија минатата година беше утврдена целта дека следното проширување на ЕУ е позиционирано до 2030 година, и откако Европскиот Совет донесе одлука да ги отвори пристапните преговори со Молдавија и Украина, Северна Македонија и Молдавија имаат заедничка цел. Со тоа стануваме и стратешки сојузници.
Република Молдавија сега го отпочнува скрининг процесот, додека ние го завршивме успешно во декември минатата година. Успешниот скрининг е резултат на ангажманот на речиси илјада владини претставници и експерти од академскиот и граѓанскиот сектор, за што добивме признанија од страна на Европската Комисија.
На колешката Герасимов ѝ пренесов дека Северна Македонија ќе им го стави на располагање сето знаење и искуство од овој процес на нашите колеги од пријателска Молдавија. Исто како што ние ја добивме поддршката од Хрватска и Словенија, Србија и Црна Гора.
Тоа е европската солидарност. Тоа е израз на пријателство и поддршка како европски вредности.
И двете држави сериозно претендираме на членство при следното проширување до 2030 година. Тоа проширување добива на значење и во забрзување заради геостратешките и безбедносните аспекти, Но, исто толку сме свесни дека за членство во ЕУ мора да ги исполниме и објективните критериуми и стандарди. Секоја земја одделно со своите специфики и перформанси е повикана да ги постигне тие стандарди, но споделувањето на искуствата на тој пат е од огромно значење и секогаш добредојдено.
Исто така, имаме сериозна намера и подготвени сме да ги извлечеме најдобрите придобивки од Планот за раст, кој треба да донесе дополнителна динамика во евроинтегративните процеси на земјите претенденти за членство во ЕУ.
Креиран, како финансиска и политичка инвестиција во регионот, Планот за раст со шесте милијарди евра за Западен Балкан е подадена рака за забрзување на процесот за членство до 2030 година. Тоа е брза лента на патот на евроинтеграцијата. Планот за раст бара реформи од државите и од владите, а придобивките се во системските промени кои ги обезбедуваме низ тие реформи, во финансиските пакети за земјава и во економската интеграција во единствениот европски пазар.
Мораме да останеме силно посветени на европската реформа агенда, зашто само на тој начин, токму преку Планот за раст ќе си обезбедиме слободно движење на стоки, услуги и работници, пристап до Единствената платежна област, олеснување на патниот транспорт, интеграција во индустриските синџири на снабдување, интеграција и де-карбонизација на енергетските пазари, како и во дигиталниот единствен пазар.
На овој пат до членството во ЕУ, сите земји кои се во преговори или се кандидати се соочуваат со предизвици кои бараат одговорни одлуки. Северна Македонија сега е пред таков предизвик. Ние нема да се откажеме од донесувањето на потребните одлуки за да ги продолжиме започнатите преговори.
Со колешката Герасимов се согласивме дека евроинтеграцијата е премногу важна цел за да се потклекне пред предизвиците. За двете земји членството во ЕУ е приоритет во остварувањето на врвните државни интереси.
Македонија
„Не е законски да не е осигурана Клиниката, за тоа треба да преземе одговорност менаџментот“, кажа Демири
Министерот за здравство Илир Демири кажа дека штетата на Токсикологија е покриена, откако имаше хаварија со цевката за парно.
„Клиничкиот центар има заеднички служби кои се наменети за тоа, тоа им е примамрна обврска да се грижат за Клинички центар и за сите хаварии што можат да се случат. Хаваријата со цевката за парно е санирана уште вчера од страна на заеднички служби“, рече Демири.
Дали е потпишан договор или не, тоа се интерни договори на Клиниките кои морам да ги проверам, додаде министерот.
Во однос на болничарот кој требаше да биде суспендиран, Демири кажа дека има една голема неправда направена на Токсикологија, а тоа е необезбедување на согласност од страна на менаџментот на таа институција за обезбедување договори за 18 вработени кои се дел од медицинските процедури, кои веќе 4 месеци служат на таа институција, а не добиваат никаква економска надокнада.
„Во тек е изборна кампања, не сакам да се прекрши ниту една законска процедура, чекам да дојде извештајот на Инспекцискиот надзор кој ги има обврзано во тек на 5 дена менаџментот да најде решание за 18 луѓе кои работат, а не добиваат надокнада. Не е законски да не е осигурана Клиниката, за тоа треба да преземе одговорност менаџментот“, кажа Демири.
На новинарско прашање, министерот одговори дека економската директорка оди на работа и не се паркира на влезот на Клиниката.
„Не се точни наводите дека доаѓала на работа по четири саати, според моите сознанија“, додаде Демири