Македонија
(Видео) Заев: Деновиве ќе се финализираат деталите за законот за државјанство, има две одделни проблематики

Премиерот Зоран Заев, денеска, заедно со неколкумина министри, се сретна со координаторот на пратеничката група на Алијансата за Албанците и Алтернативата, Скендер Реџепи, во врска со законот за државјанство, кој беше причина за блокада на парламентот.
По средбата, Заев изјави дека верува оти ќе се изнајде решение за проблемот со немањето државјанства и дека на средбата биле изнесени низа ставови како од страна на владините претставници така и од пратениците на Алијансата за Албанците. Следната средба е најавена најдоцна за една недела.
„Имавме конструктивен работен состанок на кој претставниците од извршната власт можевме да ги слушнеме аргментациите по предлог-законот од Алијансата и Алтернативата, претставени од нивните пратеници. За дел од работите веднаш најдовме решение и знаеме како ќе се решат работите, но за позначаен дел од работите заклучивме дека Владата треба да ги разгледа аргументациите што беа понудени во наративот и образложението од страна на Алијансата и Алтернатива како што и тие треба да ги разгледаат аргументациите што беа понудени од страна на соодветните министри“, рече Заев по средбата.
Како што посочи, договорено е најдоцна за една недела да се сретнат и врз основа на тие аргументации да се пронајде трајно решение.
„Се согласивме дека таа бројка, иако е евидентирана на 1.500 лица, во матичната евиденција е некаде 800 -850 луѓе и е различна. Притоа разграничивме граѓани што имаат извод од Матичната книга на евиденцијата, односно се родени тука, тоа е една проблематка, и граѓани што се стекнуваат со државјанство со природување, односно женење, мажење во државата, што е друга проблематика, и како да настапиме“, објасни премиерот.
Заев рече дека во следните неколку дена службите интензивно ќе работат за да ги разгледаат и да ги разберат сите предлози што ги дале двете опозициски партии.
„Така, на тој начин ќе потврдиме сите дека сме за трајно решавање за оние наши граѓани што немаат државјанство да добијат државјанство, а притоа тоа да биде во согласност со европските конвенции за државјанство, во согласност со меѓународната регулатива за државјанство и во согласност со сето она што претставува одржливост на решенијата за државјанство“, рече премиерот.
Во решавање на оваа проблематика, како што рече, ќе се искористи примерот од 2004 година кога се решени случаите со повеќе илјади граѓани.
На средбата присуствуваа и министрите за внатрешни работи, Оливер Спасовски, за правда, Бојан Маричиќ, и за земјоделство, шумарство и водостопанство, Арјанит Хоџа, како и координаторот на пратеничката група на СДСМ, Јован Митрески.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Битиќи: Ја добивме битката, концесијата дадена од ВМРО-ДПМНЕ, падна на арбитража

Концесијата дадена од ВМРО-ДПМНЕ, симбол на криминал и коруптивни зделки, падна на арбитража. Државата ја доби битката, нема да плати штета од 115 милиони евра, реагира пратеникот на СДСМ, Фатмир Битиќи и поранешен вицепремиер.
„Да се потсетиме: Случајот односно судските рочишта се затворени во 2023 година. Арбитражниот суд носи конечна пресуда во рок од две (2) години по завршните зборови. Тимот што ги застапуваше правата на нашата држава во целиот тој процес се водеше со јасни определби и насоки од страна на мојот кабинет во претходната Влада“, наведува Битиќи.
И затоа, додаде тој, искрена благодарност до White & Case, нашите главни застапници во арбитражата, државните службеници и експерти кои вложија знаење и енергија, како и до локалните адвокатски друштва за нивната посветеност и професионалност.
„Благодарност до сите што ги застапуваa интересите на државата. Вака се почитува татковината, со искрен настап и без калкулации – а за оние кои имаа други интереси, иднината ќе покаже“, стои во објавата на Битиќи.
Македонија
Поради пожарот кај Јасен, затворен за сообраќај патот Македонски Брод – Скопје

Поради пожар во националниот Парк Јасен, регионалниот пат Р1106 Македонски Брод – Скопје затворен е за секаков вид на возила, информира АМСМ.
Сообраќајот на државните патишта се одвива непречено, по претежно суви коловози.
Интензитетот на сообраќајот на патиштата надвор од градските средини е зголемен. Поради летните одмори, се бележи зголемена фреквенција на возила, на ГП Табановце времето на чекање за излез е околу 30 минути, додека на останатите гранични премини од македонска страна нема подолги задржувања при влез или излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Меџити: 65 милиони евра за Универзитетскиот кампус и подземниот паркинг на Плоштад Скендербег во Скопје

Изградбата на Универзитетскиот кампус „Мајка Тереза“ и подземниот паркинг на Плоштад Скендербег стануваат реалност. За овие крупни проекти се обезбедени 65 милиони евра од државниот буџет, соопшти првиот вицепремиер Изет Меџити.
Според него, реализацијата на овие проекти ќе започне многу скоро.
„Сè е подготвено за нивниот почеток. Овие инвестиции ќе донесат долгорочни придобивки за студентите, граѓаните и економскиот развој на Скопје. Во таа насока, денес остварив значаен состанок со министерот за транспорт, Александар Николовски, директорот на Инспекторатот за градежништво и претставници на Општина Чаир, каде што се договоривме за конкретните чекори што ќе го обезбедат итното започнување на овие проекти. Овие инвестиции поставуваат нови темели за урбаното и образовното модернизирање на нашиот град, означувајќи клучен момент за стратешкиот развој на Скопје. Со оваа посветеност, отвораме нова фаза, каде визијата за функционален, иновативен и развоен град се претвора во реалност. Благодарение на меѓуинституционалната координација и заедничката посветеност, многу брзо ќе започне теренската реализација на овие проекти од национално и стратешко значење. Ние ги исполнуваме ветувањата и ја претвораме визијата во реалност!“, напиша Меџити.