Македонија
(Видео) Заев: Наградата доаѓа во незапаметени времиња кога на Балканот пламтат огнови, но и пријателства
Премиерот Зоран Заев ja доби меѓународната награда „Иса-бег Исаковиќ“ на Свечената академија во Народниот театар во Сараево, каде што присуствуваа гости од земјата и пошироко, дипломати, академици, личности од општествено-политичкиот живот од БиХ. Наградата му е доделена на премиерот Зоран Заев, како што е посочено, за неговите напори и иницијативи како позитивни и историски вреднувани, особено во воспоставување пријателства и соработка на Балканот.
Заев, по доделувањето на оваа државничка награда, се обрати пред присутните, организаторите од здружението „Клепсидра“, членовите на Комитетот за доделување на ова единствено државничко признание во Босна и Херцеговина и претседателката Адила Пасалиќ-Кресо, aкадемици, дипломати, претставници на медиумите, гости, меѓу кои беа и членовите на делегацијата што допатува со него во Сараево, потпретседателот на Собранието, Зекир Рамчиловиќ, претседателот на МАНУ, Таки Фити, заменикот-министерот за политички систем и односи меѓу заедниците, Неџад Мехмедовиќ.
„Ова е навистина награда што ќе се памети. И за мене како добитник, но и за вас како доделувачи затоа што доаѓа во незапаметени времиња кога во нашиот регион, на нашиот Балкан, пламтат огнови, но и пријателства. Овие пријателства се новата надеж на стабилност, безбедност и развој – на нашите држави, на Балканот и на Европа. Земјите на Балканот како никогаш досега ги предводат лидерства што сакаат и умеат да бидат пријатели. Се борат за доброто на своите граѓани во своите земји, но со широка свест како никогаш досега дека едниот оди напред, само кога и другите одат напред.
И така работиме – свесни дека таа психологија на национализам, радикализам, популизам, себичност, никому не му донесе добро. За еден народ беше лошо – за сите стана лошо. Денес, на искуствата од минатото, ние, пријатели, градиме иднина. Европската Унија го препознава овој позитивен момент на Балканот, но не смее да ја испушти шансата денес, да му подаде пријателска рака на Балканот“, рече премиерот Заев.
Тој се заблагодари за честа што му е укажана со наградата „Иса-бег Исаковиќ“ и признанието што го носи оваа награда „Во потрага по пријател“. Заев посочи дека Република Северна Македонија сработи во реформите, го воспостави пријателскиот концепт едно општество за сите, дома, со еднакви шанси за сите и со оглед дека нашата држава, како и Босна и Херцеговина, изобилува со различности од националности, традиции, култури, вери, покажавме дека ние веќе сме Европа во мало и можеме успешно да функционираме.
„Ги стабилизиравме и зацврстивме односите со нашите соседи Бугарија и Грција, со кои не само што воспоставивме пријателства туку тие држави и нивните раководства се веќе меѓу најголемите лобисти во ЕУ за да го добиеме заслужениот датум за почеток на преговорите со Европската Унија. Сработи Република Северна Македонија, која со чест ја предводам.
И, сега, Европа треба да ја исправи историската грешка, што ја признаа и европските институции и земјите членки, а свесна дека го заслужуваме исчекорот во евроинтеграциите е и пријателска Република Франција.
Треба, мора, фер е, европска вредност е да се одржи зборот, зборот даден кон држава што покажала на дело што значи да се биде пријател. Тоа ќе биде мотивација за новите пријателства на нашиот Балкан, кои време е да се случат. И сите заедно да обезбедиме стабилност, сигурност и просперитет на нашите држави и на регионот, во Европа, на која ѝ припаѓаме природно, географски, трационално, културно, културолошки, секако“, порача премиерот Заев.
Тој го посочи особено договорот од Преспа, кој е навистина редок пример на функционална дипломатија и со кој, како што рече, е ставен крај на еден долг, тежок, исцрпувачки, деструктивен тридецениски спор, што ги блокира перспективите за нашите клучни стратешки интереси, НАТО и ЕУ, а наведе дека е сличен и примерот со нашиот пријател – Република Бугарија и договорот за добрососедство со неа.
„Дали можевме сами да го постигнеме тој договор? Не. Потребен ни беше пријател од другата страна, кој е подготвен да споделува вредности. Го добивме тој пријател во Република Грција. Вредност се политиките на изнаоѓање решенија како нешто може, а не политиките на изнаоѓање оправдувања зошто нешто не може. Сличен е и примерот со нашиот пријател Република Бугарија. Постигнувањата на Република Северна Македонија, пријатели, се постигнувања на целиот регион. Дали ќе беше можно да се дознае за нашите зрели одлуки ако не беа медиумите од регионот што ги препознаа тоа? – Не, немаше да се дознае.
Дали ќе беше доволно да зборуваме самите за себе што значат нашите тешки одлуки за чувствителните прашања ако не беа раководствата на БиХ, Србија, Црна Гора, Албанија, Хрватска, Словенија, Косово, ако ја немавме вашата поддршка?! – Не, немаше да биде доволно. Дали ќе беше можно да сме на чекор до полноправно членство во НАТО?! Или поддржани од сите европски институции, дека заслужуваме датум за почеток на преговорите со ЕУ – ако тоа не го препознаеа државите членки на НАТО и на Европската Унија?! – Не немаше да биде можно. Низ пријателствата што ги подадовме кон сите вас и низ пријателствата што ги добивме од сите вас – напредокот на Република Северна Македонија стана реалност.
Затоа, не само Балканот туку и Европа денес е пред предизвикот да го потврди пријателството со Западен Балкан на дело и да ги осигури мирот, стабилноста, економскиот развој и на регионот и на самата Европа“, додаде премиерот Заев.
На крајот од обраќањето пред присутните на свечената академија премиерот Заев упати охрабрување до присутните да продолжи изградбата на пријателства.
„Сакам да упатам силна поддршка на вашата т.н. потрага по пријател. Јас, Зоран Заев, и мојот народ, сме ваши пријатели и тоа ќе го докажуваме постојано низ политиките на меѓусебна поддршка и разбирање затоа што знаеме дека пријателството е живо, само кога вложуваме во него. Продолжете со потрагата по пријатели. Сè додека има потрага по пријатели – ќе има и пријатели“, им се обрати и на организаторите, здружението „Клепсидра“, на свечената академија во Сараево, на која му е доделена наградата „Иса-бег Исаковиќ“.
Наградата што ја доби претседателот на Владата, Заев, се состои во, како што е речено, уникатна скулптура, која претставува калеидоскоп на културното наследство на народите во БиХ, заедно со признанието на оваа награда „Во потрага по пријател“.
https://makfax.com.mk/wp-admin/media-upload.php?post_id=1729504&type=image&TB_iframe=1&width=753&height=589
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски најави две нови странски инвестиции од 80 милиони евра
Премиерот, Христијан Мицкоски, одговарајќи на новинарско прашање, дали има најава за нови инвестиции во државата, информираше дека веќе има потврда за две нови странски инвестиции во вкупна вредност од околу 80-тина милиони евра.
„Па да, ние генерално, преговараме со многу компании коишто доаѓаат надвор од земјава, коишто ќе инвестираат во Македонија. Можам да потврдам дека веќе имаме потврда од две такви. Една турска, една германска, коишто вкупно ќе инвестираат околу 80-тина милиони евра. Извозот којшто двете заедно ќе го прават од Македонија ќе биде над 200 милиони евра и вкупно двете компании би требало да вработат некаде околу 1.000 вработени. Двете не се во автомобилската индустрија, туку во индустрија со висока технологија, што посебно нè прави горди“, изјави Мицкоски.
Премиерот очекува бројот на странски инвестиции во државата значајно се зголемат до крајот на годината.
„До крајот на годината очекувам уште најмалку три потврди, со што ќе го заокружиме овој циклус, а во следната година ќе продолжиме и на овој план да работиме, да ги поддржуваме домашните компании е наш приоритет, но, се разбира, и компании коишто доаѓаат од надвор, а коишто пројавуваат интерес да инвестираат тука, се добредојдени. Фокусот ни е малку да направиме диверзификација на тоа портфолио, да не биде само автомобилската индустрија, туку и ваков тип на инвестиции во висока технологија“, објасни премиерот.
Македонија
(Видео) МВР со засилени превентивни и репресивни мерки против употребата на пиротехнички средства
Министерот за внатрешни работи Панче Тошковски, заедно со директорката на Универзитетската клиника за пластична и реконструктивна хирургија, д-р Јасмина Георгиевска-Павловска и генералниот секретар на Црвениот крст, Саит Саити, денеска на Плоштад „Македонија“ присуствуваа на показна вежба на децата од средното скопско училиште „Владо Тасевски“, во рамки на превентивната кампања „Сигурни празници, без употреба на пиротехника“.
Кампањата се реализира во организација на СВР Скопје – Одделение за превенција и Црвениот крст на Град Скопје, со поддршка на Универзитетската клиника за пластична и реконструктивна хирургија, а нејзиниот фокус е ставен на подигање на јавната свест за сериозните ризици и последици од неовластената употреба на петарди и други пиротехнички средства, особено кај децата и младите.
Министерот Тошковски упати благодарност до сите институции и учесници вклучени во кампањата, нагласувајќи дека заштитата на животот и здравјето на најмладите е врвен приоритет.
„Овие превентивни активности имаат огромно значење. Ниту една прослава не вреди колку здравјето и животот на нашите деца. Благодарност до Црвениот крст, до Клиниката за пластична хирургија, до Средното училиште ‘Владо Тасевски’ и до учениците кои со своето учество испратија силна порака до јавноста“, изјави министерот Тошковски.
Во своето обраќање, министерот посочи дека Министерството за внатрешни работи годинава бележи значително зголемена откривачка активност во делот на нелегалната пиротехника.
„Заклучно со месец ноември 2025 година, откриени се околу 155.000 парчиња пиротехнички средства, што е речиси трипати повеќе во споредба со 2024 година, кога беа откриени околу 52.000 парчиња. Само во текот на овој месец, во рамки на посебна оперативна акција, запленети се дополнителни над 30.000 парчиња пиротехника“, истакна Тошковски.
Тој нагласи дека овие бројки се доказ за интензивната работа и посветеноста на полициските службеници, но воедно и аларм за големиот обем на пиротехнички средства што циркулираат во државата.
„Ќе продолжиме со решителни репресивни мерки, но превенцијата е суштинска. Мораме заеднички да ја подигнеме свеста дека пиротехниката не е неопходна за убави празници. Оваа порака ќе ја пренесуваме не само во Скопје, туку и низ целата држава“, порача министерот за внатрешни работи.
Министерството за внатрешни работи апелира до граѓаните да се воздржат од користење на пиротехнички средства и заеднички да придонесат кон безбедни и мирни празници за сите.
Македонија
Отворен почесен конзулат на Австрија во Битола
Денеска во Битола беше отворен конзулатот на Австрија, а функцијата почесен конзул ќе ја врши битолчанецот Игор Божиновски. Конзулатот на Австрија се наоѓа на улицата „Виенска“.
На свеченоста која се одржа се обрати австрискиот амбасадор Мартин Памер, македонскиот министер за надворешни работи и надворешна трговија Тимчо Муцунски, конзулот Игор Божиновски и градоначалникот на Битола Тони Коњановски.
Градоначалникот Коњановски пред присутните ја истакна важноста на отворањето на уште еден конзулат во Битола, а со тоа и интензивирање на соработката со Австрија.
„Битола од денеска е побогата за уште еден конзулат, сега од пријателската држава Австрија, со што го враќаме епитетот Битола конзулски град“, истакна Коњановски пред присутните гости, дипломатскиот кор, пратеници и други гости.
Со ова Битола има седум почесни и два генерални конзулати.

