Македонија
(Видео) Заменикот успеа да ја разреши Дамева по кавгите, таа рече: Одредени лица од политиката ќе бидат задоволни со ова

Претседателката на Судскиот совет, Весна Дамева, е разрешена од функцијата, констатира нејзиниот заменик Селим Адеми. По кавгите што траеја речиси четири часа, а кога Дамева одби да се стави на гласање точка што ја немаше на дневен ред, нејзиниот заменик реши да се гласа со кревање рака. Седум члена го поддржаа заменикот, кој го презеде раководењето на седницата при нејзино присуство.
„Претседателката е разрешена и веќе не може да раководи со седницата. Утре, во 11 часот закажуваме нова седница. За денеска седницата е завршена“, констатира заменик-претседателот на Судскиот совет, Селим Адеми.
Дамева бараше да се констатира дека ѝ е одземено раководењето со седницата иако таа е присутна.
„Претседателот, иако е во салата, заменикот самоволно му го одзема раководењето и става точка на дневен ред. Јас сум ваш заложник и на луѓето што ви дадоа налог за седницата да се прекине“, рече Дамева.
На крајот, Дамева рече дека ако оваа одлука биде озаконета, лица од политиката ќе бидат задоволни.
„Ви благодарам многу, ме спасивте мене, оваа одлука е противзаконска. Но, нечии желби треба да бидат исполнети. Со гласање од седум гласа, каде што нема утврдено ниту основ за разрешување ниту број на гласови со кои се носи одлуката, ме разрешуваат… Ова не знам како ќе заврши, освен што одредени лица од политиката ќе бидат задоволни од ова. Судскиот совет се вклучи во анархија. Сè излезе од контрола. На мое присуство ми зеде право на збор. Избор се прави со осум гласа, а се зема мандат со седум гласа“, додаде Дамева.
Посочи дека многу работи ќе бидат уште полоши.
Претходно, имаше караници и престрелки во Судскиот совет. Имаше и барање за разрешување на Весна Дамева од претседателската функција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Гаши на Светскиот ден за подигање на свеста за аутизмот: Секој поединец, без разлика на различностите, има свој единствен свет

На Светскиот ден за подигање на свесноста за аутизмот – 2 Април, претседателот на Собранието Африм Гаши пречека во својот кабинет група деца, родители, наставници и претставници на различни здруженија, на кои им упати порака дека вакви средби се од непроценливо значење во градењето на општество со еднакви можности за сите.
Вакви средби, рече Гаши, поттикнуваат на слушање и на учење, а пред се ја истакнуваат важноста на прифаќањето и почитувањето на различностите.
„Секое дете кое беше меѓу нас денес ни покажа дека секој поединец, без разлика на различностите, има свој единствен свет, свои бои, бесконечен потенцијал и душа која заслужува шанса да лета. Овој настан, покрај незаборавниот момент, е и можност за изградба на почувствително и обединето општество за оние кои нè потсетуваат дека убавината на животот лежи во богатството на нашите различности“, истакна Гаши.
Гаши со внимание ги слушаше грижите и предизвиците на родителите и наставниците, ветувајќи дека, во рамки на своите можности, ќе преземе се што е потребно за подобрување за подигнување на стандардите за живот стандард на лицата со аутизам.
Тој нагласи дека Собранието, со ангажираност и почит, останува отворено за слушање и подобро разбирање на потребите и потенцијалот на лицата со аутизам.
Македонија
Тројца пациенти денеска се враќаат од Шведска и од Грција

Министерството за здравство информира дека тројца пациенти од повредените лица од пожарот во Кочани се враќаат во земјата, од кои двајца беа хоспитализирани во Грција и еден во Шведска. Во согласност со протоколите ќе бидат задржани под 24-часовен надзор.
Во Србија остануваат хоспитализирани 23 пациенти, Бугарија 14 паценти, Турција 10 пациенти, Грција 8 пациенти, Словенија 4 пациенти, во Унгарија, Хрватска, Шпанија, Австрија и во Литванија се хоспитализирани по 3 пациенти, во Италија и воПолска по еден пациент.
Во Скопје на Клиниката за токсикологија вчера беше хоспитализиран пациент по враќањето од Полска, тој денеска се пушта на домашно лекување.
На Клиниката за пластична хирургија остануваат двајца пациенти, а на хируршката клиника „Св. Наум Охридски“ има 6 пациенти.
Во ГОБ „8 Септември“ се хоспитализирани 5 пациенти, од кои еден е планирано да биде пуштен на домашно лекување, на Клиниката за пулмологија двајца пациенти, а во приватната болница „Систина“ се хоспитализирани тројца пациенти.
Министерството за здравство внимателно ја следи состојбата на повредените пациенти и останува во постојана комуникација со медицинските тимови во земјата и странство, посветено на обезбедување најдобра можна нега за повредените од несреќата во Кочани, велат од Министерството.
Македонија
Општина Центар почна со редовна пролетна дератизација

Општина Центар започна со редовна пролетна дератизација на целата територија. Во текот на следните две недели ќе бидат опфатени над две илјади шахти, со цел уништување на штетни глодари и инсекти, како и превенција од можни заразни болести.
Дератизацијата се спроведува два пати годишно, во пролет и есен, и претставува една од клучните мерки што Општината ги презема за заштита на здравјето на населението.
Општина Центар информира дека препаратот што се користи за дератизацијата е селективен, сертифициран од овластен производител и е специјално дизајниран за контрола на популацијата на глодари. Препаратот е одобрен од Министерството за здравство на Република Северна Македонија и не претставува ризик за другите животински видови.