Македонија
(Видео) Иванов: Градоначалниците на ВМРО-ДПМНЕ покажаа дека се само продолжена рака на нивниот патрон Христијан Мицкоски

За речиси четири години градоначалниците на ВМРО-ДПМНЕ покажаа дека се само продолжена рака на нивниот патрон – Христијан Мицкоски. Наместо мерки и политики во служба на граѓаните, сведоци сме на нефункционални општини и коруптивни шеми, реагира Павел Иванов, претседател на ОО СДСМ Штип.
Според него, Општината Штип е само една од општините каде градоначалниците на ВМРО-ДПМНЕ, по стапките на Мицкоски, ја претвораат локалната самоуправа во сервис за лични бизнис интереси, а не во сревис за граѓаните.
„Наместо извинување и отчет пред штипјани, ВМРО-ДПМНЕ без срам, повторно го предлага Иван Јорданов за кандидат за градоначалник. Истиот тој градоначалник кој четири години ја води општината крајно недомаќински, неспособно и коруптивно. Дали ВМРО-ДПМНЕ мисли дека Штипјани се граѓани од втор ред и немаат право на достоен живот во сопственото родно место“, прашува тој.
Општинината, како што вели, наместо развој, доживува застој.
„Ветените проекти се само на хартија. Во услови кога трошоците за живот секојдневно растат, кога граѓаните едвај врзуваат крај со крај, градоначалникот Јорданов дополнително удри по џебот на граѓаните. Цената на водата порасна за 26%, Канализацијата за 16%, Сметот за цели 110%, Данокот на промет за 33%. Зголемени се и цените за паркинг, такси превоз, надомест за градежно земјиште и имотен данок“.
Додава дека додека Штипјани мора да ја полнат локалната буџетска каса, општинската администрација ја тресат скандали.
„18 милиони денари потрошени за нафта што никој не знае каде и за што завршила. Секретарката на Општината гради дивоградба, а никој не презема одговорност. Се продаваат заштитени објекти како хотел „Гарни“ по смешни цени. Општински имот како магацини, простории, земјиште – се распродадени без план и визија. Клиничкиот центар е претворен во огласна табла за партиски вработувања – таму се и сопругата на Јорданов и братот на портпаролот на ВМРО Штип“.
Според него, во овие скоро четири години во Штип се реализираат само проекти кои се од личен бизнис интерс на партијата и градоначалникот. Како што е изградбата на фонтана со средства наменети за кровот на Штипската гимназија.
„Денес, Штип е сообраќајно задушен, без паркинг, без семафори на клучна крстосница, со депонија што гори секој ден и прекини на вода во лето. ЈП Исар тоне во долгови, а за првпат по 40 години не се одбележа ни Денот на пожарникарите. Ова е резултатот на владеењето на ВМРО-ДПМНЕ во Штип – скапа и лажна пропаганда, распродажба на ресурси, неисполнети ветувања и расипничко трошење на народните пари. Граѓаните веќе ги препознаваат лошите политики на ВМРО- ДПМНЕ. СДСМ нема да молчи пред ваквото расипништво“
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Буџетот на Чаир, Бујар би го потрошил за една недела, државниот ревизор му ги извади валканите алишта на виделина

Кандидатот за градоначалник на Чаир од коалицијата „Вреди“, Изет Меџити, денеска реагираше на начинот на кој поранешниот министер Бујар Османи ги менаџирал јавните пари, предупредувајќи дека злоупотребите и вештачки надуените цени во тендерите се директна опасност за секоја институција и за буџетот на граѓаните.
„Ако само замислиме дека со вакви цени, со вакви рекетирања, Бујар ќе ја косеше тревата во Чаир исто како во салата ‘Борис Трајковски’, тогаш е јасно дека буџетот на општината ќе се проголта за една недела. Со таков начин на лошо менаџирање, наставниците ќе останеа без плати, а граѓаните без основни услуги“, изјави Меџити.
Тој се повика на последниот извештај на Државниот завод за ревизија, кој како што оцени, констатирал сериозни злоупотреби при организацијата на дводневен самит, за кој биле потрошени околу два милиони евра државни пари.
„Овде не станува збор за мои зборови или политички обвинувања. Овде зборуваат фактите, документите и официјалните извештаи. А кога еден министер троши два милиони евра за дводневен самит, додека граѓаните се мачат со инфраструктура, образование и основни услови, тоа е непростливо“, нагласи Меџити.
Тој потсети и на времето кога Османи беше министер за здравство, споменувајќи дека во Гинеколошката болница во Чаир тогаш добил прекар „пациентот“ – што според него е симболичен показател за неуспешното раководење со институциите.
Меџити кој денес оствари посета на ОУ “Васил Главинов” порача дека Чаир заслужува транспарентно управување, реални инвестиции и грижа за граѓаните, а не злоупотреби и тендери со рекетирање.
„Граѓаните имаат право да знаат каде завршуваат нивните пари. Моја обврска како иден градоначалник е да ја вратам довербата и да го заштитам буџетот на Чаир од вакви злоупотреби“, заклучи тој.
Македонија
На Табановце се чека околу 30 минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 30 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.