Ќе помине ли Договорот со Грција без потпис од претседателот Иванов? Слично како и со законот за употреба на јазиците, кој повеќе од пет месеци стои во фиока, се отвора прашањето дали и овој пат претседателот на државата ќе го закочи процесот или може и без неговиот потпис , законот за ратификација на договорот со Грција да се објави во „Службен весник“? Уставните експерти се со различни мислења. Професорот по уставно право Темелко Ристески го охрабрува претседателот на Собранието Талат Џафери да го испрати указот во Службен весник со негов потпис, ако Иванов направи преседан и не ја исполни уставната обврска.

„Стана пракса кај нас претседателот на државата да не го почитува уставот, но ќе одговара пред законот за тоа еден ден. Указот може да го потпише само претседателот на Собранието и со тоа да се објави во Службен весник. Џафери го претставува Собранието, таму седат мнозинството пратеници кои го донеле законот. Пратениците се избрани од мнозинството граѓани, тоа е волјата на мнозинството граѓани, која е појака од волјата на претседателот како поединец,“ вели Ристески.

Не може без потпис од Иванов, дециден е професорот Апасиев. Според него, самиот договор е неуставен, бидејќи е потпишан од страна на министерот за надворешни работи, но ако законот за ратификација на договорот се објави во Службен весник без потпис од претседателот на државата, тоа е кривично дело.

„Нема правен механизам да се замени потписот на претседателот Иванов или да се присили да потпише. Точно е дека Иванов ако не потпише ќе го прекрши Уставот, но за тоа постои „импичмент“, кој Заев веќе го најави. Но ако претседателот на Собранието се потпише и законот се објави само со неговиот потпис ќе одговара кривично“, вели професорот Димитар Апасиев и додава и потсетува на процедурата за „импичмент“ со која не е доволно две-третини од пратениците да гласаат „за“, бидејќи за да добие правна сила „импичментот“ , треба претседателот да се разреши со двотретинско мнозинство од уставните судии.

По ратификувањето во Собранието со поддршка од 69 пратеници, законот беше испратен до претседателот Иванов кој сега има рок од седум дена да го потпишше указот или да го врати во Собранието, каде е потребно апсолутно мнозинство за второто гласање. По тоа, претседателот на државата е должен да го потпише законот. Во спротивно, премиерот Заев најави импичмент, а Иванов го повтори ставот дека нема да го промени мислењето за Договорот со Грција, и во случај владејачкото мнозинство да собере 81 пратеник.