Македонија
(Видео) Шилегов: Инспекторатот на град Скопје со рекордни резултати во 2019 година

Инспекторатот на Град Скопје во 2019 година во секоја област на своето дејствување бележи рекордни позитивни резултати кои се видливи за граѓаните, рече градоначалникот на град Скопје, Петре Шилегов.
„Инспекторатот на Град Скопје е прва институција од ваков вид во нашава држава која е достапна за граѓаните 24 часа дневно и е целосно транспарентна во својата работа. Воведовме 24 часовно дежурство на комуналните инспектори. Вршиме секојдневни контроли на градилиштата, на подземните контејнери, спроведуваме акции во соработка со МВР за отстранување на нелегални продавачи на Бит-пазар, на Зелениот пазар, пазарот во Ченто и пазарот „Буњаковец“, на улицата Македонија, на плоштадот „Македонија“ и на други локации. Успешно ја спроведовме првата кампања за собирање остатоци од берба на стрништата, а беа изречени и казни за палење стрништа. Минатата, 2019 година, Секторот Инспекторат на Град Скопје бележи зголемување на обемот на работа на сите видови инспекции“ рече Шилегов.
Зголемените активности на секторот, објасни Шилегов, се резултат на поодговорен пристап на инспекторите и нивната работа во сите области за кои е надлежен Инспекторатот на Град Скопје.
„Трета година по ред ја спроведуваме кампањата за справување со огновите на отворено, на телефонскиот број 193. Во однос на комуналната инспекција, за 134% е зголемено постапувањето на инспекцијата по барање на граѓани (односно од 82 барања во 2018 година на 192 барања во 2019 година). За 237% е зголемен контролниот инспекциски надзор на комуналните инспектори (во 2018 година – 92, а во 2019 година – 310 контролни надзори). Во 2019 година изречени се 127 платни налози што е за 807% повеќе во однос на 2018 година (14 налози). Процесирани се 115 барања за поведување прекршочна постапка во 2019 година, што е за рекордни 1.177% повеќе во однос на 2018 година (9 акти)“ истакна градоначалникот Шилегов.
Додаде дека зголемена реализација на активности бележи и Одделението за комунални редари. Во 2019 година поднесени барања за прекршочни постапки се 1.120, што е за 77,7% повеќе во однос на 2018 година. Изречени мандатни казни во 2019 година се 72, а во 2018 година 31, што е зголемување за 132%.
Инспекцијата за животна средина во 2019 година извршила 274 редовни инспекциски надзори, односно 117% повеќе од 2018 година. Во 2019 година вонредните инспекциски надзори се зголемени за 300% во однос на 2018 година, односно, во 2019 година спроведени се 49 инспекциски надзори, а во 2018 година – 12. За 300% зголемен е и вонредниот инспекциски надзор со акредитирана лабораторија, односно во 2019 година имало 12 надзори, а во 2018 година – 3.
Инспекцијата за патен сообраќај во 2019 година извршила 271 редовен инспекциски надзор, што е 134% повеќе од 2018 година. Зголемен е и бројот на контролни инспекциски надзори за 66% и вонредни инспекциски надзор за 600% во однос на 2018 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Левицата предлага надзорна расправа за катастрофата во Кочани

Пратеникот од Левица, Борислав Крмов, соопшти дека како пратеник од Изборната единица 3, иницирал Надзорна расправа во врска со трагедијата во Кочани со цел, како што рече, да се расветлат сите пропусти.
„Во овие моменти кога сѐ уште не е поминат шокот од незамисливата национална катастрофа која се случи во Кочани, ние како пратеници и како Собрание, посебно пратениците од ИЕ 3, мора да поднесеме и морална одговорност. Поради тоа, денес, јас, како пратеник од ИЕ 3, покренувам иницијатива за Надзорна расправа во Собранието околу катастрофата што ни се случи во Кочани“, кажа пратеникот од Левица.
Додаде дека расправата е планирана во постојаната Анкетна комисија за слободите и правата на граѓанинот со која раководи Димитар Апасиев. Но, рече тој, отворени сме да биде и на било која друга комисија која и одговара на власта и на остатокот од опозицијата.
„За таа цел се потребни се минимум 15 потписи и ние ги даваме нашите шест. Отвараме простор да има и Анкетна комисија, има постојана Анкетна комисија во која може да се одржи расправата, но има и времена Анкетна комисија. Во тој случај ќе се повикаме на член 76 став 3 од Уставот, за која се потребни дваесет потписи и апсолутно, на нас не ни е битно ние да го водиме процесот, поентата е да се почне сега и веднаш за да се дојде до одговорите кои ни се потребни“. објасни Крмов.
За жал, додаде тој, гледаме дека ВМРО-ДПМНЕ и СДСМ се препукуваат во медиумите, околу надзорна или анкетна, дали треба да има, или не, дали и за другите катастрофи, дали за Кочани итн.
„Ние мислиме дека нема време за ова, доволно време одмаравме, треба да се делува што побргу. Мора да се види каде потфрлија органите на државната управа, зошто ни се случи ова што ни се случи и кои индивидуи се одговорни“, потенцираше пратеникот Борислав Крмов.
Македонија
Талески до Тошковски: Кој му ги доставил доверливите информации на обезбедувачот на премиерот?

Пратеникот на СДСМ, Миле Талески, на денешната собраниска седница посветена на пратенички прашања упати прашање до министерот за внатрешни работи, Панче Тошковски, кој му ги доставил доверливите информации на Самараков, член на обезбедувањето на премиерот, Христијан Мицкоски.
„Ангел Самараков, припадник на најтесното обезбедување на премиерот Мицкоски, беше фатен како одава доверливи информации. Со докази, со видео, со фотографии. Фатен жив. Како е можно лице со такво однесување и поврзаност да биде дел од обезбедувањето на премиерот е прашање што лебди во јавноста оти Самараков не е случајна фигура во безбедносниот тим на премиерот. Тој е долгогодишен партиски кадар на ВМРО-ДПМНЕ, неговата сопруга беше кандидат за советник од истата партија. А не е ниту изолиран случај. Ова е втор скандал за кратко време. Пред само неколку месеци јавноста дозна дека шефот на обезбедувањето на премиерот физички нападнал полицаец кој бил на должност за време на акција против трговија со дрога“, рече Талески.
Овие инциденти, додаде тој, отвораат сериозни прашања за безбедносниот апарат, но и за можната поврзаност на луѓе од власта со криминални структури.
„На неговото ниво, во структурата на МВР, тој немал пристап до таков вид информации, значи морало да има некој што има пристап за да му ги даде. Затоа Ви го поставувам следното прашање: Кој му ги доставил доверливите информации на лицето Ангел Самараков? Граѓаните имаат право да знаат дали безбедносниот систем воопшто функционира или служи на лични интереси поврзани со подземјето. Мора да има одговорност, транспарентност и итна постапка за расчистување на овие наводи. Затоа што ова е борба за каква држава ќе бидеме – правна и безбедна или заробена од мафијата“, рече Талески.
Македонија
Пациент од Австрија се враќа дома по пожарот, стигнаа и странски тимови за рехабилитација

Министерството за здравство информира дека еден пациент од повредените во пожарот во Кочани, кој беше хоспитализиран во медицински центар во Австрија, денеска се враќа во државава по што во согласност со протоколите ќе биде задржан под 24-часовен надзор.
Со тоа во странските медицински центри се третираат 80 пациенти, од кои двајца се лекуваат амбулантски, а нема промена во нивната состојба во однос на минатите денови.
Инаку, во изминатото деноноќие на Клиниката за пластична хирургија е примен пациент, кој е вратен од Грција, и по неопходните испитувања, ќе биде пуштен на домашно лекување. Во моментот на оваа Клиника се хоспитализирани тројца пациенти.
Во изминатото деноноќие нема згрижени пациенти на Клиниката за токсикологија.
Во ГОБ „8 Септември“ се хоспитализирани 3 пациенти, а во Хируршката клиника „Свети Наум Охридски“ остануваат 6 пациенти, кои се хоспитализирани на одделение.
На Клиниката за пулмологија се хоспитализирани двајца пациени, а во приватните установи останува непроменета состојбата со бројот на хоспитализирани пациенти.
Пристигнати се и тимови од странство со големо искуство во областа на рехабилитација на пациенти со изгореници, кои во моментот прават евалуација на просторните услови и на апаратурата во неколку центри за рехабилитација на пациенти со изгореници.
Министерството за здравство останува во постојана комуникација со медицинските тимови во земјата и странство, посветено на обезбедување најдобра можна нега за секој пациент од повредените во несреќата во Кочани.