Македонија
(Видео) Каевски: ВМРО-ДПМНЕ да ги прифати мерките на СДСМ за борба против загадениот воздух во Скопје
ВМРО-ДПМНЕ да ги прифати мерките на СДСМ за борба против загадениот воздух во Скопје, порача на прес-конференција, портпаролот на СДСМ и пратеник, Дарко Каевски.
Каевски рече дека загадувањето на воздухот е алармантна тема која бара преземање неодложни мерки, па затоа непреземањето ништо од страна на локалната власт на ВМРО-ДПМНЕ во Скопје е неодговорно и на штета на скопјани.
„Повикуваме во ВМРО-ДПМНЕ да се вразумат. Водењето инает и бегањето од вонредна седница на Советот на Град Скопје од страна на ВМРО-ДПМНЕ е неразумно и неодговорно. СДСМ како одговорна политичка партија има иницијатива за вонредна седница на Советот на Град Скопје и неколку клучни мерки за намалување на загадувањето во главниот град.
Мерка 1: Итно зголемување на бројот на автобуси на сите линии во јавниот градски превоз.
Мерка 2: Воведување бесплатен превоз за сите граѓани во Скопје.
Хаосот и нефункционалноста на јавниот превоз е директна причина за зголемување на загадувањето. Овие две мерки директно ќе влијаат на намалувањето на бројот на возила во градот и ќе стимулираат користење на јавниот превоз.
Мерка 3: Итна промена на средства во Буџетот на Град Скопје, за зголемување на парите за борба против загадувањето.
Додека скопјани дишат загаден воздух локалната власт на ВМРО-ДПМНЕ ги намали парите за животна средна за дури 44%.
Тоа е Буџетот на Скопје којшто со аплауз го изгласаа советниците на коалицијата на ВМРО-ДПМНЕ и Левица, и во кој се намалени парите за животна средина за 44%.
Ова предлагаме да се промени и да се зголемат парите.
4. Финансиска помош за училиштата за адаптирање на системот за затоплување на еколошки енергенси, (замена на котлите во системот на затоплување).
5. Изготвување акциски план за чистење на сите депонии во Скопје.
6. Чистење/миење на улиците и јавните површини со помош на цистерни.
7. Безусловно интензивно постапување на инспекторите во вршењето на својата должност.
Ги повикуваме во ВМРО-ДПМНЕ да ги прифатат мерките на СДСМ“, рече Каевски.
Пратеникот додаде дека измина цела година откако локалната власт е во рацете на ВМРО-ДПМНЕ и нивната коалиција, заедно со Левица и нивната градоначалничка Арсовска a ништо не е преземено.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Дурмиши ќе учествува на конференција на министри за економија во рамки на Берлинскиот процес во Берлин
Министерот за економија и труд Бесар Дурмиши утре ќе учествува на конференција на министри за економија во рамки на Берлинскиот процес која се одржува во Берлин, Сојузна Република Германија.
Дурмиши со колегите министри за економија од земјите од Западен Балкан на бизнис формум ќе дискутираат на тема “10 години Берлински процес-Западен Балкан како економска област на патот на ЕУ“.
На конференцијата на министри покрај Дурмиши ќе присуствуваат министрите за економија на Албанија, Србија, Косово, Црна Гора, Босна и Херцеговина.
Берлинскиот процес беше воспоставен во 2014 година како платформа за соработка на високо ниво меѓу високи официјални претставници на шест земји од Западен Балкан и нивните колеги во Земјите домаќини на Берлинскиот процес.
Процесот ги вклучува и институциите на ЕУ, меѓународните финансиски институции и граѓанското општество во регионот, Регионалната канцеларија за младинска соработка RYCO и бизнисите.
Македонија
Тошковски од Охрид: Имплементација на научните достигнувања овозможува подобро да се справуваме со предизвиците на безбедноста
Денеска министерот за внатрешни работи се обрати на 15. Меѓународна научна конференција на тема „Современи безбедносни предизвици и зајакнување на отпорноста на земјите од Југоисточна Европа“ која се одржува во Охрид 23-24 септември, во организација на Факултетот за безбедност – Скопје и фондацијата „Фридрих Еберт“. Тошковски ја упати својата благодарност до организаторот за можноста да се обрати пред реномираниот собир на експерти од областа на безбедносните науки и истакна дека конкретната тема посебно погледната од аспект на моменталните глобални трендови и случувања бара сериозно експертско анализирање со цел проекција на решенија кои имплементирани ќе ја гарантираат безбедноста и отпорноста на регионот.
„Унапредување на науката и академското истражување на степен на којшто заслужува е нужно не само за научната фела, туку и за практиката како таква. Ако сакаме да зборуваме за безбедно општество, борба против сите видови сериозен криминал, нужно е да ги дискутираме темите и на ова академско и експертско ниво со цел заклучоците и научните факти кои ќе произлезат од ваквите настани, да ги имплементираме во институциите со што ќе го зголемиме нивното ниво за да се борат со сите предизвици како што се организираниот криминал, сајбер криминалот и високата корупција. Научната мисла мора да го даде својот придонес во секој од овие пилари во кои институциите како МВР ќе треба да се развиваат во иднина.“, потенцираше Тошковски.
На крајот на своето обраќање Тошковски нагласи дека со имплементирање на научната мисла и достигнувања создадени на вакви конференции и форуми овозможува подобро да се подготвиме за сите предизвици кои не очекуваат во иднината и кои се клучни за безбедноста на државата, регионот и пошироко.
Македонија
Средба Муцунски – Гераптеритис во Њујорк: почитувањето на меѓународното јавно право е од суштинско значење за обезбедување на иднина заснована на заеднички просперитет
На маргините на Генералното собрание на ОН, денеска министерот за надворешни работи и надворешна трговија, Тимчо Муцунски, се сретна со министерот за надворешни работи на Република Грција, Јоргос Герапетритис.
Оваа средба претставува важен чекор напред во зајакнувањето на регионалната соработка и значајно унапредување на дипломатските односи. Во текот на конструктивната дискусија посебно внимание беше посветено на можностите за развој на трговијата, инфраструктурата и инвестициите во енергија, како клучни области, каде постојат реални можности за проширување на соработката.
Почитувањето на меѓународното јавно право е од суштинско значење за обезбедување на иднина заснована на заеднички просперитет и одржлив мир. Заемната посветеност на овие принципи е основа за успешна реализација на идни корисни иницијативи и проекти, нагласуваат од МНР.