Македонија
(Видео) Каевски: Врв на срамот е тоа што Мицкоски и ДПМНЕ не го поддржаа законот за македонски јазик

„Пратениците на ДПМНЕ и Левицата не гласаа во Собранието за новиот закон за употреба на македонскиот јазик. ДПМНЕ и Левицата покажаа негрижа и непочитување за македонскиот јазик како столб на македонскиот идентитет. Врв на срамот за една партија е да не поддржи ниту една одлука за македонскиот јазик“, рече Дарко Каевски, пратеник и портпарол на СДСМ.
Според Каевски, Мицкоски треба да излезе пред граѓаните, пред македонската јавност, да се извини и да објасни зошто.
„Христијан Мицкоски и ДПМНЕ досега немаат направено ништо за македонскиот јазик, немаат направено ништо за македонскиот идентитет. Многубројни примери го потврдуваат тоа.
ДПМНЕ не гласаа ниту за соговорот со ФРОНТЕКС, прв договор потпишан на македонски јазик со ЕУ. ДПМНЕ не ги поддржаа ниту заклучоците во македонското Собрание за преговарачката рамка, каде што целосно се заштитени македонскиот јазик и македонската посебност во ЕУ. Мицкоски и ДПМНЕ не лобираа и не направија ништо ниту кога германскиот Бундестаг донесе резолуција за македонскиот јазик, идентитет и култура“, рече пратеникот.
„Тоа се истите оние од ДПМНЕ, кои ширеа лаги за бугаризација и асимилација, а не гласаа за македонскиот јазик во македонското Собрание. Истите оние што го нарекуваа Блаже Конески џуџето од Небрегово. Тоа се најголемите штетници за државата“, вели Каевски.
Според пратеникот, со законот за македонски јазик се обезбедува дополнителна заштита, унапредување и збогатување на македонскиот јазик. Се прошируваат областите за употребата на македонскиот јазик и неговото кирилско писмо, како и опсегот на лекторирање.
„Еден од новитетите во законското решение е создавање инспекторат за употреба на јазикот, но и дополнително изучување и афирмација на јазикот во странство. СДСМ се гордее за сѐ она што го има направено за заштита, унапредување и признавање на македонскиот јазик. Ние тоа го должиме како генерација социјалдемократи на оваа држава и овој народ. Но, ќе остане запаметено дека ДПМНЕ и Левицата, освен деструкции, блокади и штета на државата, не направиле ништо“, додаде тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сончево и топло време, максималната температура до 34 степени

Времето денеска ќе биде сончево и топло со мала до умерена облачност. Ќе дува слаб до умерен ветер од јужен правец. Минималната температура ќе биде во интервал од 8 до 17, а максималната ќе достигне од 27 до 34 степени.
Во Скопје, сончево и топло со мала до умерена облачност. Ќе дува слаб до умерен ветер од јужен правец. Минималната температура ќе се спушти до 16, а максималната ќе достигне до 33 степени.
Времето во наредните денови
Во среда ќе се задржи сончево и топло време со мала до умерена облачност. Од четврток до недела ќе преовладува променливо облачно и нестабилно време со локален пороен дожд, грмежи и засилен ветер. Дневната температура ќе биде во постепено опаѓање.
Македонија
Меџити го претстави мега-спортскиот проект во Чаир

Првиот Заменик-претседател на Владата и министер за животна средина и просторно планирање, воедно и кандидат за градоначалник на општина Чаир, Изет Меџити, денес го претстави најголемиот спортски проект во историјата на Чаир, трансформација на напуштениот базен во нов, модерен спортски и рекреативен центар.
Овој амбициозен проект, конципиран по примерот на познатите спортски центри „Јане Сандански“ во Аеродром и „Борис Трајковски“ во Карпош, има за цел да донесе мултифункционален центар според европски стандарди, во срцето на Чаир.
„Комплексот ќе содржи: голема спортска сала за ракомет, одбојка и кошарка со капацитет од над 3.000 гледачи, затворен фитнес центар, сали за пинг-понг и боречки спортови како карате и бокс; како и надворешни игралишта за мал фудбал и две кошаркарски игралишта – отворени и достапни за сите граѓани”, информираше Меџити.
Според него, проектот ќе се реализира преку јавно-приватно партнерство, при што Општина Чаир ќе ги обезбеди сите правни и институционални предуслови во целосна соработка со централната власт.
„Инвеститорот што ќе биде избран, ќе има обврска да изгради центар што ги исполнува современите стандарди и да понуди одржлив модел на функционирање. За возврат, ќе има право да го користи комплексот во рок од 20 до 30 години“, изјави Меџити.
Тој додаде дека по истекот на тој период, овој модерен спортски и рекреативен центар ќе стане целосна сопственост на Општина Чаир и на сите наши граѓани. Со одлука на Влада на РСМ е дадено на трајно користење на Општина Чаир и Општината може да управува односно да ги спроведе сите процедури кои се потребни за реализација на овој проект.
Време е и Чаир да добие спортски центар од европски ранг, порача Меџити за време на презентацијата.
Македонија
(Видео) Полицискиот хеликоптер денеска фрли повеќе од 30 тони вода врз дел од пожарите

Денеска полицискиот хеликоптер Бел 412 беше ангажиран во два наврати за гасење пожар во реон на село Русиново и во реон на село Никуштак на Скопска Црна Гора и притоа исфрли преку 30 тони вода, соопшти МВР.
– Активностите на полициските хеликоптери продолжуваат и во наредните денови, се до целосно гасење на пожарите на територијата на целата држава, известува МВР.