Сашо Дуковски, адвокат на ексминистерката за култура Елизабета Канческа-Милевска, посочи дека ослободителната пресуда само ги потврдува наводите што тие ги имале. Според него, ова е прво полувреме бидејќи чекаат жалба на Апелација, каде што одново ќе треба да се докажуваат дали слободата на Канческа-Милеска и другите обвинети е оправдана.

„Првин би кажал две работи – одредбите од Законот за кривичната постапка предвидуваат дека судот ја донесува пресудата врз основа на доказите изведени на главната расправа. Втората важна работа што овде треба да се напомене е дека обвинителот е тој што треба надвор од разумно сомневање да ја докаже вината на обвинетите. Ниту едното ниту другото не беше сторено во текот на оваа долга постапка, која траеше шест години. Сè што беше кажано беше индиција и чиста претпоставка и со ништо докажани наводи, кои не може да бидат на ранг на индиции, а камоли на цврст доказ врз кој ќе се заснова осудителна пресуда“, рече Дуковски.

За него, ова е владеење на правото.

„Жалосно е што овие обвинети, без каква било вина, беа подложни на шестгодишна судска постапка со мерки за безбедност, со потпишување во судот, со одземени патни исправи. На крајот, се докажа она што ние го тврдиме – нема ниту еден доказ со кој се утврдува вина. Ваквите пресуди укажуваат како треба да се анализира еден кривично-правен предмет и како треба да се постапува во смисла на еднаквост на странките во постапката. Со ова постапката не завршува – ова е прво полувреме. Застапникот на обвинението ќе поднесе жалба, но цврсто сум уверен дека со оглед на фактите што се презентирани, пред сè, супервештачењето, не може ниту еден суд да донесе поинаква пресуда од ослободителна. Едно е политика, друго е владеење на правото“, додаде Дуковски.

Претходно, Осман Шабани досуди ослободителна пресуда по пет години судење.