Македонија
(Видео) Караница, обвинувања, престрелки во Судскиот совет: „Ова е страшно, ова на ништо не личи“
Селим Адеми, потпретседател на Судскиот совет, ја обвини претседателката Весна Дамева дека го блокирала изборот на судии во Апелација со непотпишување на анекс-договорот. Таа возврати дека штетни договори нема да потпишува и дека за таков чекор треба некој да одговара. Потоа се скараа Дамева и Павлина Црвенковска, која сега е член на Судскиот совет, а претходно беше претседателка. Адеми ѝ рече на Дамева да не ја обвинува Апелација кога таа кочи избор на судии.
„Вие донесовте блокада со непотпишување на анекс-договорот… Вие дојдовте и правите тотална блокада во Апелација и да нема избор на осум судии. Вие сте таа што ја обвинува Апелација. Затоа кажувам, кон тие судии имам голема почит бидејќи се борат со многу помал број на судии, а тоа го знаат подобро од Апелација. Вие го кочите изборот на осум судии и треба да има одговорност. Вие сте биле координатор на Кривичниот суд, што можеби обвинувањата за застојот на предметите се таму, што имате направено за три години?“, рече Адеми.
Возврати Дамева.
„Во однос на блокирање на изборот во Апелација, јас кога седнав на местото претседател на Судскиот совет, реков штетен договор не потпишувам. Нема законски основ да се потпише таков договор. Кој потпишувал пред мене, тоа не е важно. Тоа е тема за анализа со која другите органи ќе се занимаваат. Јас, почитуван заменику, тоа добро го знаете и не знам зошто го прикривате како факт – веќе се имам обратено до премиерот и вицепремиерот да изнајдат начин бидејќи ова е нивна агенција. Мене ми е жал што за тие штетни договори некој ќе мора да одговара“, одговори Дамева.
Експретседателката Црвенковска бараше од Дамева да не зборува повеќе од сите и да го почитува Деловникот.
„Претседателке, почитувајте го Деловникот“, рече Павлина Црвенковска.
Дамева врати: „Вие нема да ми укажувате, кога бевте на ова место, ги водевте седниците и многу често не ми дававте право на збор. Ова е сензитивна тема и не сакам да се стекне друг впечаток“.
„Немојте со лични навреди. Зборувате повеќе од пет минути“, рече Црвенковска.
Дамева му даде збор на членот Ивица Николовски, а во збор му влезе Црвенковска.
„Вам не ви дадоа збор, дозволете, не влегувајте ми во збор. Јас имам збор, дај да се почитуваме“, ѝ рече Николовски.
Црвенковска се покажа дека не ѝ даваат збор.
„Ќе ви дадеме, почитувана колешке, полека“, извика Дамева.
„Одредени членови добиваат право на збор, а јас никогаш кога кревам рака, не ми се дава збор“, се покажи Црвенковска.
Дамева ѝ возврати: „Во ред, кревајте ја повисоко, колешке, ќе ве видиме. Можеби премногу сте седнати. Никогаш не се случило да не ви дадам збор“.
Николовски посочи дека не е точка на дневен ред одговорноста на Дамева.
„Ако треба заменик-претседателот и претседателот да се расправаат со јавност, нема потреба седницата да продолжи и да се создадат услови овие работи на друг начин да се решат. Ова е лично надмудрување помеѓу претседателот и заменикот“, рече Николовски.
Селим Адеми, потпретседател на Судскиот совет, рече дека немал проблеми со претседателката Дамева.
„Сум сакал мир за да завршат седниците. Нема проблем помеѓу Адеми и Дамева. Претседателката знае кај се проблемите. Но, кога претседателката ќе тргне да ме обвинува мене зошто како заменик не сум го дал писмото, а знаеме под кој диктат се делат постапки – тоа обвинување не може. Да ме обвинувате дека намерата на оваа точка е друга поради другите точки – тоа е лично обвинување. Кога почнувате лични обвинувања, тогаш чекајте јас да кажам“, рече Адеми.
По ова, зборуваше и Црвенковска. Смета дека требало нејзината наследничка на претседателската функција да закаже итна седница за писмото од Амбасадата на САД.
„На колегиумот Ви беше укажано дека Вие како претседател сте прв меѓу еднаквите. Функцијата да не ја сфаќате дека само Вие треба да ја знаете содржината. Вие кажавте дека не можете да ни го дадете нам бидејќи е тајно. Ова е само еден последен пример од пред два дена, кој мислам дека кај тие седуммина члена, кои гласаа да разговараме за нарушените меѓусебни односи, е писмото од американската амбасадорка. Во вашиот монолог ги заменувате тезите. Излегува дека вие сте тие што се борите на законито работење на Судскиот совет, а нас, другите челнови, нè деградирате и навредувате дека не сме за законито и совесно работење“, рече Црвенковска.
Дамева пак зеде збор.
„Многу сте нервозни, колеги, забележувам, очигледно Весна Дамева треба да се разреши, но Дамева не е проблемот“, рече Дамева.
Потоа продолжи караницата меѓу Дамева и Црвенковска.
„Ете видовте дека бев во право кога кажав дека Дамева се расправа“, рече потпретседателот.
На крајот, остро реагира и Зоран Герасимовски, член: „Ова на ништо не личи“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Ѓорѓиевски ќе урива дивоградби низ Скопје, се чисти депонијата кај гробиштата во Бутел
Градоначалникот на Скопје, Орце Ѓорѓиевски, најави засилени мерки против дивите депонии и дивопоставените објекти низ градот, потенцирајќи дека „ред мора да има“. Тој информира дека по третпат се чисти депонијата во близина на гробиштата во Бутел, додека паралелно ќе се постапува и против узурпацијата на јавниот простор.
Ѓорѓиевски изјави дека просторот со години бил запуштен и дека станува збор за место кое мора да биде достоинствено уредено, особено во пресрет на верските празници кога граѓаните масовно ги посетуваат гробиштата.
– Ова е трета акција за чистење откако сум градоначалник. Во изминатите четири дена повторно се спроведува расчистување во координација со Општина Бутел. Наместо средствата да ги насочиме кон развој и изградба, ние повторно трошиме ресурси – луѓе, камиони и механизација, за истата намена – изјави тој.
Како претседател на ЗЕЛС, побара итно донесување на законските измени за комунална полиција, со кои се предвидува и зголемување на глобите.
– Мора да се воведе ред и во овој сегмент. Казните треба да бидат повисоки за конечно да се стави крај на несовесното однесување – порача градоначалникот.
Ѓорѓиевски најави дека следува и поинтензивна акција против дивопоставените објекти кои узурпираат јавен простор, велосипедски и пешачки патеки, зелени површини и други јавни зони.
– Граѓаните 30 години бараат ред. Ред ќе има. Знам дека некој нема да го прифати тоа позитивно, затоа што му се нарушува комодитет кој му бил дозволен на грбот на градот и граѓаните – рече тој.
Посочи дека постојат објекти поставени без никаква документација, па дури и во близина на здравствени установи.
– На Бит Пазар има објект поставен на велосипедска и пешачка патека, невозможно е да се функционира. Тој ќе биде отстранет. Секаде каде што имаме узурпација на државен простор ќе постапуваме – истакна градоначалникот.
Според него, целта е изградба на систем во кој правилата ќе важат еднакво за сите.
Македонија
Апасиев: Левица ќе и поднесе кривична пријава на Цвета Ристовска
Партијата Левица соопшти дека ќе поднесе кривична пријава против Цвета Ристовска, член на Државната комисија за спречување на корупцијата, откако таа поднесе оставка од функцијата.
Лидерот на партијата, Димитар Апасиев, преку објава на социјалните мрежи наведе дека правниот тим на Левица подготвува пријава поради, како што тврди, лажирање податоци во анкетен лист со цел прикривање фирми поврзани со нејзини блиски.
Тој посочи дека, според нив, станува збор за кривично дело утврдено со Кривичниот законик и додаде дека доколку не биле објавени серија скандали, Ристовска сè уште ќе ја извршувала функцијата.
Апасиев истакна дека партијата ќе продолжи со откривање случаи на корупција и ги повика граѓаните кои располагаат со докази против функционери да ги достават до нив, ветувајќи дискреција и поведување правни постапки без оглед на политичката припадност на инволвираните.
Македонија
Ја давел и ја претепал бремената партнерка, се спасила откако го убедила да ја носи на лекар, па побегнала додека стоеле на семафор
Основното јавно обвинителство Скопје поведе постапка против 52-годишен маж осомничен за кривично дело Телесна повреда според член 130 став 2 во врска со став 1 од Кривичниот законик, по пријава за семејно насилство извршено врз неговата 32-годишна вонбрачна партнерка, која била во вториот месец од бременоста.
Според Обвинителството, насилството се случило во домот на улицата „Рајко Жинзифов“ во Скопје, каде по расправија осомничениот започнал физички да ја напаѓа жената, удирајќи ја со тупаници и шлаканици по главата и телото. На оштетената ѝ биле нанесени гребаници, отоци и хематоми.
Додека жртвата викала и барала помош со намера да ја слушнат соседите и да повикаат полиција, осомничениот, според наводите, станувал сè поагресивен и продолжувал да ја удира, а во еден момент ја притиснал со раце за врат со цел да ја замолчи.
За да се спаси и да излезе од домот, жената го убедила осомничениот да заминат на гинеколошки преглед и да направат ехо на бременоста. Додека се движеле со автомобил и возилото застанало на семафорите на булеварот „Св. Климент Охридски“, таа успеала да избега и да влезе во блиско кафуле, каде побарала помош. Со позајмен мобилен телефон веднаш ја известила полицијата.
Јавниот обвинител до судијата на претходна постапка доставил предлог за определување мерки на претпазливост, кои вклучуваат обврска осомничениот повремено да се јавува кај надлежен орган, привремено одземање на патна исправа, како и забрана за приближување и воспоставување контакт со оштетената.

