Македонија
(Видео) Кичевски: Молк на панаѓурот од шпицниот градоначалник Мицкоски за катастрофата во Скопје

За една година локална власт во Скопје, ВМРО-ДПМНЕ создаде хаос во градот, немаат реализирано ниту еден проект а јавните претпријатија се на раб на функционалност. Партискиот панаѓур на ВМРО-ДПМНЕ и шпицниот градоначалник Мицкоски се најсилна потврда за оваа катастрофа што ја создадоа во главниот град, истакна на денешната прес-конференција Васко Кичевски, претседател на градска огранизација СДСМ – Скопје.
„Наместо бесплатен превоз во Скопје се случи да нема превоз. Наместо еколошки автобуси не работат ниту тие што ги има. Наместо развој и модерно Скопје гледаме стагнација и уназадување на главниот град. Ете тоа е резултатот на ВМРО-ДПМНЕ во Скопје и на шпицниот градоначалник Мицкоски. На партискиот панаѓур не слушнавме ништо за тендерот од 136 милиони евра и провизии за кои се испокараа. Ги нема електричните автобуси кои токму Мицкоски во името на нивната градоначалничка Данела Арсовска ги најавуваше на сличен настан. Ја нема ниту фабриката за производство на автобуси што лично тој во име на Град Скопје ги најавуваше“, додава тој.
Не кажа Мицкоски, вели Кичевски, ниту до каде е реконструкцијата на Универзална сала, проект готов оставен од минатата локална власт.
Шпицниот градоначалник, како што додава, молчеше и за изградбата на мостовите на булевар АСНОМ и улица Љубљанска, кружниот тек кај Момин поток, патот за Визбегово и други проекти наследени од СДСМ и игнорирани од ВМРО-ДПМНЕ.
„Градоначалниците од ВМРО-ДПМНЕ се најнеспособните градоначалници кои за една година ги запоставија општините, ги партизираа општинските администрации и ги зголемија цените на комуналните услуги. Во таа неспособност предничи Данела Арсовска која за една година го уназади Градот, не реализираше ниту едно ветување и создаде колапс во јавните претпријатија“, потенцира Кичевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Милевски: Виница 4 години назадува, катастрофално владеење на Петков и ВМРО-ДПМНЕ

Така наречениот отчет на градоначалникот Миле Петков и ДПМНЕ е најдобар доказ за четири години катастрофално и досега невидено лошо владеење на една локална власт во Виница, изјави кандидатот на СДСМ за градоначалник на Виница, Гоце Милевски.
Наместо вистински отчет, додаде тој, видовме обид за замачкување на очите на јавноста и бегање од одговорност за неисполнетите ветувања.
„Затоа таканаречениот отчет беше во скап хотел а не на улиците, во градот и селата во Виница. Затоа што реалноста е разочарувачка. Ниту еден од капиталните проекти од програмата на Петков и ДПМНЕ за Виница не се реализирани“, рече Милевски.
Според Милевски, Петков се фалел со наследени проекти од претходната власт на СДСМ и неколку асфалтирани улици.
„Но фактите говорат: сегашната власт нема реализирано ниту 20 километри улици, наспроти 45 километри изградени во времето на СДСМ. Виница денес изгледа како мала депонија од не собереното ѓубре и смет, собирен центар за кучиња скитници, со небезбедни кратери од вода и хаос од неправилно паркираните возила, со запуштени зелени површини и ниту едно ново засадено дрво. Тоа сликата за Виница после 4 години неспособна локална власт на ВМРО-ДПМНЕ. Да не дозволиме оваа казна да продолжи уште четири години! Локалните избори се шанса за промени во Виница“, рече Милевски.
Македонија
Голема акција на Финансиската полиција: уапсени седум лица за даночни измами и перење пари, го оштетиле буџетот за 430 милиони денари

По двегодишна опсежна предистражна постапка, во текот на денешниот ден Управата за финансиска полиција спроведе акција во која беа извршени претреси на повеќе локации на подрачјето на општина Липково, Куманово и Желино.
Се работи за сложена предистрага, која опфаќа повеќе правни и физички лица, а целта е целосно разоткривање на криминална група, која дејстувала подолг временски период и имала цел вршење на кривичните дела злосторничко здружување, даночно затајување, даночна измама и перење пари и други приноси од казниво дело, со намера организаторите и припадниците на групата да стекнат противправна имотна корист во висина од над четиристотини триесет милиони денари, со што е предизвикана огромна штета на буџетот на Република Македонија.
По налог на јавен обвинител од Основно јавно обвинителство за гонење организиран криминал и корупција, во акцијата со асистенција на САЕ „Тигар“ од слобода се лишени седум лица и тие се изведени пред судија на претходна постапка при Основниот кривичен суд, а едно лице не е достапно на органите на прогонот.
Македонија
Утре сончево време, со температура до 34 степени

Времето утре ќе биде сончево со мала до умерена облачност. Попладне во источните делови ќе има услови за локален краткотраен дожд. Ќе дува слаб до умерен ветер претежно од јужен правец, информира УХМР.
Минималната температура ќе биде во интервал од 9 до 18, а максималната ќе достигне од 27 до 34 степени.
Во Скопје сончево со мала до умерена облачност. Ќе дува слаб до умерен ветер од југозападен правец. Минималната температура ќе се спушти до 14, а максималната ќе достигне до 32 степена.
До петок времето ќе се задржи претежно сончево и топло со постепен пораст на дневните температури. Ќе дува слаб до умерен ветер од јужен правец.
За време на викендот времето ќе биде променливо облачно и нестабилно со локален пороен дожд и грмежи. В сабота ќе дува умерен до засилен југозападен, а в недела ветерот ќе го смени правецот во северен.