Денес, Владата на Република Северна Македонија ја донесе одлуката за воспоставување структура за преговори за пристапување на Република Северна Македонија во Европската Унија. За ова и за другите заклучоци подетаљно ќе ве информира вицепремиерот задолжен за европски прашања, кој воедно, во согласност со одлуката на Владата, ќе биде и главниот преговарач за што му посакувам многу успех и секако очекувањата се амбициозни за него и неговиот тим. И јас и вицепремиерот сме сложни за ова прашање, преговорите треба да се одвиваат со забрзана динамика и да се затворат што е можно побргу, изјави на денешната прес-конференција премиерот Ковачевски.

Тој додаде дека со одржувањето на првата меѓувладина конференција направивме историски чекор во стратешка смисла, ја повторивме нашата заложба за полноправно членство во Унијата и со тоа ги потврдивме европските вредности за кои се залагаме. Преговорите официјално почнаа, а со тоа се наметна потребата што побргу да се направи концепт за преговарачката структура во согласност со новата методологија за водење на преговорите за пристапување во ЕУ.

Ковачевски наведе дека преговарачката структура што ја усвоивме денес ќе биде поддржана и од експерти, државни службеници, кои со години работат на ова поле, а секако ќе се надградува и со експерти и стручни лица надвор од институциите, но и надвор од државата, кои имаат искуство со водење преговори и пристапување други држави во ЕУ. Нашата заложба и намера е да обезбедиме квалитетна и ефикасна структура, која ќе може да се справи со сите предизвици.

Тој потенцира дека верува во капацитетот на Секретаријатот за европски прашања како надлежен да ги води преговорите, кој во целиот процес ќе координира и ќе им дава поддршка на институциите и убеден сум дека ќе имаме квалитетна подготовка за преговорите.

Ние како Влада сме посветени на европските реформи и што побргу вградување на европските закони и стандарди во нашиот систем. Тоа е основата за ефикасно воден процес на интеграција и преговори за членство со најдобри можни исходи. Тука би сакал да потенцирам дека преведувањето на законодавството на ЕУ, чие прифаќање и усогласување е еден од инструментите за успешна интеграција е во тек, и дека ние вложуваме и ќе продолжиме да вложуваме интензивно во преводите на европското законодавство на македонски јазик, изјави Ковачевски.

Со официјалниот почеток на преговорите во јули оваа година се наметна потребата за итно консолидирање на координативниот механизам за водење на пристапниот процес. Според мене, клучната алка што ќе обезбеди координација и поддршка на сите реформи поврзани со евроинтегративниот процес и имплементација на Спогодбата за стабилизација и асоцијација (која останува во сила сè до потпишувањето на пристапниот договор за членство во Унијата), изјави вицепремиерот Маричиќ.

Тој истакна дека целта што си ја зададовме е завршување на преговорите до крајот на оваа деценија и членство во Унијата до 2030. Нашата иднина е во ЕУ и затоа потребно е преку максимална посветеност и ангажираност да се вклучиме, да ја искористиме шансата што е пред нас и со брзи чекор и самоуверено да одиме напред кон полноправното членство во ЕУ. Следува динамичен период за институциите и администрацијата, каде што имаме за адресирање многубројни аспекти во 6 кластери, 3 области и 33 преговарачки поглавја.

Маричиќ наведе дека пред нас е тешка задача, која е остварлива бидејќи имаме јасна поставена цел и визија за нашата држава.

За таа визија и за оваа стратешка цел мора да се обединат сите вклучувајќи ги и опозициските партии бидејќи ова е процес од интерес на државата. Целосно сме подготвени за почеток на скрининг-процесот и убеден сум дека ќе ја исполниме динамиката на предвидената рамка за завршување на процесот, додаде Маричиќ.