Македонија
(Видео) Ковачевски: На 9 мај гордо ги славиме победата над фашизмот и големата идеја за Европа

Премиерот Димитар Ковачевски се обрати на свеченоста по повод 9 Мај – Денот на победата над фашизмот и Денот на Европа, што се одржа во дворот на Владата.
Пригодната свеченост по повод 9 Мај почна со положување венци пред споменикот „Ослободители“ на Скопје.
„Денеска, одбележуваме и славиме голем ден – 9 Мај како Ден на победата над фашизмот и како Ден на Европа. 9 мај е еден датум за два големи настана во историјата на Европа и на нашата земја. Денешниот ден е запишан со златни букви во историјата на напредна Европа и на Европејците“, посочи Ковачевски.
Како што рече премиерот, ова е ден кога ги чествуваме и се поклонуваме пред големото дело на припадниците на партизанските единици од Народноослободителната војна, кои со двете заседанија на АСНОМ ги заокружиле вековната борба и стремежот на македонскиот народ за своја самостојна држава.
„Нашите сограѓани од тоа време, припадници на сите етнички заедници, ги дадоа своите животи затоа што избраа да застанат на страната на сојузничките, антифашистички сили, кои решија да се обединат и да им застанат на патот на фашистичките окупатори.
Од денешен аспект од огромно историско значење е што создавањето на македонската држава се оствари и преку учеството на партизанските единици на страната на антифашистичкиот сојуз. Тоа учество беше и останува вистинската страна на историјата и единствениот и вистински избор“, нагласи Ковачевски додавајќи дека Втората светска војна на територијата на Македонија завршила со приближно 25.000 загинати борци и други жртви.
Премиерот додаде дека изборот на македонскиот народ, заедно со сите други народи, бил македонската држава да биде создадена како дом на слободата.
„Затоа денеска имаме силни, големи причини, да славиме и да бидеме дел од прославите во Европа.
Да ја славиме победата над фашизмот и да ја славиме големата идеја за Европа“, посочи Ковачевски.
Тој нагласи дека денеска се одбележуваат и 72 години од денот кога на 9 мај 1950 година францускиот министер за надворешни работи, Роберт Шуман, повикал да почне изградбата на нова Европа.
„Чувствувајќи одговорност за важноста каква иднина ќе им обезбедат на своите граѓани, европските земји што го прифатија овој повик прифатија и дека споделуваат заедничка историја и влегоа во решавање на разликите меѓу себе.
Седум години подоцна шест европски земји ја основаа Европската економска заедница со договорот од Рим и го почнаа процесот на европската интеграција, кој ќе биде крунисан со она што денеска претставува ЕУ.
Ние, граѓаните на Република Северна Македонија, ги избравме Европа и Европската Унија зашто се изградени на вредностите во кои веруваме и ги практикуваме и ние.
Оттаму, кога велиме дека ЕУ е избор на граѓаните на Северна Македонија, велиме и дека тоа е избор за економски посилна Европа. Избор за поправедна и побезбедна Европа, која ни припаѓа нам, на сите нас.
Затоа се гордееме и на овој избор. Ја избравме иднината. Иднината на Европската Унија – иднина што му припаѓа на секој европски граѓанин“, истакна премиерот.
На свеченоста пред Владата свои обраќања имаа и претседателот на Сојузот на борците од Народноослободителната антифашистичка војна на Македонија, Никола Стојановски, амбасадорката на САД, Кејт Мери Брнз, и амбасадорот на Европската Унија, Дејвид Гир.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Анеглов: Пожарот на Готен не може да загрози ниту едно село

На територијата на целата земја денеска има шест активни пожари, а најтешкиот и најспецифичен е пожарот на планината Готен, на тромеѓието помеѓу општините Василево, Берово и Радовиш. Директорот на Дирекцијата за заштита и спасување Стојанче Ангелов во попладневната изјава за медиумите потенцира дека и покрај специфичноста, пожарот не може да загрози ниту едно село.
– Денеска досега се забележани повеќе од 12 пожари на отворен простор. Од нив шест се активни, останатите се изгаснати. Од овие шест имаме неколку кои се исклучително тешки за гаснење. Најтешкиот, најспецифичниот пожар е пожарот кој се одвива на планината Готен, на тромеѓето помеѓу општините Василево, Берово и Радовиш. Овој пожар создаде одредена вознемиреност кај населението но, категорично тврдам дека не може да загрози ниту едно село. Од страната на Радовиш, пожарот полека се спушта, се движи споро, во зависност од насоката на ветерот кој релативно често дува на ова подрачје, изјави попладнево директорот на Дирекцијата за заштита и спасување Стојанче Ангелов.
Рано утрово таму подолго време дејствувал еден полициски хелихоптер, но без некои значајни резултати.
– На лице имаме повеќе од 150 луѓе почнувајќи од локалните пожарникари со поддршка на соседните ТППЕ, повеќе екипи на Национални шуми и локално население. Исто така овде на терен се седум пинцагуери и тоа од страната на Радовиш. Останатите се од беровската страна, рече Ангелов.
Поради тешко пристапниот терен фокусот на екипите, како што вели Ангелов, е ставен на пресретнување на овој тежок за гаснење пожар на шумските патишта кој што се протегаат низ оваа планина.
– Веќе неколку дена таму работат булдожери кои го чистат патот, го прошируваат за пожарот кој кога ќе дојде кај нив да не може да помине на другата страна.
Тежок пожар, како што вели Анеглов, има и кај Желино кој постојано се става под контрола, се гасне, но повторно се пали.
– Се поставува прашање, кој е оној кој упорно го потпалува пожарот на територијата на Општина Желино кој денеска се движи во насока на Еребино. Денеска таму дејствува еден Ер Трактор на дирекцијата за заштита и спасување, а упатен е и еден Хермелин и еден БТР на ДЗС, кој што треба да дејствуваат доколку огнот тргне кон Еребино или кон некое од блиските села. На лице место е тетовската ТППЕ поддржана со екипи на Национални шуми, но и локално население, потенцира Ангелов.
Третиот пожар е на територијата на Македонски Брод и врз него се дејствува со еден Ер Трактор и со локални сили од земја. Исто така во текот на ноќта изби еден пожар и помеѓу опоштините Кавадарци и Прилеп, и уште едена активен пожар има на територијата на Мариово. На овие пожари дејствуваат локалните пожарникари со поддршка на соседните ТППЕ.
-Нашата цел е да не дозволиме ширење на овие тешки за гаснење пожари бидејќи температурата на воздухот е исклучително висока. Дува слаб ветер којшто дополнително помага за брзо ширење на огнот, но високата температура којашто кај нас е околу 40-от и над 40-от степен дополнително го усложнува гаснењето на овие пожари, вели Ангелов.
Потсетува на најавата на УХМР дека во текот на утрешниот ден се очекуваат поројни врнежи на целата територија на државата. – Се надеваме дека некои од овие локални врнежи ќе паднат на подрачјата на овие тешки за гаснење пожари, изјави директорот на ДЗС.
Македонија
За да помине граница преку ред, на полицајците од ФРОНТЕКС им кажал дека е дипломат, а на нашите полицајци им рекол дека им е колега, уапсени двајца скопјани на Табановце

Вчера на Граничниот премин „Табановце“, на влез во државата, полицијата ги упаси С.С. (59) и Б.А. (55), двајцата од Скопје поради сомневање за алсиикување исправа.
„Во обид да влезат со приоритет, С.С., кој го управувал возилото ’голф’ со скопски регистарски таблички, во кое се превезувале, на полициските службеници од ФРОНТЕКС им рекол дека е дипломат, приложувајќи патна исправа наводно издадена од Европски полициски комитет, а на македонските полициски службеници им рекол дека е вработен во МВР, но не ја носел службената легитимација. При дополнителна контрола на лицето и возилото биле пронајдени патни исправи, една биометриска страна за патна исправа, два пластични печати, четири лични карти и други предмети. Поради основано сомнение за сторено кривично дело „фалсификување исправа“ по чл.378 од КЗ, пронајдените предмети се одземени, а лицата лишени од слобода“, соопшти МВР.
Против двете лица ќе бидат поднесени соодветни ријави по расчистување на случајот.
Македонија
Овој ден буди тага, но ќе се памети и по човечноста и хуманоста, Град Скопје оддаде почит на жертвите од земјотресот

Делегација на Град Скопје предводена од градоначалничката Данела Арсовска, оддаде почит на жртвите од катастрофалниот земјотрес кој пред 62 години главниот град го остави во урнатини. Скопје се сеќава на 26 јули 1963 година, ден кој засекогаш го промени ликот на градот, трагедија која одзеде над илјада животи.
„Овој ден буди чувство на тага, но секогаш ќе се памети и по човечноста и хуманоста на сите кои помогнаа во најтешките моменти“, велат од Град Скопје.
Во рамки на одбележувањето 62 години од земјотресот, вечерва во 20:00 часот во Музејот на Град Скопје ќе биде отворена изложбата „Скопје за време на земјотресот и потоа“.