Македонија
(Видео) Ковачевски: Среќна Нова 2023, продолжуваме заедно и посветено да работиме за европска иднина на земјата

Претседателот на Владата на Република Северна Македонија, Димитар Ковачевски на сите граѓани им ја честита Новата 2023 година, посакувајќи им многу здравје, успех и убави моменти поминати со најблиските. Во честитката до граѓаните, премиерот изразува верба дека годината пред нас ќе биде подобра, во која продолжуваме напорно да работиме за да ја зајакнеме економијата, да го подобриме квалитетот на живот на граѓаните, да обезбедиме просперитет, достоен за земја која го чекори својот пат кон Европската Унија, стои во честитката на Ковачевски.
„Зад нас оставаме тешка година полна со многу предизвици и многу неизвесност, со тешки и критични моменти наметнати од економската и енергетската криза. Ветивме дека никој нема да биде оставен сам, и ветувањето го исполнивме. Спречивме ценовни шокови, обезбедивме стабилна и евтина струја од домашно производство за сите домаќинства и мали компании, ги поддржавме работниците, бизнис заедницата, пензионерите, ранливите категории граѓани. Ги зголемивме минималната и просечната плата, но и платите во образованието, здравството и во безбедносните сектори. Го заштитивме стандардот на сите граѓани, ги одржавме компаниите ликвидни и со тоа ги заштитивме работните места. Обезбедивме доволно храна, струја и топлина за сите.“
Премиерот Ковачевски во честитката се осврна и на отпочнувањето на преговорите на Северна Македонија со Европската Унија.
„Донесовме и тешки, но државнички одлуки и после три децении, започнавме преговори за полноправно членство во ЕУ со заштитен македонски јазик и идентитет. Денес седиме гордо на големата маса во Брисел и директно учествуваме во одлуките кои се однесуваат на нашата европска иднина. Во новата 2023, сите заедно да продолжиме да ја градиме европската иднина на земјата. Затоа што граѓаните заслужуваат да живеат во ЕУ, но тука, дома во Северна Македонија. Заслужуваат да живеат во земја дел од сојуз со врвна демократија, социјална правда, владеење на правото и забрзан економски развој. Граѓаните заслужуваат да имаат подобар и побогат живот.“
Премиерот во новогодишната честитка посочи дека со поддршка од граѓаните, продолжува посветената работа на спроведување активни мерки, политики и закони за справување со кризата, но и за натамошен севкупен напредок на државата.
„Со јасна визија и со напорна работа, нема недостижна цел“, истакна премиерот Ковачевски, посакувајќи им на граѓаните среќни празници.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Скопскиот регион со најмногу интервенции, пожарите сѐ уште активни на седум локации

Во изминатите 24 часа, низ државата се евидентирани вкупно 32 пожари на отворен простор, информираат од Центарот за управување со кризи. Според нивните податоци, седум пожари се сѐ уште активни, еден е локализиран, еден под контрола, а 23 се веќе изгаснати.
Најсериозни пожари се пријавени во општините Прилеп (с. Бешиште), Македонски Брод (меѓу с. Црешнево и Слатин), Чашка (во близина на Солунска глава), Чучер Сандево (меѓу с. Блаце и Чучер), Шуто Оризари (депонија кај хотел Њу Стар), Дојран (с. Николич) и Крива Паланка (с. Жидилово). Гори претежно нискостеблеста и мешана шума, а пожари има и на депонии и карпести терени.
Пожарот во градската депонија во Делчево е ставен локализиран, додека пожарот во с. Самаково, Македонски Брод, каде што горел лесно запалив материјал, е ставен под контрола.
На 23 локации низ земјава пожарите се изгаснати. Најмногу интервенции имало во Скопскиот регион – Сарај, Петровец, Аеродром, Ѓорче Петров, Чучер Сандево и Центар. Изгаснати се пожари и во Велес, Куманово, Старо Нагоричане, Кратово, Штип, Долнени, Боговиње, Брвеница, Желино, Врапчиште, Битола, Свети Николе и Прилеп. Гореле ниски вегетации, стрништа, лозја, депонии, како и мешани шуми.
Надлежните апелираат до граѓаните да не палат оган на отворен простор, особено во периоди на високи температури и зголемен ризик од пожари.
Македонија
За шест часа изречени 103 мерки за сообраќајни прекршоци во Кавадарци

Вчера во периодот од 15.00 до 21.00 часот беше спроведена акциска контрола на територијата на Кавадарци, за санкционирање на возачи кои не ги почитуваат сообраќајните правила и прописи.
При контролата санкционирани се 100 возачи од кои: 23 возачи за возење без возачка дозвола, осум возачи за управување на моторни возила со изминат рок на важност на сообраќајната дозвола и полиса, пет возачи кои управуваат моторно возило под дејство на алкохол, четири возачи кои управуваат возило со несоодветна категорија, 36 возачи за не користење на заштитен шлем-кацига, шест возачи на возила со затемнети стакла без извршен А-тест, изготвени се три барања за поведување на прекршочна постапка за Правни лица како и одземени се четири мотоцикли и две товарни моторни возила по член 344 од ЗБСП а превземени се мерки против 18 учесници во сообраќај за останати сообраќајни прекршоци.
На сите прекршители изготвени им се соодветни поднесоци. Сообраќајните контроли продолжуваат и во наредните денови.
Апелираме до сите учесници во сообраќајот да ги почитуваме сообраќајните правила и прописи и заеднички да придонесеме за побезбедни патишта.
Македонија
(Фото) Герасимовски: Општина Центар со свои ресурси помага во гасењето на пожарот во Чучер Сандево

Општина Центар со своето јавно претпријатие ПОЦ активно се вклучи во гасењето на големиот шумски пожар во Чучер Сандево. Во акцијата се ангажирани вработени на ПОЦ и цистерна на Општина Центар, како дел од координираниот одговор на институциите за справување со огнената стихија.
Градоначалникот Горан Герасимовски, упати апел до сите граѓани да бидат совесни и претпазливи.
„Во ситуации како оваа, најважни се вниманието, дисциплината и одговорноста. Ги повикувам граѓаните да бидат совесни во овие жешки денови и да се придржуваат до сите препораки на службите и не преземаат ризични активности во опожарените подрачја“, порача Герасимовски.
Поради сериозноста на состојбата, општина Чучер Сандево прогласи вонредна состојба, а во акцијата на гасење на огнот се вклучени и хеликоптери и теренски екипи од повеќе институции.
Општина Центар останува мобилизирана и подготвена да помогне, со сите свои расположливи ресурси, сѐ додека пожарот не биде ставен под целосна контрола, додаваат од Општината.