Македонија
(Видео) Ковачки: Вистинскиот газда во Владата е ДУИ, а не СДС и Ковачевски

Според пратеникот и член на ИК на ВМРО-ДПМНЕ, Драган Ковачки, СДС свесно лаже кога вели дека ВМРО-ДПМНЕ прифатило уставни измени.
Тоа е така, вели тој, затоа што се фатени во предавство на националните и државните интереси и се против вистинска интеграција на државата.
Ковачевски треба јасно да одговори кој предлог го избира од ВМРО-ДПМНЕ, додава Драган Ковачки, пратеник и член на ИК на ВМРО-ДПМНЕ.
„Првиот е преодна влада, без ДУИ, и измени, што ќе стапат во сила со завршување на преговорите и членството на државата во ЕУ.
Вториот предлог е избори, гаранции за националниот идентитет и јазик, економски пакет и заштита на Македонците во Бугарија преку спроведување на пресудите на Судот за човекови права во Стразбур и измени од влада, без ДУИ, поддржана од опозицијата.
Она што го понуди Ковачевски се уставни измени под бугарски диктат и широка влада со ДУИ. Не е поентата ВМРО-ДПМНЕ да дојде на власт во некаква широка влада, туку да изградиме процес и пакт за национално единство, каде што ќе ги заштитиме националните интереси.
Ако СДС не ги прифати двете понуди од ВМРО-ДПМНЕ, значи дека има скриени намери да преговара на сметка на идентитетот и ќе прифати нешто во тек на преговорите, кое ќе го доуништи македонскиот идентитет. СДС сега треба да ги покаже своите вистински намери“, додава пратеникот од ВМРО-ДПМНЕ.
Дали е заложник на ДУИ поради меѓусебни корупциски зделки?
Дали планира да го уништи македонскиот идентитет менувајќи го Уставот сега и оставајќи простор во тек на преговорите со ЕУ, Бугарија да нè блокира секогаш кога сака и со тоа да ја принудува Македонија да си го уништи целосно својот идентитет?, прашува тој.
За понудата на Бујар Османи, во која вели дека го отстапува местото Албанец премиер на ВМРО-ДПМНЕ, одговорот на Ковачки е дека ова е најјасен доказ оти вистинскиот газда во Владата е ДУИ, а не СДС и Ковачевски. И, второ, ДУИ оди во опозиција и не е во состојба да поставува услови. Единствената сила, која дава и зема власт, не е Османи, не е ниту ДУИ, туку народот на Македонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Од утре дожд и снег на планините и повисоките места

Од утре попладне до петок под влијание на влажен бран ќе има врнежи од дожд, локално пообилни, информира УХМР.
Вкупно од овој бран се очекува на повеќе места да наврнат над 30 литри на метар квадратен, а локално и над 50 литри.
Поради продор на постудена воздушна маса од север и засилен северен ветер, во четврток на повисоките планини врнежите ќе преминуваат во снег, а поради натамошно спуштање на студен воздух, во петок ќе има услови да преминуваат во снег и на некои од повисоките места.
На повисоките планини ќе се формира снежна покривка. Температурата на воздухот значително ќе опадне.
Во Скопје, од утре кон крајот на денот до петок времето ќе биде претежно облачно со врнежи од дожд, повремено побилни. Ќе дува умерен до засилен северен ветер, а температурата значително ќе опадне.

Извор: УХМР
Македонија
Грејната сезона најрано може да почне на 1 октомври

Регулаторната комисија за енергетика, водни услуги и услуги за управување со комунален отпад (РКЕ) информира дека грејната сезона започнува на 15 октомври 2025 и завршува на 15 април 2026 година.
Но доколку прогнозираната средна надворешна температура за следниот ден е еднаква или помала од 12 ºС, тогаш грејната сезона може најрано да започне од 1 октомври и да заврши најдоцна до 30 април.
Во исто време, РКЕ информира дека систем операторот за пренос на гас НОМАГАС најави дека оваа година поради ремонтни активности на регионалните транспортни системи за пренос на природен гас и гасоводот Турски тек се очекува од 13 до 17 октомври да има прекин во испораката на природен гас кон потрошувачите во земјава.
РКЕ потсетува дека сигурноста во снабдувањето е примарен интерес и дека законската регулатива овозможува во услови на прекин на испорака, операторот со природен гас НОМАГАС да може да изврши навремено полнење на цевката и количината да ја распредели соодветно во критичните денови за корисниците кои се греат на топлинска енергија.
Согласно Правилата за снабдување со топлинска енергија и Тарифниот систем за продажба на топлинска енергија, снабдувачот е должен во грејните простории во времето од 06:00 до 22:00 часот во текот на денот да обезбеди температура на греење од 20+1 º C.
РКЕ апелира до станарите, односно заедниците на станари да ги проверат внатрешните инсталации и инсталациите во објектите, и да ги подмират сметките за електрична енергија за топлинските потстаници со цел грејната сезона да започне без проблеми.
Македонија
Јаневска: Државата целосно го финансира учеството на талентираните ученици на меѓународни натпревари

Од оваа година, Министерството за образование и наука целосно ги покрива трошоците за пат и котизација на учениците и нивните ментори кои ќе се квалификуваат на меѓународна научна олимпијада или натпревар, изјави министерката за образование и наука, Весна Јаневска, на конференција организирана од Институтот за хемија при Природно – математичкиот факултет во Скопје, на која беа претставени успесите на македонските ученици и нивните ментори постигнати на меѓународните научни олимпијади по хемија во оваа календарска година.
„Ги следам учествата на сите наши млади на меѓународните натпреварувања и водена од успесите ваши и на генерациите пред вас, ми беше должност да се заложам, а Владата ми даде поддршка и заедно го решивме предизвикот кој се провлекуваше од минатото и го доведуваше во прашање учеството на македонски претставници на големи меѓународни ученички натпреварувања. Од оваа година, Министерството за образование и наука целосно ги покрива трошоците за пат и котизација на учениците и нивните ментори кои ќе се квалификуваат на меѓународна научна олимпијада или натпревар. Поставивме системско решение и повеќе никој нема да има финансиски предизвици за да отпатува и да ја претставува својата земја“, рече Јаневска.
На Меѓународната олимпијада по хемија што годинава се одржа во Дубаи, македонските ученици освоија по еден сребрен и бронзен медал, како и една пофалница, додека на Меѓународната „Менделеев“ олимпијада во Бело Хоризонте во Бразил освоија два бронзени медали.
„Овие деца се дел од таа генерација во која веруваме дека може да донесе подобри времиња. Затоа што го ценат знаењето, постојано да надградуваат, знаат дека науката е столб на просперитетот и што е најважно – имаат натпреварувачки дух и прифаќаат предизвици што мора да се решат за да се стигне до победата“, рече Јаневска.
Изрази уверување дека министерството ќе продолжи да ги унапредува политиките за поддршка на талентираните ученици и студенти, да доделува стипендии, парични награди и да вложува во младите научници.