Македонија
(Видео) Ковачки: Ултиматум, не благодарам, народот кажува дека францускиот предлог е неприфатлив

Предлогот кој владата на Ковачевски го прифаќа е неприфатлив за Македонија. Народот, интелектуалците, општествените чинители и експертската јавност гласно кажуваат дека овој предлог за почеток на преговори е штетен за Македонија и води кон две сценарија, кое од кое полошо за државата, едното е вечно преговарање, а второто е асимилација по диктат на Бугарија, истакна Драган Ковачки, пратеник и член на ИК на ВМРО-ДПМНЕ.
Овој предлог, како што вели Ковачки, преставува ултиматум кој во себе ги содржи сите бугарски барања.
„Тоа коешто владата се обидува да го протне како голем успех е всушност голема дипломатска катастрофа. Рамката во себе содржи протоколи или ако сакате годишни извештаи преку кои Бугарија ќе има директно влијание и учество во менувањето на учебници, споменици, ќе влијае кон менување на историски факти за настани и ликови кои директно задираат не само во македонската историја, туку и во македонскиот идентитет. Ова се понижувачки и недостоинствени позиции за Македонија. Друг да диктира лекции во учебниците, друг да диктира измени на Устав, друг да диктира дали некоја критика е говор на омраза или не. Понижување и порази“, вели Ковачки.
Очекуваме, додава тој, Владата да се вразуми.
„Десетици илјади граѓани секој ден јасно и гласно кажуваат ултиматум, Не благодарам. Владата треба да го послуша гласот на народот, а не да оди спротивно на неговата волја. ВМРО-ДПМНЕ стои зад овој став на граѓаните и затоа бара Ковачевски да ги прифати четирите суштински измени на предлогот, да прифати широка дебата преку работни групи во кои ќе се слушнат сите мислења и да се изгради заеднички национален став“, потенцира Ковачки.
„ВМРО-ДПМНЕ повторно ги повикува граѓаните и денес во 19 часот мирно, достоинствено и масовно да го искажат својот глас против ултиматумот. Во 19 часот ќе се собереме пред Владата и ќе маршираме кон Министерството за надворешни работи, институцијата која е одговорна за овој дипломатски пораз, а потоа ќе се упатиме до пред Собранието на Република Македонија каде што ќе го изразиме уште еднаш нашиот став против. Народот кажа ултиматум, не благодарам. Ковачевски и Владата треба да кажат дали стојат со или против својот народ“, потенцира пратеникот од редовите на ВМРО-ДПМНЕ Драган Ковачки.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Стојаноски објави план на ВМРО-ДПМНЕ за помош на Кочани

Ние нашиот став го соопштивме. И не сакаме да влеземе во сценариото на политизација на трагедијата во која СДСМ упорно сака да не внесе. Владата од првите минути по страшната трагедија е во целосна поддршка на сите засегнати од трагедијата. Од транспорт на повредените, до ставање на сите капацитети во корист на истрагата, до поддршка и реална помош, изјави Бојан Стојаноски, пратеник од Пратеничката група на ВМРО-ДПМНЕ и коалицијата „Твоја Македонија“.
Ваквата реакција доаѓа откако пратеникот од СДСМ, Оливер Спасовски, изјави дека СДСМ повторно го поднела законот за поддршка на настраданите во Кочани.
Стојаноски го објави планот на власта на помош на Кочани.
„Нашиот план за поддршка на засегнатите е следниот: 1. Ќе ги дуплираме средствата од Владата за помош на општина Кочани и реализација на проекти. 2. Водиме преговори со инвеститори да отворат капацитети во Кочани или во непосредната близина. Премиерот Мицкоски најави 2 нови инвестиции и проширување на една актуелна постоечка во близина на Кочани, со 1.000 нови вработувања. З. Ги покриваме трошоците и лекувањето и ќе продолжиме да го правиме истото“, рече Стојаноски.
Тој увери дека здравствениот систем ќе биде посветен и мотивиран да помогне на овие луѓе
„Самиот аргумент зошто политизираат е кога ќе видите кои ликови ја соопштија веста за овој закон. Венко Филипче и Оливер Спасовски. На Спасовски му се случија Ласкарци, Беса Транс, Модуларната клиника, Онкологија. Никој не беше уапсен. Ниту еден. Со ниту една поднесена кривична пријава“, рече Стојаноски.
Според него, Оливер Спасовски да поднесе ваков закон е исто како Зоран Заев да поднесе закон за враќање на името или како Венко Филипче да поднесе Закон за одговорност за модуларните клиники.
„Премиерот Христијан Мицкоски остави средба со најголем дел од родителите и ќе продолжи да се сретнува. Имаме организиран и системски пристап. Никој нема да биде оставен сам. Поддршка ќе има, ама и одговорност“, рече тој.
Македонија
Славески ќе си замине од функцијата претседавач во Советот на Град Скопје доколку биде избран за гувернер

Професорот и претседавач на Советот на Град Скопје, Трајко Славески, доколку биде избран за гувернер на Народната банка на Република Македонија (НБРМ), ќе си замине од функцијата во Град Скопје. Сè до изборот во Собранието, Славески вели дека нема да коментира за политиките и за мерките на монетарната политика, но одговори како технички ќе ги менаџира функциите.
„По евентуалниот избор за гувернер, поради неспојливост на функциите, ми престануваат членството во Советот на Град Скопје и функцијата претседател на Советот. Законот предвидува дека би можел да вршам наставно-научна дејност и понатаму, мислам без надомест. За тоа ќе одлучи Економскиот факултет, каде што сум професор“, вели Славески за „Макфакс“.
Претседателката Гордана Сиљановска-Давкова, вчера, во Собранието официјално го достави предлогот Славески да биде избран за гувернер на НБРМ и таму процедурата веќе може да почне. На Славески му треба просто мнозинство од 61 глас за да биде избран, а премиерот Христијан Мицкоски вчера рече дека пратеничката група на ВМРО-ДПМНЕ ќе гласа за него.
Опозицискиот Социјалдемократски сојуз денес се изјасни дека нема да го поддржи оти, наместо експерт, на функцијата е предложен партиски пулен.
Славески во Советот на Скопје важи за еден од најлутите ривали на градоначалничката Данела Арсовска. Од говорницата во Советот на Скопје обајцата изминативе четири години си разменија безброј навреди и имаа многу јавни расправии и политички пресметки. Тој беше избран за претседавач во ноември 2021 година.
Доколку Славески биде избран за гувернер, на негово место, според Деловникот за работа на Советот на Град Скопје, советниците треба да изберат нов претседавач.
Македонија
ЗНАМ предлага закон со кој прагот за регистрираните земјоделци како даночни обврзници ќе се зголеми

На денешната прес конференција, Миле Цеков пратеник во Собранието информира дека пратеничката група на Движењето ЗНАМ – за наша Македонија во собраниска процедура поднела Предлог на Закон за измена на Законот за додадена вредност.
„Со предложениот закон бараме, рече Цеков,на измена на членот 51, односно прагот за задолжителна регистрација за ДДВ за регистрираните индивидуални земјоделци да се зголеми од два на четири милиони денари“.
Тој додаде дека целта на измената е директен одговор на реалниот живот на македонскиот земјоделец.
„Ова е одговор на реалноста, на зголемените трошоци за производство на земјоделците, горивото е скапо, ѓубривата уште поскапи, но и цената на финалниот производ што го продаваат е зголемена и сето тоа придонесува тие законскиот праг од два милиони денари да го надминат уште во првите четири -пет месеци во годината. И што прават потоа ? Продаваат на рака, односно во кеш или преку сметки на други лица, ја поттикнуваат сивата економија, бидејќи ако го надминат прагот би морале да станат даночни обврзници со трошоци, книговодство, пријава завршна сметка и многу други трошоци. Во суштина додека едвај врзуваат крај со крај и се мачат да опстанат, ние ги туркаме кон сивата економија“ рече Цеков пред новинарите.
Пратеникот Цеков нагласи дека Движењето ЗНАМ – За наша Македонија во својата програма го вети моделот Македонија – самоодржлива држава со стимул на домашното производство на храна.
„Ние не бараме ослободување од данок, ова е само зголемен праг од два на четири милиони денари прилагоден на реалната фактичка состојба. Ако државата сака домашна храна треба да го поддржи македонскиот земјоделец, затоа што се повеќе увезуваме храна. Нашата цел со оваа измена е: Да се намали сивата економија, да се поттикне формалното призводство, да се почитува трудот на земјоделецот“ рече тој.
„Ако навистина сакаме младите да останат да произведуваат, ако сакаме храна од нашите земјоделци, тогаш ги повикуваме сите политички партии да ја поддржат оваа законска измена која е измена за човекот што не прашува, туку работи“, потенцира пратеникот од ЗНАМ, Миле Цеков на денешната прес конференција.