Македонија
(Видео) Костадинов: Мицкоски да излезе и да му се извини на македонскиот народ за лагите и хистеријата

Срушени се сите клевети на ВМРО-ДПМНЕ дека се распродавал македонскиот идентитет, потопени се сите лаги на Христијан Мицкоски дека се распрачувала нашата татковина. Македонскиот идентитет не е распродаден, туку е сочуван, а нашата држава не е распарчена како што хистерично лажеше Мицкоски, изјави портпаролот на СДСМ, Костадин Костадинов.
„Додека ние работевме за граѓаните и ги браневме државните позиции, европската иднина и македонскиот национален идентитет, Мицкоски смислено и оркестрирано ширеше хистерични лажни вести и клевети поткопувајќи ја државната позиција. Пред само неколку дена Мицкоски на собир за одбрана на својата фотелја лажеше дека во Софија ни се распарчувала државата. Клеветеше дека се распродава идентитетот, дека се тргува со антифашистичкиот темел на нашата држава, ширеше лажни вести, поттикнуваше говор на омраза.
Мицкоски и ВМРО-ДПМНЕ беа единствените што гласно навиваа Северна Македонија да не добие датум за почеток на преговорите. Единствените што намерно и свесно блокираа реформи и закони важни за интеграцијата во ЕУ, но уште поважни за нашите граѓани. Нивните лаги дека, освен Бугарија, и други земји не ја поддржуваат нашата интеграција, ја демантираа европски држави. Секогаш кога се работи за државните и националните интереси, Мицкоски го покажува своето антидржавно и антиевропско лице.
Таков е и случајот со стратешката грешка и неодобрувањето на меѓувладината конференција за Република Северна Македонија од страна на Република Бугарија. Не издржа Христијан Мицкоски, па поита овој пораз на европските вредности да го воспева како своја победа. Ништо ново од партијата што правеше сè за да го блокира напредокот во интеграцијата, партијата чиј претседател не смогна сили ниту да го честита членството во НАТО.
Се потврди дека сè што излегува од устата на Мицкоски е ноторна лага и ова е уште еден негов пораз. Затоа, Мицкоски, те повикуам да излезеш и да им се извиниш на граѓаните за сите твои лаги, клевети, хистерии, со кои работеше против својата татковина, против својот народ. Излези и извини му се на македонскиот народ! Излези и извини им се на сите наши граѓани!
Остануваш, Мицкоски, уште долго во опозиција, ние продолжуваме да работиме за граѓаните, за државата. Ние сме свои на своето. Македонци кои зборуваат македонски јазик. Нашата македонска иднина е европска. Станавме земја членка на НАТО како Македонци, кои зборуваат македонски јазик, ќе станеме земја членка на ЕУ како Македонци што зборуваат македонски јазик“, порача Костадинов.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Пожарите стивнаа, остана само еден активен

На територијата на државата денеска до 18:00 часот има два пожари на отворен простор, од кои еден пожар е активен и еден е изгаснат, информираат до ЦУК.
Активен е пожарот во Општина Демир Капија, кај м.в. Јаворица каде гори нискостеблеста деградирана шума.
Изгаснат е пожарот во село Дедели, во Општина Валандово, каде гореше депонија.
Македонија
Хуманитарен пикник за вработените во „Алкалоид“: Донирани околу 1,8 милиони денари за лицата во третата доба

Поттикнати од вредностите кои ја обликуваат корпоративната култура на „Алкалоид“, преточени во хуманост, солидарност и во грижа за заедницата, над 4.000 вработени, членови на нивните семејства и пријатели на компанијата ја продолжија хуманата мисија, која единаесетти пат се спроведува под закрила на Фондацијата „Трајче Мукаетов“.
Хуманоста е силата што ги подигнува луѓето, оваа година визуализирана преку симболиката на балон со топол воздух, илустриран на специјално дизајнираните маички за овој повод, преку кои вработените на „Алкалоид“, членовите на нивните семејства и/или нивните пријатели собраа околу 1,8 милиони денари, кои ќе му бидат донирани на Црвен крст на Град Скопје, а ќе се наменат за поддршка на социјалните сервиси за стари лица.
„Постарите лица, чија мудрост и животно искуство заслужуваат почит, внимание и поддршка, се вреден дел од општеството. Со нашата помош на активностите и иницијативите на Црвен крст на Град Скопје насочени кон социјалните сервиси за лицата во третата доба, веруваме дека заедно можеме да создадеме услови староста да биде период исполнет со достоинство, сигурност и човечка топлина. Хуманоста е силата што ги подигнува луѓето, а токму затоа преку оваа поддршка сакаме да им помогнеме на постарите лица да се издигнат над предизвиците и да имаат поисполнет и поквалитетен живот“, истакна Живко Мукаетов, Генерален директор/Претседател на УО на „Алкалоид“ и Претседател на Фондацијата „Трајче Мукаетов“.
Секретарот на Црвен крст на Град Скопје (ЦКГС) Сузана Тунева-Пауновска истакна: „Една од мисиите на ЦКГС е да им помогне на лицата во третата доба да имаат достоинствена и безбедна старост. Нивните предизвици се големи – осаменост, намалена мобилност или финансиски тешкотии – но затоа сме тука ние. Преку домашните посети, уредот Итно копче, санитетскиот транспорт и преку дневните центри за активно стареење им овозможуваме поддршка, сигурност и соодветна грижа. Но, оваа наша мисија не би можела да се реализира без силни и посветени партнери. Со ’Алкалоид’ знаеме дека не сме сами – нивната поддршка ни овозможува да продолжиме со поголема храброст и енергија и да реализираме повеќе активности, акции и
иницијативи. Заедно можеме повеќе!“.
Во насока на вредностите кои ја обликуваат корпоративната култура на „Алкалоид“, преточени во
хуманост, солидарност и грижа за заедницата, компанијата има воспоставено долгогодишно
хуманитарно партнерство со Црвен крст, поддржувајќи ја оваа хуманитарна организација како во
делот на социјално-хуманитарната дејност и справувањето со кризи и катастрофи така и на полето на крводарителството.
Првиот хуманитарен пикник на „Алкалоид“ под закрила на Фондацијата „Трајче Мукаетов“ е
одржан на 3 септември 2011 година.
Македонија
Алиу вели дека во здравството се реализирани над 1.250 вработувања во рекордно време

Министерот за здравство Азир Алиу ги поздрави учесниците на синдикалната школа организирана од Самостојниот синдикат на вработените во универзитетските клиники, клинички болници и други јавни здравствени установи во Република Македонија.
Како што информираат од Министерството за здравство, Алиу истакнал дека ја реафирмира заложбата за синдикатите како искрен партнер во градењето на подобар здравствен систем.
– Особено инспиративна е темата „Синдикализам во здравството: правата не се даваат – се освојуваат“, па оттука сакам да ја реафирмирам нашата заложба дека синдикатите се наш искрен партнер за подобар здравствен систем. Сакам да ве охрабрам за уште позајакната соработка, мојот кабинет е секогаш отворен за сугестии, идеи, забалешки, бидејќи заедно сме уште подобри, вели Алиу.
Во соопштението се наведува дека се реализирани над 1.250 вработувања во рекордно време и дека е спроведен процесот за вработување приватни специјализанти, со што е решен, велат, деценискиот егзистенцијален проблем на оваа категорија здравствени работници.
– Министерството за здравство покажува дека го почитува достоинството на сите медицински лица. Воедно, останува отворено за натамошна соработка со синдикатот. Заеднички продолжуваме да ги решаваме сите отворени прашања и предизвици, со цел да излеземе во пресрет на здравствените работници, и секако на пациентите, стои во соопштението.