Македонија
(Видео) Костадинов: Мицкоски не го брани Уставот, туку криминалите на својот шеф Груевски

Портпаролот на СДСМ, Костадин Костадинов, во врска со вчерашната поддршка на протестите од страна на ВМРО-ДПМНЕ, вели дека оваа опозициска партија и Христијан Мицкоски не отстапуваат од режимското насилничко однесување на штета на граѓаните и државата.
„Мицкоски без срам ги нарече уставобранители и чесни луѓе оние што пред четири години насилно и со оружје упаднаа во Собранието со намера да убиваат пратеници, да тепаат новинари и вработени во собраниските служби. Тоа не се уставобранители, ниту некогаш ќе бидат. Тоа се насилници што шефот на Мицкоски во Будимпешта ги поттикна да извршат терористичко загрозување на уставниот поредок за да го спасат од одговорност за злоделата“, истакна Костадинов.
Според портпаролот на СДСМ, тие луѓе на 27 април, меѓу кои, како што рече, беше и Мицкоски, не го бранеа Уставот, туку криминалите на Никола Груевски.
„Денес, четири години подоцна, Мицкоски не само што не се извини, не само што не жали за крвавиот четврток, туку отворено застана во одбрана на насилници, криминалци и фашисти. 27 април е најцрн датум во историјата на македонската демократија, но и датум што ВМРО-ДПМНЕ го слави наместо да се извини. Тоа зборува дека ништо не е сменето во опозициската партија, ВМРО-ДПМНЕ предводена од Мицкоски е истата ВМРО-ДПМНЕ предводена Груевски. Тоа е насилничка партија, која сака одново да гази врз слободата, врз демократијата, да се пресметува со неистомисленици, да шири омраза и поделба меѓу граѓаните“, вели Костадинов.
Според него, Мицкоски не е поместен ниту милиметар од, како што нагласи, режимско-насилничката матрица на Груевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Денес се навршуваат 24 години од загинувањето на бранителите кои нагазнаа на мина кај Љуботенски бачила

На повеќе локации во Скопје денеска ќе бидат одбележани 24 години од загинувањето на осуммината бранители, припадници на резервниот состав на Армијата кои загинаа во 2001 година кај месноста Љуботенски бачила.
Делегација од Министерството за одбрана и Генералштабот на Армијата предводена од директорот на Генералштабот, бригаден генерал Орце Јордев ќе положи венци со свежо цвеќе пред спомен обележјето на паднатиот бранител Томислав Настевски во Општина Ѓорче Петров, споменикот на паднатите бранители во село Волково, споменик на загинати бранители во село Љубанци и спомен-плоча во касарната „Илинден“.
Делегација на Собранието во состав на пратеничките Емилија Ангелова и Каролина Насковска, ќе положи свежо цвеќе пред спомен-обележјето поставено во чест на загинатите бранители во село Љубанци.
Општина Ѓорче Петров организира оддавање почит пред спомен-чешмата на Томислав Настески – Бумбар, во урбана заедница Мирче Ацев (ул. „Ѓорче Петров“) додека централна комеморативна манифестација ќе биде пред споменикот на загинатите бранители во Волково.
На 10 август 2001 година со воено товарно возило на патот кон месноста Љуботенски Бачила при активирање на мина животот го загубија осум припадници на резервниот состав на Армијата: Томе Бадаровски, Гоце Чанкуловски, Бранко Јанев, Томислав Настевски, Марјанчо Бошковски, Ивица Златевски, Томе Димовски и Раде Јанковски. На овој ден се оддава почит и на Ацо Ангеловски кој во 2000 година загина во Арачиново при вооружен напад врз полициска патрола.
Македонија
Летните одмори направија редици на Табановце

Сообраќајот на државните патишта се одвива непречено, по суви коловози. Интензитетот на сообраќај на патните правци надвор од градските средини е зголемен. Поради летните одмори се бележи зголемена фреквенција на возила, на ГП Табановце времето на чекање за влез во државата е околу еден час, на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Внимавајте на сонце, денес многу топло со температури до 39 степени

Времето денеска ќе биде сончево и многу топло. Ќе дува слаб до умерен ветер од источен и североисточен правец.
Минималната температура ќе биде во интервал од 12 до 21, а максималната ќе достигне од 32 до 39 степени.
Во Скопје, сончево и многу топло со слаб до умерен променлив ветер.
Минималната температура ќе се спушти до 19, а максималната ќе достигне до 39 степени.
Под влијание на многу топла воздушна маса од југ во текот на наредната седмица времето ќе биде претежно сончево и многу топло.
Дневната температура насекаде ќе биде над 30 степени, а наместа ќе достигне и 40 степени.