Македонија
(Видео) Костадинов: Целта на ВМРО-ДПМНЕ е да го исполитизира пописот

Владејачката партија оцени дека барањето на ВМРО-ДПМНЕ пописот да се одржи во 2021 година е лицемерие и обид за да внесат политички калкулации во реализацијата на самата статистика операција.
Портпаролот на СДСМ, Костадин Костадинов, одговарајќи на новинарско прашање изјави дека лани бил објавен Законот за пописот, а оттогаш до денес ВМРО-ДПМНЕ немала ниту една забелешка. Како што рече Костадинов, тоа се сменило сега кога законот влегол во собраниска процедура, па наеднаш се појавуваат нејаснотии и дилеми.
„Јас сум апсолутно убеден и сум оптимист дека доколку навистина имаат конструктивни предлози треба да се даде шанса во постапка на дијалог, во отворена постапка, и доколку има конструктивни предлози, би биле прифатливи. Но, апсолутно, мораме од старт, сите политички чинители, да ја тргнеме политиката од спроведувањето на пописот како статистичко-логистичка операција којашто е многу важна за напредокот на државата, секако и за граѓаните. Не смееме да дозволиме, како што реков и во изјавата, 16 години да бидеме единствена држава во Европа којашто нема спроведено попис“, рече Костадинов.
Во однос на барањето на ВМРО-ДПМНЕ за примена на посебна комисија за попис, Костадинов рече дека би сакал да даде шанса на дијалогот и на разговорите, а секако, доколку има навистина конструктивни предлози од страна на опозицијата, не значи дека не може да бидат истите прифатени. Според Костадинов, целта на ВМРО-ДПМНЕ е да го исполитизира целиот тој процес.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски на саемот „Четири години работа за тебе“: Делата, а не зборовите ја покажуваат вредноста

На денешниот настан „Саем-Отчет“ под мотото „4 години работа за тебе“, претседателот на ВМРО-ДПМНЕ, Христијан Мицкоски, имаше свое обраќање пред присутните, истакнувајќи ја важноста на отчетноста и реализираните проекти во изминатите четири години.
„Честта е огромна да се присуствува на политичкиот саем кој е одговор на прашањето што работеа градоначалниците на ВМРО-ДПМНЕ и коалицијата во последните четири години. Тоа за нас претставува и одговорна одговорност, затоа што не бегаме од сите наши решенија, од целата наша работа и од проектите кои ги направивме изминатите четири години“, рече Мицкоски.
Тој нагласи дека вредноста на една личност не се состои од зборовите, туку од делата, не од памфлетите, туку од енергијата вложена за постигнување на успех.
„Образот и честта се најскапата работа која може да се задржи и за која нема манипулации, лажења ниту неискрен однос. Поважно од сè е стоечки исправено со гордо крената глава да кажеме дека поминавме низ еден тежок период, каде во исто време ги вадевме општините од бездната во која беа, последно долгогодишно запоставување, и решававме проблеми на граѓаните“, рече Мицкоски.
Тој истакна дека во текот на тие четири години, три години секој градоначалник на ВМРО-ДПМНЕ и Коалицијата работел со централна Влада која немала слух и имала други приоритети, кои не вклучувале локалните проблеми на граѓаните.
„Програмата која ја ветивме, во најголем дел, вие ја остваривте“, потенцира Мицкоски во обраќањето на Саем-Отчет.
На настанот присутните имаа можност да видат и детални прикази на проекти и реализирани активности на градоначалниците на ВМРО-ДПМНЕ и коалицијата во изминатите четири години, како дел од транспарентноста и отчетноста пред граѓаните.
Скопје
Дел од Кеј 13-ти Ноември останува без водоснабдување

Поради дефект на водоводна цевка, дел од корисниците на Кеј 13-ти Ноември, од хотел „Холидеј ин“ до Камениот мост, ќе останат без вода од 13:00 часот, информираат од ЈП „Водовод и канализација“ – Скопје.
Водоснабдувањето ќе биде прекинато се додека траат работните активности за отстранување на дефектот. Од јавното претпријатие апелираат до граѓаните за трпение и разбирање додека трае интервенцијата.
Македонија
„Храброста на нашите колеги е пример за идните генерации“, порачаа од ЕБР на Денот на Единицата

Единицата за брзо распоредување (ЕБР) денеска одбележува 24 години од своето формирање, а припадниците на оваа единица потсетија дека не ги забораваат своите колеги кои го дале животот за безбедноста и мирот на Македонија.
„Додека денес го одбележуваме Денот на Единицата за брзо распоредување и им оддаваме почит на храброста, посветеноста и професионализмот на припадниците на оваа единица, не смееме да ги заборавиме сите оние кои го дадоа својот живот за безбедноста и мирот на нашата татковина“, порачаа од ЕБР преку социјалните мрежи.
Тие додадоа дека жртвата на нивните колеги претставува темел на слободата, а нивната храброст е пример за идните генерации.
„Вечна им слава и почит“, завршуваат од ЕБР во пораката по повод јубилејот.