Македонија
(Видео) Костовски: Пендаровски цврсто стои зад европскиот пат и прозападната ориентација на земјата

Сведоци бевме на едно државничко обраќање на претседателот Стево Пендаровски како претседател на сите граѓани.
Ги опфати предизвиците во изминатите години со фокус на клучните државни и национални цели: членството во НАТО и ЕУ, истакна Мартин Костовски, пратеник на СДСМ.
СДСМ, додаде тој, го поздравува фактот што претседателот Пендаровски цврсто стои на ставот дека државата мора да опстои на европскиот пат и прозападната ориентација затоа што тоа е наша единствена алтернатива.
Членството во ЕУ, според него, значи подобар стандард за граѓаните, повисоки плати и пензии, сигурна европска иднина за младите генерации.
„Лагите и манипулациите за бугаризација и асимилација заедно со лагите дека ќе биде загубен македонскиот јазик и идентитет се поразени.
Македонскиот јазик е потврден во ЕУ, договорот со Фронтекст е прв договор што тоа го потврдува, а Унијата веќе почна и процес на ангажирање преведувачи и толкувачи од македонски јазик.
Ние како пратеници од СДСМ се гордееме за сите одлуки што го овозможивме македонскиот јазик да биде дел од ЕУ. Срамот останува кај пратениците на ДПМНЕ. кои со вувузели и тропање по маси го попречуваа процесот.
Иако имавме успешен скрининг, не почна отворањето поглавја со ЕУ. Виновникот има име и презиме: тоа е ДПМНЕ“, рече пратеникот од СДСМ.
Според Костовски, ДПМНЕ одработува за туѓи центри и слугува на странски интереси, кои не ѝ мислат добро на земјата.
Оценува дека со ДПМНЕ и Левицата нема ЕУ.
„Слушнавме вчера и од Мицкоски, ниту за 100 години.
Кристално е јасно дека на изборите ќе се судрат два политички блока, два концепта, проевропскиот предводен од СДСМ и антиевропскиот предводен од ДПМНЕ и Левицата.
ДПМНЕ и Левицата се закана за европскиот пат и иднината на државата и ќе бидат поразени.
Пропуштивме историска шанса во 2008 година за членство во НАТО и изгубивме 12 години“, потенцира Костовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Ќе изумреме како диносаурусите aко не се справиме заедно“ – Марковски и Белчева најавуваат решение за депонијата Вардариште

Во близина на депонијата Вардариште во Скопје, кандидатот за градоначалник проф. Д-р Горан Марковски и носителката на кандидатската листа за советници Јана Белчева Андреевска од граѓанската платформа „Независни заедно“ одржаа прес-конференција, откако граѓаните протестираа поради повторното горење на депонијата.
„Ќе изумреме како диносаурусите, ако не се справиме со загадувањето“, изјави Марковски, додавајќи дека досегашниот проблем со Вардариште е резултат на недостиг на политичка волја, иако постојат стручни студии и акциски планови. Тој потенцира дека решението мора да биде стручно, вклучувајќи методи за собирање и користење на метанот од депонијата за производство на електрична енергија.
Белчева Андреевска нагласи дека реализацијата на усвоените стручни планови, како чистење на дивите депонии, рекултивација на Вардариште, модернизација на системите за гас и исцедок и зајакнување на селекцијата и рециклирањето, ќе донесе видливи резултати. Таа додаде дека планот треба да вклучува затворање на дивите депонии, 24/7 периметарска контрола со видео-аналитики, термални камери и дронови за откривање на нови истурања и жаришта, со интегрирани податоци и јавна отчетност.
„Нам сојузници во овие напори мора да ни бидат граѓаните кои се будни, свесни и бараат промени и ќе го дадат гласот за оние кои веќе биле активни, и ќе продолжат да работат за јавниот интерес – а тоа е чист воздух и здрава животна средина“, рече Белчева Андреевска.
Платформата „Независни заедно“ ги обединува независните советници и локални иницијативи од неколку општини во Скопје и има за цел враќање на локалната власт во рацете на граѓаните преку чесен, стручен и транспарентен пристап кон управувањето со јавниот интерес.
Македонија
Коњановски даде отчет за сработеното на повеќе од сто страници

На повеќе од сто страници градоначалникот на Општина Битола, Тони Коњановски ги сумираше резултатите од работењето на локалната самоупорва под негово водство.
Со одговорност, транспарентност и посветеност во извештајот стои дека се реализирани стотици капитални и локални проекти, насочени кон подобрување на инфраструктурата, образованието, културата, спортот и социјалната заштита.
Меѓу поважните инвестиции се осветлувањето на Широк Сокак, изградбата на влезовите во градот од Охрид и Скопје, нови велосипедски патеки, нов парк во Нова Битола, поставување фотоволтаици во десет училишта, изградба на нови детски градинки, реконструкција и изградба на над 50 километри улици и патишта, урбано зазеленување, како и бројни спортски и рекреативни содржини.
Во извештајот се потенцира дека Општина Битола добила 707 милиони денари од Владата за реализација на 65 нови проекти, од кои 14 од 16 се веќе започнати. Со тоа, според Коњановски, се потврдува насоката кон одржлив развој и европски стандарди во функционирањето на општината.
„Овој отчет е доказ дека визијата, преку стратешко планирање и упорна работа, може да се претвори во конкретни дела. Битола чекори напред со проекти кои оставаат траен белег за идните генерации,“ рече градоначалникот Коњановски.
Документот со отчетот е прикачен на веб страницата на Општина Битола и достапен е за сите граѓани.
Македонија
Алиу потврди дека Кардиохирургија не прави операции оти нема анестезиолози и најави ад хок решение: лекари од Словенија ќе ги пополнуваат празнините

Со билатерален договор за мобилност на лекари и медицински сестри меѓу Словенија и Македонија ќе се пополнуваат празнините во нашиот здравствен систем. Министерот за здравство Азир Алиу договорот го претстави како ад хок решение за недостигот од анестезиолози на Клиниката за кардиохирургија, каде што веќе неколку дена пациенти се жалат дека не се прават операции оти нема анестезиолог.
„Затоа денес имавме состанок да се направи билатерален договор меѓу Словенија и Македонија со цел да имаме мобилност на лекари и медицински сестри меѓу двете држави. Ценам дека ова ад хок решение ќе покрие дел од потребите. Билатералниот договор значи дека лекари и сестри од Словенија може привремено да работат тука, од три до шест месеци, и наши лекари и сестри да работат во Словенија. Тоа ќе значи пренос на знаења, нови методологии и технологии меѓу двете земји. Во ваков случај, како на Кардиологија, каде што во моментот се многу лимитирани за операции, проблемот ќе може да се надмине привремено, а за долгорочно надминување нам ќе ни требаат, за жал, години“, рече министерот Алиу, кој утрово имал состанок со директорот на словенечката Кардиохирургија.
Според министерот, здравството е доведено до сегашната точка поради лошиот пристап и лошото креирање политики. Најави дека отсега политиките ќе се креираат долгорочно, за најмалку десет години, колку што вообичаено е потребно да се создаде кадарот што сега го нема. Најави посебен пристап, кој ќе тргне уште од средното медицинско образование преку факултетот, специјализациите и супспецијализациите за да се направи проектирање на капацитетите за најмалку десет години.