Оливер Спасовски за командири на гранични премини поставува луѓе со издржана казна затвор за шверцување. За командири на гранични премини, наместо луѓе што ќе се борат против криминалот, се поставуваат луѓе што се искусни во правење криминал, изјави пратеникот на ВМРО-ДПМНЕ, Зоран Коцевски.

„Пред само три месеци, на граничниот премин Ќафасан, за командир на граничен премин е поставено лицето Б.А. Ова лице веќе било на истата работна позиција пред десетина години во екот на големата полициска акција за шверцување добиток од Македонија во Албанија.

Се работи за аферата „Милка“, во која беа опфатени 31 лице, кои биле дел од организиран синџир за шверцување добиток. За оваа афера своевремено пишуваа и медиумите. Во рамките на осудените имало и полициски службеници, кои примале поткуп за да ја договорат патеката за шверцување и кои за тоа наплатувале по 3 и пол евра од килограм добиток“, рече Коцевски.

Тој додаде дека Б.А. издржал казна затвор од 3 и пол години како дел од синџирот за шверцување добиток, а дека сега повторно е командир на граничен премин.

„Лицето го извршило ова кривично дело заради позицијата што ја имало во МВР. Истото ова лице сега повторно се наоѓа на позицијата командир на граничен премин. Спасовски да каже како е можно ова лице, кое е правосилно осудено, со издржана казна затвор за шверцување, да се постави за командир на граничен премин? Дали на злосторникот му се дава можност повторно да го изврши кривичното дело? Која е пораката што ја испраќаат Спасовски и Ковачевски? Дали ова е борбата со криминалот и корупцијата? Спасовски да не чека и веднаш да го разреши лицето Б.А. од функцијата на која сам го поставил“, порача Коцевски.

Тој смета дека одговорност мора да има и од Спасовски.

„Ова не е прв скандал во МВР. 7 години е министер за внатрешни работи. 7 години безбедноста е на најниско можно ниво“, заклучи тој.