Македонија
(Видео) Кузеска: Кога истрагата е селективна, а обвинителот станува подобен за Мицкоски, правда не може да се очекува

Страшната трагедија во Кочани, во која загинаа 59 луѓе, повикува на неселективна и темелна истрага за лоцирање на одговорност. За жал, од досегашниот тек на истрагата гледаме дека се води селективно и не се опфатени актуелните функционери и службеници, иако биле на функции на денот кога се случила трагедијата, истакна Богданка Кузеска, портпаролка на СДСМ.
„Како тоа тие што се директно одговорни за безбедноста на самиот настан, во БЈБ и МВР, во ОВР Кочани и Штип како е можни тие да не се опфатени со истрагата?
Законот за јавни собири јасно определува кога и за какви настани полицијата има обврска да постапи и да превенира.
Доколку институциите постапеле согласно своите законски обврски, на терен ќе имало присуство на Противпожарна бригада, Брза помош, адекватен број полициски службеници и сите неопходни безбедносни протоколи за ваков тип јавен собир.
Се поставува прашањето како е можно да не се истражуваат лица кои вечерта биле на одговорни позиции со законска должност да постапат – но не го сториле тоа?
Понатаму, зошто актуелните директори на ДПИ и на УЈП не се опфатени со истрагата“, прашува Кузеска.
Според неа, истражниот процес, кој мора да биде непристрасен и целосен, се претвора во инструмент на политичко калкулирање.
Кузеска оценува дека се заштитуваат позиции, се менуваат стратегии.
„Пред само неколку недели, јавниот обвинител беше под притисок за разрешување и тоа директно од Мицкоски.
Владата започна постапка, се вршеа јавни напади, се создаваше јасен наратив за негова недоверба.
Одеднаш пресврт, станува „потребен“ – постапката е стопирана, Советот за јавни обвинители не заседава, а Мицкоски повикува да му се даде шанса.
Кога обвинителот од неподобен станува подобен, а истрагата ги допира само оние од минатото тогаш е јасно дека неселективна правда не може да се очекува“.
СДСМ, додава таа, нема да молчи.
„Ние нема да го оставиме јавниот интерес во рацете на политичари што правдата ја испорачуваат според нивната политичка потреба.
Повторуваме, секој што има одговорност, мора да одговара. Без оглед на политичка припадност или моментална функција.
Мицкоски треба да знае, граѓаните на улиците се борат токму протви овој систем, против овие влијанија, неодговорност и селективна правда. Ова е сржта на проблемот“, додава Кузеска.
Како што напоменува, семејствата на загинатите не заслужуваат таква истрага. Македонија, нагласува Кузеска, заслужува вистина и целосна одговорност за сите. „Се друго ќе значи доуништување на и така малата доверба на граѓаните во државата“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Предложен притвор за три лица: ОЈО поведе истрага за загрозување на животната средина со диви депонии на Вардариште

Со координирани дејствија на Основното јавно обвинителство Скопје и Министерството за внатрешни работи во изминатите два дена и извршени претреси на локацијата Вардариште по наредба на судија на претходна постапка, обезбедени се докази кои даваат основано сомнение дека три лица сториле кривично дело – Загрозување на животната средина и природата со отпад од член 230 став 1 од Кривичниот законик.
Основното јавно обвинителство Скопје денеска поведе истрага и предложи на тројцата да им биде определена мерка притвор поради опасност од бегство, можност за влијание врз сведоци и можност да продолжат да го повторуваат делото.
Осомничените, подолг временски период се до 02.09.2025 година, на ул.„Зендел Џемаил“ бб во Скопје, создале депонија спротивно на прописите за заштита на животната средина, со која можеле да предизвикаат значително оштетување на квалитетот на почвата, воздухот или водата и да предизвикаат опасност за животот или здравјето на луѓето.
Сите тројца вршеле дејност – откуп на старо железо, метални производи, стари акумулатори и други обоени метали на импровизирани пунктови – отпади на предметната локација, без означена фирма, без да регистрираат правно лице и без да поседуваат соодветна дозвола за вршење на дејност за управување со отпад која согласно закон ја издава Министерството за животна средина и просторно планирање.
Македонија
Сиљановска-Давкова им врачи признание „Инженерски прстен 2025“ на 14 најуспешни дипломирани инженери

Претседателката Гордана Сиљановска-Давкова им додели „Инженерски прстен 2025“ на 14 најуспешни студенти, дипломци на инженерски факултети во рамките на универзитетите: „Св.Кирил и Методиј“ – Скопје, „Св.Климент Охридски“ – Битола, „Гоце Делчев“ – Штип и Државниот универзитет – Тетово.
Свечената церемонија се одржа на платото пред црквата „Свети Климент и Пантелејмон“ – Плаошник, во Охрид.
Добитници на „Инженерски прстен 2025“ од УКИМ – Скопје, годинава се: Фросина Станковска – Архитектонски факултет, Марко Ѓорѓиоски – Градежен факултет, Харитина Сакова – Машински факултет, Васка Зарковска – Технолошко-металуршки факултет, Сара Ацковска – Факултет за земјоделски науки и храна, Димитар Пешевски – Факултет за информатички науки и компјутерско инженерство, Кирил Христовски – Природно-математички факултет, Теа Костадинова – Факултет за дизајн и технологии на мебел и ентериер, Рената Павлеска – Факултет за електротехника и информациски технологии.
Наградени студенти со „ Инженерски прстен“ 2025 од УКЛО – Битола се: Катерина Стојкоска – Технички факултет и Софи Гајтановска – Факултет за информатички и компјутерски технологии.
Од УГД Штип, носители на наградата се: Сара Панева – Факултет за природни и технички науки и Бојана Тасева – Факултет за информатика.
Од ДУТ, признанието го доби Гзим Дервиши – Факултет за применети науки.
Сиљановска-Давкова, честитајќи им го на добитниците престижното признание, ја истакна важноста од континуираната подршка на образованието и науката, како најдобра општествена инвестиција.
Таа ја реафирмира потребата од развојна образовна политика, компатибилна со регионалната и европската, насочена кон наша интегрирација во европската истражувачка сфера и афирмација на меѓународниот истражувачки пазар.
Според неа, само образовани и компетенти луѓе на политички и управувачки позиции можат да ја разберат и поддржат науката.
Андреј Лепавцов, претседателот на Инженерската институција на Македонија, им порача на најдобрите инженери во прстенот да гледаат не само признание, туку и обврска и предизвик за поголемо знаење и повисоки стандарди на квалитет.
„Наша должност е да ве поддржуваме во секоја фаза од вашата професионална кариера. Ние ќе бидеме тука да ве поврземе со индустријата, да ви помогнеме да ги продолжите вашите академски патеки“, рече тој и нагласи дека институцијата со која раководи ќе ги охрабрува да се вклучат во креирањето на инженерската политика на државата.
Македонија
ДУИ во паника, клевети од страв од пораз, каде се вработени сопругата и сестрата на Бујар Османи, прашуваат од „Вреди“

Партијата прогласена за Non Grata од меѓународниот фактор реагирала на вработувањата на Албанците во државните институции. Тие преку клевети сакаат да ги покријат своите неуспеси во периодот додека повеќе од две децении беа на власт, велат од „Вреди“.
Широката јавност, потсетуваат од таму, многу добро знае дека тие 20 години се грижеа единствено за вдомување на своите семејства, и тоа на работни места каде месечната плата е повеќекратно повисока од просечната во РСМ.
„Наместо да дадат отчет зошто Албанците ги претворија во администратори без работа и зошто ги оставија без реална застапеност, функционерите на ДУИ избираат да клеветат.
На оние што излегуваат на прес-конференции, им порачуваме да се вратат во канцеларија и да го прашаат својот шеф Бујар Османи, кој е и шеф на штаб, и кандидат за градоначалник, а воедно и потпретседател на партијата, зошто ги лаже!
Нека го прашаат Османи каде е вработена неговата сопруга, чие име од коректност нема да го спомнеме? Но, пред да прашаат, ние им откриваме дека сопругата на Бујар Османи зема месечна плата над 100 илјади денари, што изнесува колку четири плати на администратори кои ДУИ ги лажеше повеќе од 20 години.
Исто така, нека прашаат каде е вработена неговата сестра и колкава е нејзината месечна плата“.
Албанците, според „Вреди“, добро знаат дека во М-НАВ, сестрата на Бујар Османи зема месечна плата над 3 илјади евра, што е колку шест плати на еден друг администратор.
„Вреди“ како што истакнуваат, нема повеќе да наведува имиња, но предупредува дека во наредните денови целосно ќе го обелодени непотизмот и вработувањата на семејствата на ДУИ во последните 20 години, со име и презиме.
„За направените клевети ќе се иницира соодветна постапка доколку не биде побарано јавно извинување од ДУИ“.