„Праксата на корумпирање на медиумите беше одлика на 11-годишното режимско владеење на ВМРО-ДПМНЕ, Никола Груевски и неговиот советник Христијан Мицкоски. Но, таа одлика и како опозиција ја продолжува сега извршителот Мицкоски во спрега со својот шеф од Будимпешта“, изјави Богданка Кузеска, портпаролка на СДСМ.

Според неа, последното новинарско истражување на словенечки медиум откри дека сума од два и пол милиона евра од Унгарија завршила во медиуми познати по ширењето лажни вести и конструкции.

„Тоа се истите медиуми што шефот на Мицкоски, Груевски, со години ги финансира со државни пари. Со црни пари Мицкоски и ВМРО-ДПМНЕ финансираат медиуми што се контра успехот на државата и против интересите на граѓаните. Медиумите под контрола на ВМРО-ДПМНЕ продолжуваат да го штитат криминалот на Никола Груевски, азилантот кој се крие од правдата во Будимпешта, центарот од каде што излегуваат црните пари за самопрогласените опозициски медиуми, односно ширачи на лаги и дезинформации.

ВМРО-ДПМНЕ спроведува црна медиумска кампања против државата со цел да се врати на власт и да ги амнестира Никола Груевски и сите други партиски криминалци. Сега е јасно како центарот за лаги и манипулации на опозицијата продуцира толку лажни случаи против Владата, ги пласира во медиумите под нивна контрола, а потоа ги прераскажува од белиот дворец. Ним очигледно им помагаат надворешни антидржавни фактори, кои со корумпирање на медиумите ги загрозуваат демократијата и европската иднина на државата.

СДСМ е посветен на унапредување на слободата на говорот и слободата на медиумите, но истовремено и на борба против лажните вести и измислици и сомнителното финансирање медиуми. Затоа, бараме надлежните институции по допрен глас да постапат по објавените информации и да го испитаат начинот на финансирање одредени медиуми. Република Северна Македонија е правна држава во која законите важат за сите еднакво“, додаде таа.