Македонија
(Видео) Курц: Австрија ќе направи сè што може за Македонија да добие позитивна одлука

Премиерот Зоран Заев имаше тет-а-тет средба со австрискиот канцелар Себастијан Курц, кој на заедничка прес-конференција го соопшти и јавно ставот дека Австрија ја поддржува Македонија за отворање претпристапни преговори со ЕУ. Курц, исто така, рече дека верува дека претседателот Емануел Макрон ќе донесе проевропска одлука и дека се надева на позитивна одлука од Франција, за да не дојде, како што рече, до застој на регионот.
Канцеларот Курц рече дека Македонија заслужува од ЕУ отворање претпристапни преговори. Како што соопшти владината прес-служба, Курц најавил дека Австрија ќе направи сè што може, ЕУ Советот да донесе позитивна одлука за Македонија. Канцеларот Курц исто така ги повика граѓаните на Република Македонија на претстојниот референдум во нашата земја да го поддржат договорот со Грција.
Премиерот Заев рече дека ова е доказ повеќе дека Македонија, во Австрија, има вистински, голем и искрен пријател. „Важно е охрабрувањето што го слушнавме денес од Вас како прв човек на Владата на Австрија, на два дена пред Советот на министри на ЕУ, дека вашата држава поддржува отпочнување преговори на Македонија со ЕУ“, рече Заев.
На прес-конференцијата беа поставени и новинарски прашања околу ставот на Франција за добивањето датум за почеток на преговори со Македонија. Заев рече дека ја разбира внатрешната дебата во Франција околу проширувањето, но дека Македонија не бара веднаш да стане членка на ЕУ, туку да продолжи мотивацијата од ЕУ и европското однесување. „Верувам дека претседателот Макрон ќе донесе одлука за продолжување на мотивацијата“, рече премиерот.
На прашањето за противењето на претседателот Ѓорге Иванов да го потпише договорот со Грција и проценките за исходот од референдумот ако Македонија не добие датум, премиерот Заев изрази оптимизам дека референдумот ќе успее, а одлуката на граѓаните ќе мора да ја почитуваат сите. „Ако ЕУ не даде датум ние нема да се откажеме од европските вредности, но ова прашање е причина зошто Франција и ЕУ треба да се однесуваат мотивирачки кон мојата земја“, рече Заев.
Инаку, Австрија го презема претседавањето со Советот на ЕУ од 1 јули годинава.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Царината заплени автобус кој редовно возел на релација Истанбул-Приштина, бил прилагоден за криумчарење

Запленет е автобус специјално адаптиран за криумчарење и над 500 парчиња облека со потпис на познати светски брендови, информираа од Царинската управа.
Автобусот со косовски регистарски таблички вршел редовен превоз на патници на релација Истанбул-Приштина, а бил специјално конструиран, адаптиран и прилагоден со цел криење стока.
Случајот е откриен од страна на царински службеници на влез во државата на граничен премин Деве Баир. При извршената контрола во делот на просторот за багаж на автобусот во горниот дел со отстранување на завртките на дрвена даска e откриен простор кој не е фабрички и е продолжен за 10 см по целата должина на багажниот простор на автобусот, што претставува специјална направена преграда (бункер).
Автобусот е запленет, а до надлежниот суд ќе биде поднесена соодветна пријава до возачот на автобусот, инаку косовски државјанин, заради прекршување на царинските регулативи.
Македонија
Аматеризмот во надворешната политика ни донесе двојна штета за стратешките партнерства со САД и ЕУ, според СДСМ

Вчерашното позиционирање на делегацијата на Северна Македонија во ОН во однос на гласањето по резолуциите на САД и ЕУ е скандалозно. Северна Македонија гласаше „воздражно“ за резолуцијата на ЕУ и беше единствена држава од Европа покрај Унгарија која не ја поддржа оваа резолуција. Дополнително, за декларацијата на САД, на која што нашата Влада и Мицкоски одлучија да бидат коспонзор, повторно Северна Македонија гласаше „воздражно“, велат од СДСМ.
Ваквите одлуки, според нив, укажуваат на целосен аматеризам во воедењето на надворешната политика на земјата.
„Со само еден потег, Владата направи двојна штета кон стратешките партнерства со ЕУ и САД. Ставот на СДСМ во однос на војната во Украина е јасен, цврст и усогласен со ЕУ: Русија е агресор и изврши неоправдана и непредизвикана инвазија врз Украина која е суверена и независна држава. Овој став е принципиелен и непроменет. СДСМ останува доследен на принципите за поддршка на независноста и територијалниот интегритет на Украина, во согласност со меѓународното право и заедничките позиции на Европската унија“, потенцираат од опозициската партија.
За СДСМ, стратешкото партнерство со Соединетите Американски Држави е од суштинско значење и треба постојано да се гради и зајакнува.
Истовремено, како што нагласуваат, македонската дипломатија мора да остане фокусирана на нашиот клучен државен интерес – европската интеграција.
„Соединетите Американски Држави се еден од најважните страатешки партнери и тоа партнерство треба да биде во функција на забрзување и успешно завршување на евроинтегративниот процес. Мицкоски ја води меѓународната политика без поширока координација и консултации на важни прашања и прави огромни грешки. Неприфатливо е одлуки кои се од стратешко значење за иднината на земјата да се носат избрзано и своеволно. Одлуките за меѓународната позиција на државата мора да се носат транспарентно, со координација на сите релевантни институции и во согласност со нашите стратешки партнери“.
СДСМ, додаваат, инсистира на јасна, конзистентна и усогласена надворешна политика која ќе ги почитува и зајакнува нашите меѓународни партнерства, а истовремено ќе ја води државата кон нејзината примарна стратешка цел – членство во Европската унија.
Македонија
Меџити за обвинувањата: СДСМ и ДУИ се синхронизирани, не може административна работа да се прикаже како голем скандал

СДСМ оди по паметот на ДУИ, синхронизирани се. Не може административна работа или архивска работа да се прикаже како голем скандал, реагира првиот вицепремиер, Изет Меџити по обвинувањата на Социјалдемокртскиот сојуз дека работел незаконски, лично потпишувајќи ги сите предмети, без законска основа и без почитување на процедурата за административно постапување.
Меџити рече дека првин се зборувало за одземање на ингеренции од Министерството за животна средина, па кога виделе дека инспекторатот кој бил автономен, сега е сектор во рамките на Министерството, излегуваат со второ обвинување дека има простор за злоупотреба и тоа тоа го констатирал административниот инспекторат.
„Се работи за редовна контрола која е во програмата на Државниот административен инспекторат. Тие имаат забелешка, опомена за воспоставена пракса а не за ингеренции. Тоа е пракса воспоставена од ДУИ и СДСМ, од 2016 година. Редица министри од нивните редови“, рече Меџити.
СДСМ претходно денес во Владата му достави документи на премиерот Христијан Мицкоски за скандалот со Меџити. Портпаролката на СДСМ, Богданка Кузеска изјави дека во документите јасно е наведено дека Меџити ги пречекорил своите овластувања лично потпишувајќи ги сите предмети, констатирал Државниот управен нспекторат.