Македонија
(Видео) Лефков: Градоначалници на СДСМ преку тендери испумпувале пари

Градоначалниците на СДСМ имале изграден систем на криминални тендери, кажа на денешната прес-конференција Миле Лефков, пратеник и член на ИК на ВМРО-ДПМНЕ.
Излегуваат на виделина, додаде тој, матните зделки кои градоначалниците на СДСМ во претходниот мандат ги имаат направено.
„Ќе откриеме скандалозна тендерска постапка спроведена во општина Бутел во времето на мандатот на Велимир Смилевски, градоначалник од редовите на СДСМ. Станува збор за тендер за изградба на ново јавно улично осветлување на територија на општина Бутел во 2021 која го добила компанијата Друштво за производство трговија и услуги Провиз ДООЕЛ увоз – извоз Визбегово Скопје, согласно огласот под број 12277/2021 – вредност на склучен договор со ДДВ, 12.036.000 денари. Компанијата посочениот тендер го добива врз основа на најниска понуда, постигната на јавниот повик ама во т.н. ‘најниската понуда’ која е добиена како збир на единечни цени се крие сериозна манипулација и злоупотреба!“, објасни Лефков.
„Компанијата согласно техничката спецификација нуди екстремно ВИСОКИ цени по единица производ за производи кои општината ги набавувала во големи количини и екстремно НИСКИ цени за производи кои општината според договорот ги бара во минимални количини или воопшто не ги бара! Во услови на вакви разлики на цени за производи кои имаат слични спецификации, постои основано сомнение дека поскапите секогаш биле преферирани за набавки, и на тој начин освен што се злоупотребувал тендерот, биле трошени енормни народни пари со цел богатење на приватни фирми“, додаде Лефков.
Смета дека по ова се наметнува прашањето дали Велимир Смилевски ги злоупотребил своите овластувања и од компанијата „Провиз“ набавувал огромни количини од поскапите продукти? Дали на овој начин се испумпувале парични средства од буџетот на Општината на сметка на приватни компании? Дали разликата и добивката од набавката на поскапиот продукт му е исплаќана на сметка или „на рака“, односно во готово?
Доколку се докаже дека Општина Бутел ги набавила производите кои имале екстремни цени, а ги избегнувале продуктите кои чинеле по 1.8 денари тогаш се работи за класичен криминал со кој, како што оценува тој, се испумпувале буџетските пари на сметките на приватни компании и за тоа мора да има кривична одговорност.
Ги повика надлежните институции да го испитаат овој тендер, ЈО да постапи согласно своите надлежности, а Финансиската полиција да провери каде завршувале парите од сметките на оваа приватна компанија!
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ДОМ: Самоуништување на природата, Дошница жртва на владината неодговорност

Зелената партија ДОМ остро реагира на одлуката на Министерството за животна средина да не ја стави реката Дошница под привремена заштита, иако врз нејзиниот слив се планира изградба на две мали хидроцентрали кои ќе ја доведат клисурата до еколошки колапс.
ДОМ ја оценува оваа институционална пасивност како политичка одлука за самоуништување на природните богатства и суров удар врз иднината на нашите граѓани и граѓанки.
„Министерството ги прикрива своите намери зад изговори дека „предлогот не е формално доставен“. Ова е безобразно игнорирање на алармот што дојде од експерти, биолози и невладини организации уште пред еден месец, кога побараа мораториум се’ додека не се заврши Студијата за валоризација на природните вредности. Сезонското пресушување на реката Дошница и најавеното дополнително исушување се директна последица од оваа неодговорност.
Веднаш да се воведе мораториум на сите активности поврзани со концесијата, да се затвори пристапот до локациите и да се прогласи привремена заштита на текот и околниот предел, во корист на идното заштитено подрачје „Демиркаписка клисура“. Без тоа, ендемичните видови, македонските риби и планинските инсекти се на пат кон неповратна деградација“.
Бараат итна изработка и усвојување на елаборат за мониторинг на биолошката разновидност и еколошкиот проток во Дошница, со јавни дебати и независни експерти.
Министерството, како што додаваат, да испрати јасна порака до концесионерот: без зелено светло за заштита, нема ни нови брани.
„Зелената партија ДОМ нема да молчи пред ова политичко насилство над природата. Ако не прекине оваа тенденциозна институционална воздржаност, ќе покренеме граѓански и правни активности за да ја спасиме Дошница од катастрофа. Природата не чека, ниту ние ќе го дозволиме нејзиното уништување.
Македонија
ДПМНЕ преку Еразмус+ дели пари на универзитетот на Мерко, наместо да го затвори, велат од Левица

Повторно се открива соработката помеѓу двете долгогодишни коалициони партнери, ДПМНЕ и ДУИ, овој пат преку директна соработка со градоначалникот на црна листа, Рамиз Мерко. Додека премиерот Мицкоски секојдневно го обвинува ДУИ за криминал и корупција, неговите директори делат европски пари на спорниот универзитет во Струга, кој е директно во сопственост на фунционерот на ДУИ и градоначалник на Струга, истакнуваат од Левица.
Според оваа партија, новопоставената В.Д. директорка на Националната агенција за европски образовни програми и мобилност, Ана Михајлов, пред само една недела одобрила грант од Еразмус+ програмата на контроверзниот Универзитет во Струга од Рамиз Мерко.
Ова, како што велат, е скандал од невиден размери.
„Европски пари се делат на универзитет, за кој и министерката Весна Јаневска во официјални изјави потврди дека се утврдени бројни неправилности во неговото работење.
Скриената коалиција помеѓу ДПМНЕ и ДУИ, која совршено функционира во општините каде ДПМНЕ е власт, се докажува повторно. За Универзитетот на Рамиз Мерко има бројни скандали и истиот е познат дека единствено служи за принтање дипломи на функционерите на ДУИ, без да исполнува никакви критериуми за неговата спорна акредитација. Левица потсетува дека единствениот просветен инспектор кој алармираше за неправилностите на овој универзитет експресно беше суспендиран и деградиран, па пензиониран во време на владеењето на СДС и ДУИ. Ако ДПМНЕ пати од амнезија, Левица го потсетува дека просветен инспектор беше физички нападнат при вршење на надзор токму на струшкиот универзитет, каде сега ДПМНЕ дели европски пари“.
Од Левица јавно ја прашуваат министерката Весна Јаневска, „зошто наместо да се затвори универзитет на ДУИ поради констатираните неправилности, Владата на ДПМНЕ дели грантови од европски пари. Дали власта со амнестирањето на криминалот во овој универзитет постепено ја најавува идната влада со ДУИ, со оглед на тоа што и поранешниот вицепремиер Груби кој е во бегство партијата на Мицкоски веќе не го спомнува“.
Македонија
Кирков: ЈСП е пример за тоа како е да се работи недомаќински

На денешната седница на Советот на Град Скопје се обрати советникот од редовите на ВМРО-ДПМНЕ, Стефан Кирков.
Кирков истакна дека по посетата на Јавното сообраќајно претпријатие, сликата била застрашувачка, со што повеќе од 200 автобуси стојат нефункционални и неупотребливи, без притоа да се поправат.
„Заедно со колегата Тони Бојковски од Советот на Град Скопје направивме посета во ова јавно претпријатие и она што го видовме навистина нѐ вџаши. Повеќе од 200 расипани автобуси стојат подолго време на паркинзите на ова јавно претпријатие и покрај тоа што овде се случува тотален хаос“, рече Кирков.
Кирков додава дека ова јавно претпријатие работи недомаќински и ги повика институциите да направат целосна ревизија, со цел да се утврди кој е причинител за ваквата катастрофална ситуација на ЈСП.
„Оттука, се прашувам, иако сѐ е изгласано од страна на советниците, зошто ова јавно претпријатие апсолутно во последните три и пол години работи недомаќински и алармирам и од оваа позиција овде ги повикувам сите јавни и државни институции да направат целосна ревизија и да се утврди одговорноста за тоа кој придонесе ова јавно претпријатие да се наоѓа во ваква ситуација. Скопјани треба да бидат мирни, јавниот превоз и целиот град Скопје ќе доживее една поубава слика“.