Мирисот на традиционалната пастрмајлија и музичката програма, ќе го одбележат новото издание на манифестацијата „Штипска пастрмајлијада“, што почна денес.

Градот и годинава се очекува да биде собирно место за илјадници посетители од целата држава, кои доаѓаат да уживаат во гастрономските специјалитети и во забавната програма.

Стартот на новото издание на манифестацијата го означи џиновската пастрмајлија, која оваа година е рекордно голема. Николче Малинов кој традиционално ја пригoтвува џиновската пастрамајлија, претходно изјави дека за првпат ќе се употреби 17 килограми свинско месо, најмногу до сега споредбено со годините наназад.

На отворањето присуствуваше и потпретседателот на Владата и министер за транспорт, Александар Николоски, кој нагласи дека ваквите настани се значајни за развојот на локалната економија.

„Навистина е чест да се биде денеска во Штип на отворањето на овој голем настан за кој живее овој град и целиот регион. Ова значи многу посетители и влез на неколку милиони евра директно во локалната економија, што е задвижување за целото стопанство и нешто што треба да биде поддржано“, изјави Николоски.

Тој додаде дека Владата продолжува да го поддржува Штип преку бројни капитални проекти – од изградба на брана на Отиња и урбанизација околу Кежовица, до подобрување на патната, водоводната и канализационата мрежа. Според него, покрај универзитетски и бизнис центар, Штип има потенцијал да стане и туристички центар во источниот дел на државата.

На шеталиштето се поставени 10-тина штандови со пастрмајлија. Утре, во склоп на манифестацијата, ќе настапи балканската мега ѕвезда Дино Мерлин, заедно со македонските ѕвезди Елена Ристеска и Владо Јаневски. Концертот со почеток од 20:00 часот, утре, ќе се одржи на градскиот стадион во Штип.

Шест лица завршија со симптоми на труење по семинар одржан на 11 септември во ресторан во Куманово, соопшти Центарот за јавно здравје – Куманово.

Од вкупно 36 учесници на обуката организирана од фирма, некои од нив почувствувале повраќање, дијареја, висока температура и до 41 степен, како и стомачни болки, по што двајца биле хоспитализирани, тројца примиле терапија во дневна болница, а едно лице се лекува во домашни услови.

По пријавите, извршен е инспекциски надзор, земени се мостри храна и брисеви за анализа. Одлучено е објектот да остане затворен сè до добивање негативни резултати.

Од ЦЈЗ порачуваат дека состојбата внимателно се следи и дека се преземени сите противепидемиски мерки.

Портпаролката на СДСМ, Богданка Кузеска, денеска на прес-конференција изјави дека околу 400 пожарникари ангажирани преку општините, не добиле плата.

Таа истакна дека овие лица, кои во август беа примени со ветување за месечен надоместок од 24.000 денари, обуки и можност за трајно вработување, до денес, заклучно со 17 септември, сè уште немаат добиено ниту една плата.

Според информациите, исплатата е блокирана поради изборниот процес бидејќи станува збор за вонредно плаќање, што ги остава младите пожарникари без заработка, а граѓаните без целосна заштита во време на пожари и еколошки катастрофи.

Кузеска нагласи дека овој случај ја покажува потребата од системски решенија кои ќе обезбедат сигурност и навремено надоместување за сите ангажирани во противпожарниот систем. Таа порача дека е неопходно институциите и општините веднаш да најдат начин за одблокирање на исплатите и за воспоставување стабилен механизам што нема да дозволи вакви ситуации да се повторуваат. Според неа, граѓаните очекуваат јасни и ефикасни решенија, бидејќи засилен и стабилен противпожарен систем значи поголема безбедност за сите.