Заменик-министерот за животна средина и просторно планирање, Јани Макрадули, вчеравечер во живо на социјалната мрежа „Фејсбук“ одговараше на прашања на граѓаните во однос на аерозагадувањето.

На прашање на граѓаните каде може да се пријавуваат загадувачите, заменик-министерот за животна средина и просторно планирање, Јани Макрадули, рече:

„Државниот инспекторат се грижи, согласно со закон, за оние инсталации за коишто велиме дека се со А-лиценца, додека Градот Скопје и општините се грижат за оние што имаат Б-иценци. Но во овој момент правиме сериозна промена во тој дел. На системот ЕНЕР веќе се наоѓа законот за инспекциски совет, којшто е чадор на сите инспекции. Со него нема да биде строго поделена надлежноста, како што беше до сега, и да се бега од одговорноста, туку напротив да се интервенира“, рече Макрадули.

Макрадули посочи дека во Република Македонија има 396 компании со легални лиценци. Но, како што додаде тој, има и компании коишто работат со усогласување на оперативниот план, како што е примерот на „Југохром“, според кој од 2014 година не успеа да се усогласи со оперативниот план, не набави филтри и сега не работи.

„Во РЕК Битола, по подолго време се потпиша договор со компанијата што победи на тендер, тоа е ‘МЗТ инженеринг’ за 22 милиони денари да ја третира правта  што се крева при работата на овој комбинат“, истакна меѓу другото Макрадули.

Тој се осврна и на Планот за чист воздух, којшто е стратешки приоритет на Владата. Со овој документ, како што истакна Макрадули, спроведувањето на мерките и активностите нема да зависи од поединци, туку ќе бара вклученост на сите чинители. Целта на Планот за чист воздух е да се справи со најголемите загадувачи, односно загревањето на домаќинствата, сообраќајот и индустријата.

„Едно училиште во зимскиот период за греење на нафта троши од 30 до 40 илјади евра. За споредба, еден инвертор чини 250 евра. Со промена на начинот на греење, за почеток во градинките и во училиштата, ќе постигнеме двоен ефект – заштита на животната средина и заштеди во буџетите на овие установи и тие средства потоа ќе можат да се пренаменат за други потреби“, посочи Макрадули.

Во ова насока, заменик-министерот Макрадули рече и дека социјалните случаи коишто се греат на нееколошки средства ќе добијат директна помош од државата за замена на начинот на греење.

На бројните реакции на граѓаните дека 1,5 милиони евра се премалку пари за борба со аерозагадувањето, заменик-министерот Макрадули истакна дека тоа е само првичен буџет и дека кон средината на декември е предвидена донаторска конференција за прибирање дополнителни средства.