Македонија
(Видео) Манасиевски го обвини Апасиев дека купил деловен простор во Центар за 721 еврo м2

Валентин Манасиевски, член на ЦК на ВМРО-ДПМНЕ, го обвини Димитар Апасиев дека купил деловен простор во Центар за 721 евра м2. Тој обвини и дека се крие договор под маса меѓу Апасиев, извршителот и банката за купување на деловниот простор во строгиот центар на Скопје.
„Апасиев да каже како купил деловен простор во строг Центар на Скопје за 721 евра м2. Пропаднатиот аскет во обид, Апасиев е целосно демаскиран. Тој на 26.11.2024 година преку Левица купил 409м² деловен простор во строгиот центар на Скопје, зад седиштето на компанијата А1, по цена и до три пати пониска од пазарната. Левица на Апасиев за м² платила 721 евро, во услови кога м² не може да се купи под 2000 евра. Дополнително, овој имот Левица го купува преку извршител, што значи истиот е одземен од некој граѓанин или од фирма“, тврди Манасиевски.
Според него, се поставува логичното прашање, како извршителот не можел да постигне цена на објект во строг центар на Скопје, анимирал ли доволно потенцијални купувачи или целиот процес го водел многу тивко?
Манасиевски прашува дали се крие договор под маса помеѓу извршителот – Апасиев и доверителот?
„Доверителот во овој случај е УНИ банка, со бугарски капитал. Се поставува прашањето како банката дозволила и не анимирала свои клиенти за наддавањето? Особено кога се зема во предвид дека во банките се даваат кредити за слични објекти и станови на граѓани во градба кога м² се проценува и над 2000 евра? Која е економската логика на банката тука? Дали зад ова купување се крие нешто повеќе и што“, праша Манасиевски и ги повика надлежните институции да истражат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Петмина добија труење од храна откако јаделе во сендвичарница во Штип

Пет лица пријавиле симптоми на труење со храна по јадење сендвичи со пилешки стек во сендвичарница–киоск во Штип, информираат од Агенцијата за храна и ветеринарство (АХВ). Објектот е веднаш затворен до добивање на резултатите од лабораториските тестирања.
Случајот бил пријавен од Центарот за јавно здравје Штип, по што инспекторите на АХВ извршиле вонреден инспекциски надзор кај операторот со храна.
Земени се примероци од инкриминираната храна и брисеви од работните површини. Објектот е времено затворен сè додека не се потврди неговата безбедност со лабораториските резултати – велат од АХВ.
Граѓаните кои се пожалиле на симптоми на труење побарале медицинска помош, а здравствените служби го следат нивното здравствено состојба.
Од Агенцијата нагласуваат дека инспекциските служби ќе продолжат со контроли за да се обезбеди заштита на потрошувачите и превенција на слични случаи.
Македонија
Се бара притвор за одгледувачот на домашен канабис

Основното јавно обвинителство Скопје донесе Наредба за спроведување истражна постапка против едно лице осомничено за кривично дело – Неовластено производство и пуштање во промет наркотични дроги, психотропни супстанции и прекурсори од член 215 став 1 од Кривичниот законик.
Во домот на осомничениот 50-годишник во селото Страчинци, полицијата пронашла 3 откорнати растенија и 99 пресечени, превиткани и исушени гранчиња канабис, како и 41,4 грама марихуана.
Јавниот обвинител до судијата на претходна постапка од Основниот кривичен суд Скопје достави предлог за определување мерка притвор за осомничениот.
Македонија
Најмногу дожд во изминатото деноноќие во Тетово, Претор и Куманово

Најмногу дожд во изминатите 24 часа до 08:00 часот се наврнати во Тетово – 19 литри на метар квадратен, потоа во Претор 11 и Куманово 10, информираат од Управата за хидрометеоролошки работи.
Потоа следи Пожаране со 9 литри на метар квадратен, 8 во Попова Шапка, по 6 во Крушево и Маврови Анови, 5 во Битола, по 4 во Крива Паланка и Лазарополе, по 3 во Скопје-Зајчев Рид, Велес и Охрид, 2 во Прилеп и еден литар на метар квадратен во Тополчани.
Во текот на денот не очекува претежно облачно со повремени врнежи од дожд кои наместа ќе бидат пообилни (над 20 l/m²), проследени со ретки грмежи. Ќе дува слаб со умерен ветер претежно од југоисточен правец, поизразен долж Повардарието.
Најниска температура утрово е измерена на Попова Шапка – шест степени Целзиусови. Во Берово, Крушево и Маврови Анови по 9, 10 во Лазарополе, по 11 во Крива Паланка и Претор, по 12 во Охрид, Прилеп и Струмица, по 13 во Тетово, Битола, Виница и Куманово, по 14 во Скопје-Петровец, Скопје-Зајчев Рид и Велес, по 15 во Штип, Демир Капија, Кавадарци и Гевгелија.