Македонија
(Видео) Марјан од „Доказ М“ останува во притвор, судијката се сомнева дека може да избега

Марјан Стаменковски, сопственик на порталот „Доказ М“, останува во притвор. Судијката Марија Клетничка-Марковска рече дека и натаму постои опасност од бегство. Продолжувањето на мерката притвор е до правосилност на пресудата, а најдолго 60 дена од денеска како ден за објава на пресудата.
„Против обвинетиот Марјан Стаменковски се продолжува мерката притвор. Одлуката е донесена поради основан став од бегство и опасност од криење, поради карактерот на кривичните дела за кои тој е огласен за виновен, видот и карактерот на делата, видот и висината на казната на кривичните дела, последиците од кривичното дело, степенот на кривичната одговорност, како и околноста дека тој нема постојано место на живеење – според личната карта живее на едно место, а живее на друго“, рече судијката.
Ниту здравствената состојба не го предомисли Кривичниот суд за Стаменковски да биде пуштен од притвор.
„Тие не се од релевантно влијание со оглед дека ако има влошување на здравјето, има медицински сектор кој може да му даде терапија и упатување во специјалистички одделенија“, додаде судијката.
Претходно, судијката Клетничка Марковска му изрече казна од три години и еден месец за пет кривични дела на Марјан Стаменковски, сопственик на порталот „Доказ М“. Му изрече и забрана за вршење дејност. Посочи дека сите регистрирани домени во „Марнет“ на негово име ќе треба да се избришат, а во наредните 10 години ќе не може да регистрира нови.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Без вода делови од Центар и Аеродром

Од ЈП Водовод и Канализација известуваат дека денеска поради уличен дефект на улицата Питу Гули бб, општина Центар (во близина на Тинекс), прекинато водоснабдување ќе имаат следниве улици: Питу Гули, дел од Загребска, Ганчо Хаџипанзов, Капештец, Димитар Пандилов, Караорман, висока зона Козле и Ловќенска-крак 1,3,5 и 7.
Водоснабдувањето ќе биде прекинато од 08:30 часот до завршување со санација на дефектот.
Денеска поради уличен дефект на 3-та Македонска Бригада бб, прекинато водоснабдување ќе имаат објектите на Вива, Метро, Центро, Спорт М и Форд, во општина Аеродром.
Водоснабдувањето ќе биде прекинато од 08:00 часот до завршување со санација на дефектот.
Македонија
Делови од Аеродром, Центар и Ѓорче Петров денеска без струја

Од ЕВН Македонија АД известуваат дека денеска без електрична енергија ќе останат:
· во периодот од 08.10 до 15.00 часот, корисниците на дел од село Долно Лисиче.(општина Аеродром)
· во периодот од 08.10 до 15.00 часот, корисниците на објектите спроти Ист Гејт населба Крњево.(општина Центар)
· во периодот од 08.10 до 12.00 часот, корисниците од улица Божидар Рајковиќ, дел од ул. Горноврановска и дел од улицата Горно Лисиче (општина Аеродром)
· во периодот од 08.10 до 16.00 часот, корисниците на улиците Ибе Паликуќа, Воин Драшкоци, Веле Марков (општина Ѓорче Петров)
Македонија
Претежно облачно со повремен дожд

Времето денеска ќе биде променливо облачно со повремени локални врнежи од дожд. Кон крајот на денот врнежите насекаде ќе престанат. Ќе дува умерен до засилен ветер од северен правец (локално над 60 km/h). Минималната температура ќе биде во интервал од 6 до 13, а максималната ќе достигне од 8 до 16 степени.
Во Скопје, претежно облачно со повремен дожд. Ќе дува умерен, во делови од котлината повремено засилен ветер од северен правец. Минималната температура ќе се спушти до 12, а максималната ќе достигне до 14 степени.
Времето во наредните денови
Од четврток времето ќе биде стабилно и суво со слаб до умерен северен ветер. Дневната температура ќе биде во пораст.