Пукна балонот на лаги и манипулации на СДС во врска со истрагата за несреќата во Кочани. Сите може да видат дека институциите постапуваат професионално и неселективно, изјави Бране Петрушевски, пратеник на ВМРО-ДПМНЕ.

„Потенцираме дека МВР и институциите на системот ги доставиле сите потребни докази и информации за несреќата во Кочани до Јавното обвинителство уште пред еден месец. Сите преземени акции од ЈО до сега, сега и од сега, се исклучиво врз основа на доказите што ги обезбедило МВР. МВР предаде обемна документација во ЈО и никој не е поштеден“, рече тој.

Петрушевски вели дека задача на Јавното обвинителство е сега врз основа на обемната документација за случајот, која им е предадена, да ја лоцираат вината и да подигнат обвиненија за секого за кој сметаат дека според правната логика е на кој било начин виновен за пожарот и за смртта на децата во Кочани.

„Ниеден полицаец, функционер или кој и да е граѓанин што имал допирна точка со предметот не е изоставен и сѐ е опфатено во документацијата“, рече тој.

Колку е сериозен обемот на документацијата, вели Петрушевски, покажува и фактот дека во овој случај се опфатени над 60 лица – од министри, преку МВР, институциите, бизнисмени, градоначалници, секој што би можел да има вина.

„А сега да прашаме, колку лица беа опфатени во истрагата за модуларната болница? Нула. Колку беа во ‘Беса транс’ и за Ласкарци? Нула. Е, сега, тоа е разликата од МВР сега и од МВР кога СДС беше на власт. Одговорност има за секого, без разлика кој е и од каде е“, рече Петрушевски.