Македонија
(Видео) Менкиноски: Прогонот за „Топлик“ мора да заврши, дури и Сугарески потврдува дека нема материјална штета

Во рацете држам еден допис кој е од министерот за транспорт и врски, Сугарески. Во овој допис Сугарески образложува дека во предметот „Топлик“ нема материјална штета, рече на прес-конференција Тони Менкиноски, претседател на правната комисија при ВМРО-ДПМНЕ.
Како што наведе претставникот на опозициската партија, дополнително министерот Сугарески образложува дека штетата што е претпоставена од страна на јавното обвинителство нема да ја побаруваат.
„И дотолку повеќе, господинот Сугарески во крајната сентенца на неговиот допис наведува дека со постапката што се водела се заштитени имотните интереси и права на Република Македонија“, рече Менкиноски.
Тој го искористи пресот да упати порака и прашања до одредени релевантни институции во Република Македонија, кои, како што рече, малтретирале со таканаречени процеси, како што е процесот „Топлик“.
„Зошто и од која причина го премолчуваат овој доказ, особено СЈО, кое има обврска согласно со Законот за кривична постапка да ги достави сите докази кои се во штета, но и во полза на обвинетите. Да не заборавиме, една од улогите на јавното обвинителство согласно со законот е и да ги штити основните човекови права на обвинетите“, наведе претседателот на правната комисија при ВМРО-ДПМНЕ.
Како што кажа Менкиноски, со дописот кој е доставен, односно со откажувањето на Министерството за транспорт и врски за оштетно побарување не постои кривично дело.
„Ние повеќе немаме предмет. Јас не знам и од која причина јавното обвинителство сè уште го нема откажано гонењето по овој предмет и зошто го нема информирано судот и го нема повлечено обвинителниот акт“, подвлече тој и додаде дека е важно во целата постапка овој прогон да заврши бидејќи доказите се круцијални и битни за целиот предмет.
Случајот „Топлик“ на специјалното јавно обвинителство, каде што првоосомничен е ексминистерот за транспорт и врски Миле Јанакиески, се однесува на продажба на државно земјиште за изградба на комплексот „Сончев град“ во Сопиште.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Битиќи: Ја добивме битката, концесијата дадена од ВМРО-ДПМНЕ, падна на арбитража

Концесијата дадена од ВМРО-ДПМНЕ, симбол на криминал и коруптивни зделки, падна на арбитража. Државата ја доби битката, нема да плати штета од 115 милиони евра, реагира пратеникот на СДСМ, Фатмир Битиќи и поранешен вицепремиер.
„Да се потсетиме: Случајот односно судските рочишта се затворени во 2023 година. Арбитражниот суд носи конечна пресуда во рок од две (2) години по завршните зборови. Тимот што ги застапуваше правата на нашата држава во целиот тој процес се водеше со јасни определби и насоки од страна на мојот кабинет во претходната Влада“, наведува Битиќи.
И затоа, додаде тој, искрена благодарност до White & Case, нашите главни застапници во арбитражата, државните службеници и експерти кои вложија знаење и енергија, како и до локалните адвокатски друштва за нивната посветеност и професионалност.
„Благодарност до сите што ги застапуваa интересите на државата. Вака се почитува татковината, со искрен настап и без калкулации – а за оние кои имаа други интереси, иднината ќе покаже“, стои во објавата на Битиќи.
Македонија
Поради пожарот кај Јасен, затворен за сообраќај патот Македонски Брод – Скопје

Поради пожар во националниот Парк Јасен, регионалниот пат Р1106 Македонски Брод – Скопје затворен е за секаков вид на возила, информира АМСМ.
Сообраќајот на државните патишта се одвива непречено, по претежно суви коловози.
Интензитетот на сообраќајот на патиштата надвор од градските средини е зголемен. Поради летните одмори, се бележи зголемена фреквенција на возила, на ГП Табановце времето на чекање за излез е околу 30 минути, додека на останатите гранични премини од македонска страна нема подолги задржувања при влез или излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Меџити: 65 милиони евра за Универзитетскиот кампус и подземниот паркинг на Плоштад Скендербег во Скопје

Изградбата на Универзитетскиот кампус „Мајка Тереза“ и подземниот паркинг на Плоштад Скендербег стануваат реалност. За овие крупни проекти се обезбедени 65 милиони евра од државниот буџет, соопшти првиот вицепремиер Изет Меџити.
Според него, реализацијата на овие проекти ќе започне многу скоро.
„Сè е подготвено за нивниот почеток. Овие инвестиции ќе донесат долгорочни придобивки за студентите, граѓаните и економскиот развој на Скопје. Во таа насока, денес остварив значаен состанок со министерот за транспорт, Александар Николовски, директорот на Инспекторатот за градежништво и претставници на Општина Чаир, каде што се договоривме за конкретните чекори што ќе го обезбедат итното започнување на овие проекти. Овие инвестиции поставуваат нови темели за урбаното и образовното модернизирање на нашиот град, означувајќи клучен момент за стратешкиот развој на Скопје. Со оваа посветеност, отвораме нова фаза, каде визијата за функционален, иновативен и развоен град се претвора во реалност. Благодарение на меѓуинституционалната координација и заедничката посветеност, многу брзо ќе започне теренската реализација на овие проекти од национално и стратешко значење. Ние ги исполнуваме ветувањата и ја претвораме визијата во реалност!“, напиша Меџити.