Македонија
(Видео) Мециновиќ побара да не се носи закон за медиуми без дискусија со медиумите

„Јас барам точката седумнаесет, а тоа е предлог на Законот за изменувањето и дополнувањето на Законот за медиумите во прво читање, да биде тргната од дневниот ред поради низа причини. Пред сè, добро е што воопшто е ставена во редовна постапка. Очекувавме дека ќе оди во скратена постапка, како што досега беше праксата за ова парламентарно мнозинство“, истакна пратеникот и портпарол на Левицата, Амар Мециновиќ, на собраниската седница.
„Во комуникација со медиумски фактори, сепак, сметаме дека и ова е избрзување за носење ваква битна материја затоа што сметаме дека таа треба да ги вклучи сите општествени фактори, кои се занимаваат со оваа материја. Политичките партии, медиумите и граѓанскиот сектор се три одделни елементи во општествениот дискурс. Треба да се рашири дебатата! Затоа повикувам оваа точка да биде симната и пред неа да претходи опширна и инклузивна јавна расправа во која ќе бидат вклучени тие релевантни фактори на оваа материја“, појасни Мециновиќ.
Од Левицата сметаат дека во ова законско решениe има некои опасности што може да се појават.
„Сметаме дека, апсолутно, е потребна регулација на оваа материја затоа што, генерално, овие луѓе се оставени без никаква законска заштита. Но, сакам да потсетам дека секогаш кога собранијата се обидувале да го регулираат интернетот, тоа е ловење воздух затоа што ако има малициозни намери и ако има ресурси за тоа да се направи, на интернетот многупати може да се заобиколат регулациите“, додаде портпаролот на Левицата.
Според Мециновиќ, со овој предлог-закон се фаворизираат веќе постојните медиумски магнати и оние што имаат ресурси да играат во врска со законите.
„Наспроти фаворизирањето на постојните медиумски магнати, искрените портали, кои се со помал број вработени и кои работат на специјализирани теми, како, на пример, што се: спортските портали, автомобилските портали, религиските портали – тоа се портали за кои не е потребен толкав тим или таква инфраструктура како што се предлага во овој закон.
Поради наведените причини, пратеникот од Левицата повика да биде тргната оваа точка.
„Сметам дека сѐ додека политичката каста се обидува без комуникација со медиумските претставници да го регулира овој простор, многу лесно тоа може да западне во авторитарно однесување, кое потоа ќе го гледаме преку негативни последици, кои се одразуваат врз севкупниот демократски амбиент во Република Македонија и во ослободувањето на мислата и поткрепувањето на транспарентноста во дискурсот во општеството“, појасни Мециновиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ДУИ oбвинува за дискриминација на Албанците во Царинската управа

Демократската унија за интеграција вели дека 26 службеници во Царинската управа од македонска етничка припадност биле унапрдени, без ниту еден Албанец.
Од ДУИ обвинуваат дека се води систематската политика на етничко исклучување, која директно го поткопува соживотот и меѓуетничката рамнотежа во државата.
Повикаа на итна реакција од Владата и одговорност од оние кои, како што велат, со своето молчење или учество овозможуваат враќање кон дискриминаторски практики.
Македонија
Таравари го разреши Арбен Фетаи и уште неколку членови на претседателството на Алијансата за Албанците

Крилото на Арбен Таравари во Алијансата за Албанците, го разреши Арбен Фетаи од функцијата претседател на партиското собрание.
Таравари изјави дека се исклучени и некои членови на Претседателството кои јавно се изјаснуваат против Алијансата за Албанците. Се работи за 8 од 46 членови. За Мимоза Муса, Таравари рече дека не е донесена одлука оти не е јасно дефинирано дали останува со Алијансата за Албанците, или со Влен.
Тој рече дека ќе соработуват и со ДУИ, и со ВЛЕН на локалните избори за да им помогнат на Албанците, говорејќи дека нема функција, нема име или позиција што има вредност како една чесна структура која излегува пред граѓаните со чисто лице.
Состанокот и разрешувањето се случуваат во период кога повеќе високи партиски функционери се спротивставија на одлуката на Таравари да ги напушти Владата и коалицијата. За нов претседател на собранието на Алијансата е избран Назим Таипи.
Фетаи за денес во 14 часот најави прес-конференција.
Македонија
Дожд викендов во целата држава, најмногу во Крива Паланка, Виница и Струмица

Низ цела Македонија, викендов има врнежи од дожд, а во изминатите 24 часа, најмногу дожд 20 литри на метар квадратен се забележани во Крива Паланка, Виница и Струмица.
Според информацијата на УХМР, 16 литри на метар квадратен дожд паднале во Штип и Кавадарци, 14 во Битола и Берово, 13 во Тетово, Прилеп, Крушево, Попова Шапка, 11 Тополчани, 10 Скопје-Петровец, Куманово, 9 во Претор, 8 – Демир Капија, 7 во Скопје-Зајчев Рид, 6 Велес, 5 Охрид, Гевгелија, Лазарополе, 4 Маврови Анови.
Времето во текот на денот ќе биде променливо облачно и свежо со повремени врнежи од дожд, пообилни во југоисточните делови (над 25 литри на метар квадратен). До крајот на денот врнежите ќе престанат. Ќе дува умерен до засилен северен ветер (наместа над 70 километри на лас), особено долж Повардарието.
Дневната температура ќе биде во интервал од 11 до 17 степени.
Во Скопје, променливо облачно и свежо, претпладне со повремен дожд. Ќе дува умерен, во делови од котлината повремено засилен северен ветер. Дневната температура ќе достигне до 16 степени.